गडचिरोली, दि.02: विधानसभा सार्वत्रिक निवडणूक-2019 अंतर्गत गडचिरोली मतदारसंघात अवैध मार्गाने होणारी वाहतुकीमध्ये अंमलीपदार्थ, रोकड तसेच वस्तू यावर उचित प्रतिबंधात्मक उपायोजनेबाबत तसेच निवडणूकीचा खर्च अचूक नोंदविणेबाबत जिल्हाधिकारी तथा जिल्हा निवडणूक अधिकारी यांचे अध्यक्षतेखाली जिल्हाधिकारी कार्यालय, गडचिरोली येथे प्रशिक्षण घेण्यात आले. यावेळी शेखर सिंह म्हणाले की निवडणुकीदरम्यान चुकीच्या पद्धती रोखण्यासाठी सतर्क रहा. कोणत्याही प्रकारे मतदारांना आमिष दाखविण्यासाठी येणारे अंमली पदार्थ असतील, रोकड असेल यावर आळा घालण्यासाठी भरारी पथकांनी चांगल्या पद्धतीने काम करणे गरजेचे आहे. यामध्ये कोणाकडूनही कामाबाबत दुर्लक्ष होता कामा नये अशा सूचना त्यांनी उपस्थित अधिकारी कर्मचाऱ्यांना दिल्या.
सदर प्रशिक्षणास गडचिरोली मतदारसंघातील भरारी पथक, स्थिर सनियंत्रण पथक, व्हिडीओ सनियंत्रण पथक, व्हिडीओ पहाणी पथक व लेखापथक हजर होते. यावेळी मुख्य कार्यकारी अधिकारी डॉ. विजय राठोड, जिल्हा परिषद, कल्पना निळ-ठुबे, उप जिल्हा निवडणूक अधिकारी, नोडल अधिकारी, डिईएमसी विकास सावंत, लेखा अधिकारी, जिल्हाधिकारी कार्यालय सतिश धोत्रे उपस्थित होते.
