चंद्रपूर,दि.19ः गोसीखुर्द प्रकल्पाच्या घोडाझरी उजव्या कालव्याचे बांधकाम करण्यासाठी आवश्यक असलेल्या भुसंपादनाची कार्यवाही वेगाने पूर्ण करून हा प्रकल्प तातडीने पूर्णत्वाला न्यावा, अशा सूचना विधानसभा अध्यक्ष नाना पटोले यांनी दिल्या.बुधवारला विधानसभा अध्यक्षांच्या अध्यक्षतेखाली यासंदर्भात बैठक आयोजित करण्यात
आली होती त्यावेळी ते बोलत होते. बैठकीस चंद्रपूरचे जिल्हाधिकारी यांच्यासह विदर्भ पाटबंधारे विकास महामंडळाचे व इतर संबंधित अधिकारी उपस्थित होते. गोसीखुर्द प्रकल्पाच्या घोडाझरी उजव्या कालव्याच्या बांधकामासाठी जिल्हाधिकारी यांच्या अध्यक्षतेखालील समितीने भुसंपादन करावयाच्या जमिनीचे मुल्यांकन करून दर निश्चित करून दिले आहेत, त्यानुसार प्रत्येक मौजामध्ये अस्तित्वात असलेले सरळ खरेदीचे व्यवहार व रेडी रेकनरचे दर यापैकी जे जास्त असतील ते दर आकारगटाप्रमाणे निश्चित करून दिले आहेत , त्या दरांना जिल्हाधिकारी स्तरावर गठीत समितीने मान्यता दिली आहे, या नियमानुसार भुसंपादन खरेदी विक्रीचे व्यवहार होत आहेत . जर जमीन सुपीक आणि बारमाही ओलिताखाली असेल तर त्यानुसार जमिनीचा आकारगट महसूल विभाग ठरवते व त्यानुसार दर निश्चित होतो, ही प्रक्रिया जवळपास पूर्ण झाली आहे, ऑर्डर पास झाल्या आहेत अशी माहिती बैठकीत देण्यात आली,यात आता प्रभावक्षेत्रातील ज्या गावात भुसंपादनाची प्रक्रिया बाकी आहे त्या गावात भुसंपादन करताना जमीनधारकांना आवश्यक ते सहकार्य करून हा प्रकल्प तातडीने पूर्ण करावा, असे श्री. पटोले यांनी यावेळी सांगितले.
