आपत्ती व्यवस्थापन, मलेरिया नियंत्रण व आरोग्य विषयक उपाययोजनांचा आढावा

गडचिरोली,दि.07 : जिल्हाधिकारी अविश्यांत पंडा यांनी आज धानोरा तालुक्यात भेट देत आपत्ती व्यवस्थापन, मलेरिया नियंत्रण, राष्ट्रीय महामार्ग व महसूल यंत्रणा आणि आरोग्य विषयक उपाययोजनांचा आढावा घेतला. पावसाळी काळात तालुक्यातील प्रशासनाच्या विविध यंत्रणांना अधिक सक्रिय व सजग राहण्याच्या सूचना त्यांनी दिल्या.
तहसील कार्यालय धानोरा येथे आयोजित आढावा बैठकीत सहायक जिल्हाधिकारी तथा उपविभागीय अधिकारी रणजित यादव, तहसिलदार आम्रपाली लोखंडे तसेच तालुकास्तरीय अधिकारी उपस्थित होते.
पूरप्रवण गावांसाठी नवसंजीवनी योजनेतून धान्य पोहोचले का याची चौकशी 
मुसळधार पावसामुळे निर्माण होणाऱ्या पूर परिस्थितीचा विचार करता, पूराच्या काळात संपर्क तुटणाऱ्या
गावांसाठी ;नवसंजीवनी योजना; अंतर्गत आवश्यक धान्य व औषधी उपलब्ध झाले का याबाबत जिल्हाधिकारी
पंडा यांनी अधिकाऱ्यांकडे विचारणा केली. आपत्ती व्यवस्थापण यंत्रणेने सजग राहण्याचे व पूरप्रवण ठिकाणी
संभाव्य धोका निर्माण झाल्यास तातडीने वरिष्ठ प्रशासनाला कळविण्याचे निर्देश त्यांनी दिले.
मलेरिया प्रतिबंध व स्वच्छतेवर भर
पावसाळी कालावधीत मलेरिया व इतर साथीच्या आजारांचा प्रादुर्भाव टाळण्यासाठी आरोग्य विभागाने
आवश्यक प्रतिबंधात्मक उपाययोजना कराव्यात, अशी सूचना त्यांनी केली. पावसाळ्यात ठिकठिकाणी ब्लिचिंग
पावडरचा वापर करून परिसराची स्वच्छता राखणे, नागरिकांच्या आरोग्याची काळजी घेणे, ओलसर
परिसरात डासांचे निर्मूलन करणे आदी बाबींचे काटेकोर पालन करण्याचे त्यांनी सांगितले.
राष्ट्रीय महामार्गाची पाहणी
धानोरा तालुक्यातून जाणाऱ्या राष्ट्रीय महामार्गाच्या स्थितीकडे लक्ष वेधत जिल्हाधिकाऱ्यांनी नागरिकांची
गैरसोय टाळण्यासाठी तातडीने डागडुजी करण्याचे निर्देश दिले. जिल्ह्यातील राष्ट्रीय महामार्गासंबंधात
नागरिकांच्या तक्रारी असून महामार्गाची दुरूस्ती व यासंबंधातील समस्या सोडविण्यासाठी महामार्ग
प्राधिकरणाद्वारे गडचिरोली येथे किमान एका अधिकाऱ्याची नेमणूक करण्यात यावी, अशा सूचना त्यांनी
राष्ट्रीय महामार्गाच्या मुख्यालयाशी दूरध्वनीवरून संपर्क साधून केली.
आश्रमशाळांमधील सुविधांची तपासणी

जिल्हाधिकाऱ्यांनी धानोरा तालुक्याील सोडे येथील आदिवासी शासकीय आश्रमशाळा व मुलींचे वसतीगृहाला
भेट देऊन तेथील व्यवस्थेची पाहणी केली. विद्यार्थ्यांच्या अभ्यास, पोषण आणि सुविधा याबाबत माहिती
घेतली. तसेच अशा शाळांमध्ये नाविन्यपूर्ण काय उपक्रम राबविता येतील याविषयी चर्चा केली.
शासकीय इंग्रजी माध्यम आश्रम शाळा व एकलव्य निवासी शाळेची पाहणी
या दौऱ्यादरम्यान शासकीय इंग्रजी माध्यम आश्रम शाळा गडचिरोली व सेमाना येथील एकलव्य निवासी
शाळेचीही त्यांनी पाहणी केली. येथे विद्यार्थ्यांसाठी उपलब्ध असलेल्या शैक्षणिक व निवासी सुविधांचा आढावा
घेतला आणि गुणवत्तापूर्ण शिक्षणासोबतच विद्यार्थ्यांच्या सर्वांगीण विकासासाठी उपाययोजना राबवण्याचे
सांगितले.

