रामटेक (विशेष प्रतिनिधी):नागपूर-जबलपूर राष्ट्रीय महामार्ग क्रमांक ४४ हा पुन्हा एकदा मुक्या वन्यजीवांसाठी जीवघेणा ठरल्याची अत्यंत धक्कादायक आणि संतापजनक घटना समोर आली आहे. पवनी वनपरिक्षेत्राच्या हद्दीत एका अज्ञात भरधाव वाहनाने दिलेल्या भीषण धडकेत एका नर बिबट्याचा जागीच मृत्यू झाला. या दुर्दैवी घटनेमुळे वन्यजीव प्रेमींमधून तीव्र संताप व्यक्त होत असून, महामार्गावरील वन्यजीवांच्या सुरक्षेचा प्रश्न पुन्हा एकदा ऐरणीवर आला आहे.
मिळालेल्या माहितीनुसार, गुरुवारी (१६ जुलै) पहाटे सुमारे ६ वाजताच्या सुमारास पवनीजवळ राष्ट्रीय महामार्गावरून रस्ता ओलांडत असताना एका अज्ञात वाहनाने बिबट्याला जोरदार धडक दिली. ही धडक इतकी भीषण होती की, बिबट्याच्या डोक्याला गंभीर दुखापत होऊन मोठ्या प्रमाणावर रक्तस्त्राव झाला आणि त्याने जागीच प्राण सोडले.अपघातानंतर खुमरी येथील ओरिएंटल टोल प्लाझाच्या कर्मचाऱ्यांनी तात्काळ या घटनेची माहिती वनविभागाला दिली. वनविभागाचे अधिकारी व कर्मचाऱ्यांनी तातडीने घटनास्थळी धाव घेत मृत बिबट्याचा पंचनामा केला आणि मृतदेह ताब्यात घेऊन पुढील कायदेशीर प्रक्रिया सुरू केली.
संरक्षक जाळ्या भेदून बिबट्या महामार्गावर आलाच कसा?
वनपरिक्षेत्र अधिकारी माने यांनी दिलेल्या माहितीनुसार, वन्यजीवांच्या सुरक्षेसाठी महामार्गाच्या दोन्ही बाजूंना संरक्षक जाळ्या बसवण्यात आल्या आहेत. मात्र, तरीही हा बिबट्या जाळी ओलांडून किंवा त्यामधील त्रुटी शोधून रस्त्यावर आला असावा, असा प्राथमिक अंदाज वनविभागाने व्यक्त केला आहे. मात्र, कोट्यवधी रुपये खर्च करून उभारलेल्या या जाळ्यांची नियमित देखभाल का होत नाही? असा संतप्त सवाल आता पर्यावरण अभ्यासकांकडून विचारला जात आहे.
अपघातग्रस्त वाहनचालक फरार; शोध सुरू
बिबट्याला चिरडून पळ काढणाऱ्या अज्ञात वाहनचालकाविरुद्ध वनकायद्यानुसार गुन्हा दाखल करण्यात आला आहे. धडक देणारे अज्ञात वाहन घटनास्थळावरून पसार झाले असून, टोल नाक्यावरील सीसीटीव्ही फुटेजच्या मदतीने वनविभाग आणि पोलीस यंत्रणा या प्रकरणाचा कसून तपास करत आहेत.
वन्यजीव संरक्षणासाठी तातडीच्या मागण्या:
या घटनेच्या पार्श्वभूमीवर वन्यजीव प्रेमींनी आणि स्थानिक प्रशासनाने खालील मागण्या लावून धरल्या आहेत:
-
सुरक्षित क्रॉसिंगची गरज: महामार्गावर वन्यजीवांसाठी अधिक सुरक्षित अंडरपास किंवा ओव्हरपास (अॅनिमल क्रॉसिंग) तयार करण्यात यावेत.
-
जाळ्यांची तपासणी: महामार्गाच्या बाजूला लावलेल्या संरक्षक जाळ्यांची नियमित पाहणी व दुरुस्ती केली जावी.
-
कडक कारवाई: वन्यजीवांना धडक देऊन फरार होणाऱ्या बेजबाबदार वाहनचालकांवर मनुष्यवधासारखे कडक गुन्हे दाखल व्हावेत.
-
स्पीड लिमिट: वनक्षेत्रातून जाणाऱ्या महामार्गावर वाहनांच्या वेगावर नियंत्रण ठेवण्यासाठी कडक उपाययोजना कराव्यात.
“वन्यजीव वाचवा, पर्यावरण वाचवा!”
