साकोली,दि.25: भंडारा जिल्ह्यात नवोदय विद्यालय तात्काळ सुरू करण्यात यावे, अशी मागणी साकोलीवासीयांनी मुख्यमंत्री देवेंद्र फडणवीस यांना तहसिलदारामार्फत दिलेल्या निवेदनातून केली निवेदन दिले.
भंडारा-गोंदिया जिल्ह्यासह संयुक्त असताना साकोलीमध्ये नवोदय विद्यालय होते. जिल्ह्याचे विभाजन करून गोंदिया जिल्ह्याची निर्मिती करण्यात आली, त्याचवेळी नवेगावबांध जिल्हा गोंदिया येथे नवोदय विद्यालय हलविण्यात आले. महाराष्ट्रातील प्रत्येक जिल्ह्यांना स्वतंत्रपणे नवोदय विद्यालय आहेत. मात्र भंडारा जिल्ह्याच्या विभाजनापासून या जिल्ह्यात नवोदय विद्यालयाची स्थापनाच करण्यात आली नाही.
शासनाच्या निर्णयाप्रमाणे या शैक्षणिक सत्रापासून वर्ग ५ ते ८ मध्ये शिकत असलेल्या मुलांची नवोदय विद्यालयाच्या प्रवेशासाठीची स्पर्धा परीक्षा होणार आहे. परंतु फक्त गोंदिया जिल्ह्यातील नवोदय विद्यालयाच्या मंजुर तुकडी संख्याच्या आधारे भंडारा व गोंदिया स्पर्धा परीक्षा देणार्‍या मुलांचा निकाल लावला जातो. त्यामुळे बरीच गुणवंत विद्यार्थी नवोदय विद्यालयात प्रवेश मिळाल्यापासून वंचित राहतात. त्यामुळे इतर शाळा व महाविद्यालयमध्ये मुलांचे शैक्षणिक नुकसान होत आहे. भंडारा जिल्ह्यातील साकोली, लाखनी व लाखांदूर तालुक्यात आदिवासी बहुल व नक्षलग्रस्त तीन तालुके आहेत. नवीन निर्मित पालघर जिल्ह्यासह आदिवासी बहुल नंदुरबार व धुळे जिल्ह्यातही शासनाच्या वतीने नवोदय विद्यालयाची निर्मिती केली आहे. भंडारा जिल्ह्यातील शैक्षणिक गुणवंत असलेल्या मुलांच्या पुढील प्रगतीसाठी भंडारा जिल्ह्यातही नवोदय विद्यालयाची स्थापना होणे आवश्यक आहे. शिष्टमंडळामध्ये एन.एम. घोडीचोर, कैलास गेडाम, फिरोज खान, शब्बीर पठान, विजय रामटेके, किशोर नंदुरकर, जयश्‍वर मेश्राम, प्रल्हाद रामटेके उपस्थित होते.

चंद्रपूर : राज्य शासनाकडून आरोग्य सेवा बळकट करण्यासाठी प्रयत्न सुरू आहेत. मात्र रिक्त पदे भरण्याकडे दुर्लक्षच केले जात आहे. जिल्ह्यातील ३ उपजिल्हा रूग्णालये, १० ग्रामीण रूग्णालये व जिल्हा सामान्य रूग्णालयात वर्ग १, वर्ग २, वर्ग ३ व वर्ग ४ संवर्गातील तब्बल ३०७ पदे रिक्त आहेत. त्यामुळे आरोग्य सेवा पुरती खिळखिळी झाल्याचे दिसून येते.

चंद्रपूर जिल्ह्यात ५८ प्राथमिक आरोग्य केंद्र, ३३९ प्राथमिक आरोग्य उपकेंद्र, ९ अ‍ॅलोपॅथीक दवाखाने, १० आर्युवेदीक दवाखाने, ३ उपजिल्हा रूग्णालये, १० ग्रामीण रूग्णालये आहेत. यापैकेी ३ उपजिल्हा रूग्णालये, १० ग्रामीण रूग्णालये व जिल्हा सामान्य रूग्णालयामध्ये चारही संवर्गातील ९२० पदे मंजूर आहेत. यातील केवळ ५१३ पदे भरण्यात आली असून ३०७ पदे गेल्या कित्येक वर्षांपासून रिक्त आहेत. तर आरोग्य केंद्र व उपकेंद्रांचीही हीच अवस्था आहे.वरोरा, चिमूर व मूल या तीन उपजिल्हा रूग्णालयात वर्ग १ चे ३ पदे मंजूर असून एकच पद भरण्यात आले आहे. वर्ग २ च्या २९ पदांपैकी ११ पदे रिक्त आहेत. वर्ग ३ च्या ९५ पदांपैकी ३४ तर वर्ग ४ च्या ४६ पदांपैकी २५ पदे रिक्त आहेत. तर दहा ग्रामीण रूग्णालयात वर्ग १ चे १० पदे मंजूर असून ९ पदे रिक्त आहेत. वर्ग २ च्या ३१ पदांपैकी ६ पदे रिक्त आहेत. वर्ग ३ च्या १५४ पदांपैकी ४४ तर वर्ग ४ च्या ७० पदांपैकी २० पदे रिक्त असून ही पदे भरण्याची मागणी नागरिकांकडून होत आहे. अत्यंत महत्त्वाचे रूग्णालय समजल्या जाणाऱ्या चंद्रपुरातील जिल्हा सामान्य रूग्णालयात तब्बल १६६ पदे रिक्त आहेत. या रूग्णालयात वर्ग १ च्या २० पदांपैकी १० पदे रिक्त आहेत. वर्ग २ च्या ३७ पदांपैकी १ रिक्त, वर्ग ३ च्या २७९ पदांपैकी ८५ पदे रिक्त असून वर्ग ४ संवर्गातील १७६ मंजूर पदांपैकी तब्बल ७० पदे रिक्त आहेत.