गोंदिया, दि. ७ : तिरोडा तालुक्यातील मौजा-कवलेवाडा येथे आज दुपारी १२ वाजता झालेल्या दुर्घटनेत एक घराचे छत कोसळल्याची घटना घडली. बुधाराम दूधबरैया यांचे राहते घर पावसामुळे कमकुवत झाले होते. परिणामी, आज अचानक घराचे छत पूर्णतः कोसळले.सुदैवाने या घटनेत कोणतीही जीवितहानी झाली नाही. मात्र, घराचे मोठ्या प्रमाणात नुकसान झाले आहे. स्थानिक प्रशासनाने घटनास्थळी भेट देऊन पाहणी केली.सततच्या पावसामुळे गावातील इतर घरांनाही धोका निर्माण होऊ शकतो, नागरिकांनी काळजी घ्यावी, असे आवाहन ग्रामपंचायतीमार्फत करण्यात आले आहे.

गोंदिया : रायपूरकडून – नागपूरकडे जाणाऱ्या आझाद हिंद रेल्वेगाडीच्या चाकातून अचानक धूर निघू लागले. ही बाब प्रवाशांच्या लक्षात येताच एकच तारांबळ उडाली. त्याचबरोबर गंगाझरी रेल्वे स्टेशन जवळ असल्याने यंत्रणाही सतर्क झाली. आझाद हिंद एक्स्रपेसला गंगाझरीत थांबविण्यात आली. दरम्यान गाडीबाहेर पडण्यासाठी प्रवाशांमध्ये एकच धावपळ सुटली. यांत्रिकी विभागाने धूर निघत असलेल्या गाडीची पाहणी केली असता ब्रेक लाईनच्या घसरणामुळे धुर निघत असल्याचे समोर आले. यामुळे काही काळ थांबलेला प्रवास पुन्हा सुरू झाला. ही घटना (ता. ६) दुपारी ३ ते ४ वाजता सुमारासची आहे.
गाडी क्र. १२१३० हावडा-पुणे आझाद हिंद एक्सप्रेस नेहमीप्रमाणे गोंदिया रेल्वे स्थानकावर पोहोचली. ठराविक वेळेनुसार नागपूरच्या प्रवासासाठी फलाट क्र. ३ वरून रवाना झाली. अवघ्या १५ किमी अंतराचा प्रवास दरम्यान धावत्या रेल्वेगाडीच्या चाकातून धुर निघताना दिसून आले. ही बाब काही प्रवाशांच्या निदर्शनास आली. धुर वाढत चालल्याने प्रवाशांमध्ये एकच खळबळ उडाली. याची माहिती प्रवाशांकडून रेल्वे गार्ड व पायलट देण्यात आली. सुरक्षेच्या दृष्टीकोनातून काही अंतरावर असलेल्या गंगाझरी रेल्वे स्थानकाला याची माहिती देवून सतर्क राहण्याच्या सुचना
देण्यात आल्या. रेल्वेगाडी पोहोचताच रेल्वे प्रशासन स्थानकावर सज्ज झाले. तर दुसरीकडे रेल्वेगाडीतून बाहेर पडण्यासाठी प्रवाशांची मोठी घाईगर्दी दिसून आली. पाहता-पाहता आझाद हिंद एक्सप्रेसने प्रवास करणारे सर्व प्रवासी बाहेर पडले. त्यातच रेल्वे प्रशासनाने देखील धुर निघत असलेल्या डब्ब्यांची तपासणी करणे सुरू केले. दरम्यान एका डब्ब्याच्या ब्रेक लाईनरमधून होत असलेले घर्षनामुळे धूर निघत असल्याचे समोर आले. यामुळे रेल्वे प्रशासनासह प्रवाशांनी सुटकेचा श्वास घेतला. तुर्त यांत्रिकी विभागाच्या माध्यमातून समस्या मार्गी लावण्यात आली. यानंतर आझाद हिंद एक्सप्रेसचा पुढील प्रवास सुरळीत झाला. जवळपास २० ते २५ मिनिटे रेल्वेगाडीतून निघत असलेला धूर आणि भितीपूर्ण वातावरणातून निर्माण झालेला थरार सर्वांनी अनुभवला.

आता २० जुलै पर्यंत होणार धान खरेदी!!

