भंडारा,दि.20 : केंद्र सरकारच्या माहिती व प्रसारण मंत्रालयांतर्गत कार्यरत नागपूर येथील पत्र सूचना कार्यालय व जिल्हा माहिती कार्यालय भंडारा यांच्या सहकार्याने २१ डिसेंबरला सकाळी ११ ते ५.१५ वाजेपर्यंत स्थानिक हॉटेल रॉयल प्लाझा येथे ग्रामीण प्रसारमाध्यम कार्यशाळा ‘वातार्लाप’चे आयोजन करण्यात आले आहे.जिल्हाधिकारी शांतनू गोयल या कार्यशाळेचे उद्घाटन करतील. तर कार्यशाळेत विशेष अतिथी म्हणून माहिती व जनसंपर्क, नागपूर विभागाचे प्र. संचालक अनिल गडेकर उपस्थित राहतील. या कार्यशाळेचा उद्घाटन समारंभ सकाळी ११ वाजता होईल.
उद्घाटन सत्रानंतर पत्रकारांसाठी विविध क्षेत्रातील तज्ज्ञांच्या मार्गदर्शनपर व्याख्यानांचे आयोजन करण्यात आले असून या कार्यशाळेत तीन तांत्रिक सत्रामध्ये ६ व्याख्याने होणार आहेत. दुपारी १२ ते १.४५ दरम्यान होणाऱ्या प्रथम तांत्रिक सत्रामध्ये ‘ग्रामीण क्षेत्रात प्रभावी.संवादासाठी इलेक्ट्रॉनिक मीडियाची भूमिका’ या संदर्भात महामेट्रो नागपूरच्या कॉर्पोरेट कम्युनिकेशन विभागाचे उपमहाव्यवस्थापक अखिलेश हळवे मार्गदर्शन करतील. भंडाऱ्याचे जिल्हा आपत्ती व्यवस्थापन अधिकारी अभिषेक नामदास ‘आपत्ती व्यवस्थापनात प्रसार माध्यमांची भूमिका’ यासंदर्भात मार्गदर्शन करतील. विकास संवादामध्ये ‘ग्रामीण पत्रकारांची भूमिका : स्थानिक वृत्त – राष्ट्रीय दृष्टिकोन’ या विषयावर नागपूर येथील केंद्रीय माहिती व प्रसारण मंत्रालयाअंतर्गत फिल्ड आउटरचे ब्युरोचे क्षेत्रीय प्रचार अधिकारी डॉ. मनोज सोनोने मार्गदर्शन करणार आहेत. .
दुपारी २.३० ते ३.४५ दरम्यान होणाऱ्या दुसऱ्या तांत्रिक सत्रात भंडाराचे जिल्हा माहिती अधिकारी रवी गिते, हे ‘ग्रामीण क्षेत्रात प्रभावी जनसंवादासाठी वृत्तपत्र व समाज माध्यमांची भूमिका’ या विषयावर व्याख्यान देतील. ‘ग्रामीण विकासामध्ये वृत्तांकनाचे महत्त्व’ यावर ज्ञानेश्वर मुंदे विवेचन करतील. शेवटच्या तांत्रिक सत्रामध्ये पत्र सूचना कार्यालय, नागपूरचे साहाय्यक संचालक शशिन राय ‘विकास-संवाद आणि पत्र सूचना कार्यालय’ या विषयावर सादरीकरण करतील. सायंकाळी ४.४० ते ५.१५ दरम्यान प्रतिसाद-संकलन व कार्यशाळेचा समारोप होईल