भंडारा : जंगलातून भटकलेल्या एका हरीणाचा भरधाव अज्ञात वाहनाच्या धडकेत मृत्यू झाला. ही घटना शुक्रवारला दुपारी २ वाजताच्या सुमारास भंडारा-रामटेक मार्गावरील खुर्शीपार-टवेपारनजीक घडली.

माहितीनुसार, भंडारा-रामटेक मार्गावरील खुर्शीपार हा परिसर जंगलाला लागून आहे. या मार्गाने पियुष घाटोळे हा तरूण दुचाकीने खातकडे जात होता. काही अंतरावर त्यांना मोठा आवाज आला. त्यानंतर त्यांनी मागे वळून पाहिले असता खुर्शीपार मार्गावर एक हिरन तडफडत असल्याचे दिसून आले. त्यानंतर त्यांनी या हरीणाला पाणी पाजले. जखमा जास्त असल्यामुळे या हरीणाचे तडफडणे बंद झाले नव्हते. काही वेळातच या हरीणाचा मृत्यू झाला. याची माहिती त्यांनी भंडारा वनविभागाला दिली. माहिती मिळाल्यानंतर वनकर्मचारी गौरी नेवारे हे ताफ्यासह घटनास्थळी पोहोचले. त्यानंतर त्यांनी घटनास्थळाचा पंचनामा करून या मृत हरीणाला घेऊन गेले. त्यानंतर पशुवैद्यकीय रूग्णालयात शवविच्छेदन करून मृतदेह पुरण्यात आला.

गोंदिया : खा. प्रफुल्ल पटेल यांच्या स्थानिक विकास निधीतून गोंदिया शहराच्या प्रभाग-१७ श्रीनगर येथे दिलीप तुळसकर यांच्या घरामागे नाली व सिमेंट रस्ता बांधकामाचे भूमिपूजन करण्यात आले. प्रभागातील नागरिकांच्या निवेदनावर नगरसेविका आशा पाटील यांच्याद्वारे सदर कार्य खा. प्रफुल्ल पटेल यांच्या निधीतून मंजूर करवून घेतली.
भूमिपूजनप्रसंगी पक्षाचे जिल्हा अध्यक्ष विनोद हरिणखेडे, शहर अध्यक्ष शिव शर्मा, प्रदेश प्रतिनिधी देवेंद्रनाथ चौबे, नगरसेवक अशोक गुप्ता, माजी नगराध्यक्ष आशा पाटील, नगरसेवक मनोहर वालदे, अशोक शहारे, रवी मुंदडा, राजू एन. जैन, विष्णू शर्मा, प्रीतपाल होरा, माधवदास खटवानी, गुड्ड बिसेन, विनोद पाटील, रौनक ठाकूर, सोनू राय, विनित शहारे, दिलीप तुलसकर, परसराम सावरकर, आसाराम मोहनकर, गोविंदराव मेंढे, राष्ट्रवादी काँग्रेसचे कार्यकर्ते व स्थानिक नागरिक उपस्थित होते.

तिरोडा : स्थानिक तहसील कार्यालय येथे संजय गांधी निराधार योजनेच्या आढावा बैठकीमध्ये आ. विजय रहांगडाले यांनी तालुक्यातील संजय गांधी निराधार योजना व श्रावण बाळ योजनांचा आढावा घेतला. राष्ट्रीय कुटुंब अर्थसहाय्य योजनेंतर्गत लाभार्थ्यांना धनादेश वाटप करण्यात आले. या वेळी संजय गांधी निराधार योजनेचे अध्यक्ष उमाकांत हारोडे तसेच सदस्य भाऊराव कठाणे, मनोहर बुद्धे, उत्तम कुकडे, दिनेश पटले, राजू भांडारकर, उपविभागीय अधिकरी सुनील सूर्यवंशी, तहसीलदार रविंद्र चव्हाण, गटविकास अधिकारी मानकर, तालुका कृषी अधिकारी पोटदुखे, नायब तहसीलदार सतिश मासाळ, कुंभरे उपस्थित होते.