आमदार राजकुमार बडोले,विनोद अग्रवाल,विजय रहागंडाले व परिणय फुके यांनी मुख्यमंत्र्याकडे केली होती मागणी

गोंदिया दि. ७ जुलै २०२५: गोंदिया आणि भंडारा जिल्ह्यातील शेतकऱ्यांच्या उद्दिष्टा अभावी रखडलेल्या धान खरेदीच्या समस्यांकडे लक्ष वेधणाऱ्या अर्जुनी मोरगाव विधानसभा क्षेत्राचे आमदार आणि माजी सामाजिक न्यायमंत्री राजकुमार बडोले तसेच आमदार विजय रहागंडाले,विनोद अग्रवाल,परिणय फुके यांनी मुख्यमंत्र्याकडे निवेदनातून केलेल्या मागणीला यश आले आहे. महाराष्ट्र विधानसभेच्या पावसाळी अधिवेशन २०२५ मध्ये आमदार बडोले यांनी उपस्थित केलेल्या औचित्याच्या मुद्द्याला व इतर आमदारांच्या निवेदनाला प्रतिसाद देत राज्य सरकारने धान खरेदीचे उद्दिष्ट २० लाख क्विंटलने वाढवण्याचा महत्त्वपूर्ण निर्णय घेतला आहे. सोबतच धान खरेदी तातडीने सुरू करण्यात यावी असे आदेशात नमूद करण्यात आले आहे. हो खरेदी २० जुलै २०२५ पर्यंत सुरू राहील.

आ. बडोले यांनी २ जुलै २०२५ रोजी विधानसभेत गोंदिया आणि भंडारा जिल्ह्यातील शेतकऱ्यांच्या अडचणी मांडल्या होत्या. यावर्षी उन्हाळी धानाचे मोठ्या प्रमाणात उत्पादन झाले असताना खरेदी प्रक्रिया अर्धवट थांबवल्याने शेतकऱ्यांचे धान शिल्लक राहिले होते. यामुळे धान खराब होण्याची भीती आणि आर्थिक अडचणींचा सामना शेतकऱ्यांना करावा लागत होता. त्यांनी धान खरेदीची मर्यादा वाढवण्याची मागणी केली होती. https://www.berartimes.com/vidarbha/212381/ धान खरेदीचे उद्दिष्ट वाढवून तत्काळ चुकारे द्या – आमदार विजय रहांगडाले यांची मुख्यमंत्र्यांकडे मागणी

शेतकऱ्यांना आशेचा किरण
गोंदिया आणि भंडारा हे धान उत्पादनासाठी प्रसिद्ध जिल्हे असून, येथील शेतकऱ्यांचे उत्पन्न प्रामुख्याने धान पिकावर अवलंबून आहे. धान खरेदीची मर्यादा वाढवण्याच्या निर्णयामुळे शेतकऱ्यांना मोठा दिलासा मिळाला आहे. “हा निर्णय शेतकऱ्यांच्या हिताचा आहे. यामुळे पेरणीच्या हंगामात शेतकऱ्यांना स्थैर्य मिळेल,” असे आ. बडोले यांनी सांगितले.

शेतकऱ्यांच्या हितासाठी सरकारने घेतलेल्या या महत्त्वपूर्ण निर्णयाबद्दल गोंदिया जिल्ह्यातील भात उत्पादक शेतकऱ्यांनी सरकार आणि आमदार विनोद अग्रवाल यांचे आभार मानले आहेत.

गोंदिया,दि.०७ः राज्यसरकारने लागू केलेला पहिलापासूनचा हिंदी भाषा सक्तीचा शासन निर्णय रद्द केल्याने मराठी भाषेचा विजय मनसेचा व शिवसेना (उबाठा)चा कार्यकर्त्यांनी मनोहर चौकातील छत्रपती शिवाजी महाराजांच्या प्रतिमेसमोर एकत्र येत मिठाई वाटून आनंदोस्तव साजरा केला.इयत्ता पहिलीपासून तीन भाषा शिकवण्याच्या नावाखाली हिंदी भाषा लादण्याचा निर्णय राज्य सरकारने घेतला होता, सरकारने या संबंधातील २ जीआर रद्द केले.

