नागपूर दि.१६ : पेंच व्याघ्र प्रकल्पांतर्गत येणाऱ्या पवनी (ता. रामटेक) बफर झोनमधील टुय्यापार बीटमध्ये शनिवारी सायंकाळी एका वाघिणीचा मृतदेह आढळला. श्वसनाच्या त्रासाने हा मृत्यू झाल्याचा वनविभागाच्या अधिकाऱ्यांचा प्राथमिक अंदाज आहे. दरम्यान, याच भागात २१ डिसेंबर २०१६ रोजीही वाघिणीचा मृतदेह आढळला होता.
जंगलात शनिवारी फायर लायनिंगचे काम करीत असताना वन मजूरांना सायंकाळी ५ वाजताच्या सुमारास मृत वाघिण आढळली. वन अधिकाऱ्यांनी लगेच घटनास्थळाला भेट देत मृतदेह ताब्यात घेतला. रविवारी मुख्यवन संरक्षक कार्यालयातील पशुधन अधिकारी डॉ. बी. एम. कडू तसेच देवलापार येथील पशुधन विकास अधिकारी डॉ. रडके यांनी वाघिणीचे शवविच्छेदन केले. वाघिण अंदाजे सात वर्षांची असल्याचे अधिकाऱ्यांनी सांगितले.