एकीकडे नुकतंच मराठी भाषेला अभिजीत भाषेचा दर्जा देण्यात आला, आणि त्या पाठोपाठ काही प्रदेशात बोलल्या जाणाऱ्या हिंदी ची सक्ती करणे म्हणजे भाषेचे महत्व कमी करण्याच्या प्रयत्न सरकारचा चालला होता. याचा प्रखर विरोध करीत महाराष्ट्र नवनिर्माण सेनेने आवाज उठवला, तसा पाठपुरावा सरकारकडे करण्यात आला.यावेळी मोर्चा काढण्याचे ठरविल्यानंतर अनेक राजकीय पक्ष संघटनांनी याला पाठिंबा देत मोर्चात सहभागी होण्याची तयारी दाखवली.सरकारने याच मोर्चाचा धसका घेत हिंदी भाषा सक्तीचे दोन्ही शासन निर्णय रद्द केले.यावेळी महाराष्ट्र नवनिर्माण सेनेतर्फे आणि शिवसेना उबाठा तर्फे मराठी जनतेचे अभिनंदन करण्यात आले. मराठीचा विजय झाल्याचा जल्लोष मनसे तर्फे मनोहर चौकात छत्रपती शिवाजी महाराज यांच्या प्रतिमेला माल्यर्पण करून अभिवादन करण्यात आले तसेच फटाक्यांची आतिषबाजी व मिठाई वाटप करून साजरा करण्यात आला. यावेळी महाराष्ट्र नवनिर्माण सेनेचे माजी तालुका अध्यक्ष सुरेश ठाकरे, गोंदिया शहर अध्यक्ष सुरेश (नानु) चौधरी, शिवसेना(उबाठा) शहर प्रमुख राजेश कनोजिया, मनसेचे माजी शहर संघठक क्षितिज वैद्य, शहर उपाध्यक्ष सुमित कावळे, शहर उपाध्यक्ष डिलेश उईके, शहर सचिव माधव बनकर, शाखा अध्यक्ष कार्तिक राऊत, विशाल ढेबे व तसेच शिवसेनेचे युवासेना उपजिल्हाधिकारी विक्की बोमचरे, शहराधिकारी शुभम सहारे, संघटक मुकेश दहीकर, अशोक लंजे, संतोष सहारे प्रामुख्याने मोठ्या संख्येने महाराष्ट्र सैनिक व शिवसैनिक उपस्थित होते.

तिरोडा,दि.०७ः तालुक्यातील सतोना बोपेसर मार्गावर आज सकाळी ७ जुर्ले रोजी सकाळच्या सुमारास झाडावर वीज पडल्याने धावक्या दुचाकीवर झाड पडल्याने दुचाकीवरील वडीलाचा मृत्यू तर मागे बसलेला शाळकरी मुलगा गंभीर जखमी झाल्याची घटना घडली.जीवचंद यादोराव बिसेन (४६) असे मृतकाचे तर चिराग जीवचंद बिसेन (१६) असे गंभीर जखमी मुलाचे नाव आहे.
जीवचंद बिसेन हे वडेगाव येथील रहिवासी असून मुलगा चिराग यास शाळेत सोडण्यासाठी दुचाकी क्रमांक एमएच ३५ एपी ९३७० ने तिरोडा कडे जात होते.यावेळी अचानक सातोना -बोपेसर गावाजवळ रस्त्याच्या कडेवरील करंजी या झाडावर वीज कोसळल्याने झाड रस्त्याववर धावत असलेल्या दुचाकीवर कोसळला.या झाडाखाली दबल्याे जीवचंद बिसेन यांचा जागीच मृत्यू झाला तर चिराग हा गंभीर जखमी झाला.जखमी मुलावर गोंदिया येथील एका खाजगी रुग्णालयात उपचार सुरु आहे.

अर्जुनी मोरगाव -जगातील समस्त मानवसमूहाला शांती, करुणा व अहिंसेचा उपदेश देणारे तिबेटियन धम्मगुरु दलाई लामा हेच खरे सत्य योद्धा आहेत. हिंसात्मक मार्गाला थारा न देता, स्वतःची धर्म संस्कृती कायम ठेवून अहिंसात्मक मार्गाने तिबेटियन बांधवांच्या अधिकारासाठी सातत्याने आवाज उठवत आहेत. त्यांची करुणामय शिकवणूक हीच मानवाच्या कल्याणासाठी निश्चितच सार्थकी ठरणारी आहे. तिबेटियन बांधवांविषयी आम्हाला सहानुभूती आहे.
सर्वांशी मैत्रीपूर्ण संबंध कायम ठेवून शांती, करुणा व अहिंसेचा मूलमंत्र देणारे दलाई लामा शांतिदूत आहेत, असे प्रतिपादन जिल्हाधिकारी प्रजीत नायर यांनी केले.
तालुक्यातील तिबेटियन वसाहतमधील तिबेट बांधवांच्या वतीने गोठणगाव स्थित संबोता तिबेटियन स्कूल येथे आयोजित तिबेटियन धम्मगुरू दलाई लामा यांच्या ९० व्या जन्मदिन कार्यक्रमात ते बोलत होते. प्रमुख पाहुणे म्हणून परिविक्षाधीन आयएएस अधिकारी साई किरण, उपविभागीय अधिकारी वरुण शहारे, तहसीलदार अनिरुद्ध कांबळे, तिबेट भारत मैत्री संघ भंडाराचे अमृत बनसोड, पोलिस उपनिरीक्षक घनश्याम रोहनकर, शुभम नवले उपस्थित होते. दलाई लामा यांच्या ९० व्या जन्मदिवसाचे औचित्य साधून जिल्हाधिकारी नायर यांच्या हस्ते केक कापून जन्मदिवस मोठ्या उत्साहात साजरा करण्यात आला.