*जलयुक्त शिवार कामांचा आढावा
*1 सप्टेंबर पासून जलयुक्त कामांचे ऑनलाईन छायाचित्र
*1077 गावांमध्ये 21 हजार 599 कामे पूर्ण
*विभागात 1 लक्ष 31 हजार 854 टीसीएम पाणीसाठा
*माजी मालगुजारी तलावांच्या पुनरुज्जीवनाला प्राधान्य
*सिंचन क्षमता वाढेल अशीच कामे घ्या

गोंदिया/नागपूर दि. 19 : जलयुक्त शिवार अभियाना अंतर्गत कामांची निवड करतांना शेतीसाठी प्रत्यक्ष संरक्षित सिंचनाचा लाभ होईल अशाच कामांना प्राधान्य देवून कालबद्ध कार्यक्रमानुसार कामे पूर्ण करा, अशा सूचना राज्याचे जलसंधारण मंत्री प्रा. राम शिंदे यांनी गुरुवारी नागपूर विभागातील जलयुक्त शिवार अभियान कामांचा आढावा घेतला त्यावेळी अधिकाऱ्यांना मार्गदर्शन करतांना दिल्या. आबासाहेब खेडकर सभागृहात आयोजित बैठकीस प्रमुख पाहुणे म्हणून उपस्थित ते होते. जिल्हा परिषदेच्या अध्यक्षा श्रीमती निशाताई सावरकर, आमदार सर्वश्री सुनील केदार, डॉ.आशिष देशमुख, समीर मेघे, प्रा. अनिल सोले, सुधाकर देशमुख, राजेश उर्फ बाळा काशीवार, समीर कुणावार, चरण वाघमारे, विभागीय आयुक्त अनूप कुमार, जलसंधारण सचिव पुरुषोत्तम भापकर, कृषी आयुक्त विकास देशमुख, संचालक एस. एस. जाधव, मुख्य अभियंता शिवकुमार गिरी, महात्मा गांधी ग्रामीण रोजगार हमी योजनेचे आयुक्त अभय महाजन, अपर आयुक्त हेमंत बसेकर, उपसचिव किशोर पठारे, नारायण सराफ आदी अधिकारी उपस्थित होते.
जलयुक्त शिवार अभियान कार्यक्रमामुळे सातत्याने टंचाईग्रस्त गावांमध्ये पिण्याच्या पाण्याची टंचाई दूर करण्यासोबत शेतीला संरक्षित सिंचनाचा लाभ मिळण्यासाठी तसेच कायम टंचाई दूर करण्यासाठी आवश्यक असलेली कामे प्राधान्याने पूर्ण करण्याच्या सूचना करताना प्रा.राम शिंदे म्हणाले की, अभियानाअंतर्गत नागपूर विभागात मागील वर्षी 1077 गावांमध्ये 21 हजार 599 कामे पूर्ण झालेली आहेत. यावर्षासाठी 904 गावांमध्ये 2307 कामे पूर्ण झाली असून 914 कामे प्रगतीपथावर असून यासाठी 316 कोटी रुपयाचा निधी उपलब्ध देण्यात आल्याची माहिती यावेळी त्यांनी दिली.
जलयुक्त शिवार अभियानामध्ये मागीलवर्षी अपूर्ण राहिलेली कामे डिसेंबर अखेर पर्यंत पूर्ण करावी तसेच यावर्षी प्रस्तावित केलेली संपूर्ण कामे याचवर्षी पूर्ण होतील. यादृष्टीने नियोजन करण्याचा सूचना करताना जलसंधारण मंत्री पुढे म्हणाले की, अपूर्ण कामांबद्दल विभागीय आयुक्त व जिल्हाधिकारी यांनी वेळेत काम पूर्ण होईल याची खबरदारी घ्यावी.
जिल्ह्यात जलयुक्त अभियानाअंतर्गत झालेल्या कामांसंदर्भातील संपूर्ण छायाचित्र एमआरसॅ या प्रणालीच्या माध्यमातून 1 सप्टेंबरपासून ऑनलाईन टाकणे बंधनकारक करण्यात आले असून जीओ टॅगींगच्या माध्यमातून झालेल्या कामांचा दर्जा व योग्य वेळेत झाले किंवा नाही याची माहितीही देण्यात येणार असल्याचे सांगतांना ते पुढे म्हणाले की, नागपूर विभागात मागील वर्षी 43 कोटी रुपयाचा निधी शिल्लक असून हा निधी खर्च करण्यासाठी कामाच्या वेळापत्रक तयार करा, असेही त्यांनी यावेळी सांगितले.

जलयुक्त शिवार कार्यक्रमामध्ये लोकसहभागातून वाढविण्यासोबतच विविध उद्योगाकडून मिळणाऱ्या सीएसआर निधीमधील कामे ही संबंधित प्रकल्पाच्या क्षेत्रांतर्गत वापरण्याची तरतूद केल्यास या अभियानाला चालना मिळणार असल्याचे सांगतांना पालकमंत्री चंद्रशेखर बावनकुळे म्हणाले की विदर्भ सिंचन विकास कार्यक्रम अंतर्गत 3 हजार 250 कोटी रुपयांच्या प्रकल्पासाठी 3 वर्षांची मुदतवाढ मिळणे आवश्यक आहे.जलयुक्त शिवार अभियानाच्या प्रभावी व कालबद्ध अंमलबजावणीसाठी जिल्ह्यात असलेल्या सर्व यंत्रणाकडून कामे पूर्ण केल्यास कामे त्वरित पूर्ण होतील, असेही पालकमंत्री चंद्रशेखर बावनकुळे यांनी सांगितले.

नागपूर विभागातील माजी मालगुजारी तलावाच्या पुनरुज्जीवनाचा महत्त्वाकांक्षी कालबद्ध कार्यक्रम राबविण्याचा निर्णय घेण्यात आला आहे. विभागात असलेल्या 6 हजार 489 मालगुजारी तलावापैकी 1 हजार 414 तलावाच्या पुनरुज्जीवनासाठी 207 कोटी रुपयांचा आराखडा तयार करण्यात आला असून यासाठी शासनाने 150 कोटी रुपयांची तरतूद उपलब्ध करुन दिली आहे. या तलावाच्या पुनरुज्जीवनामुळे सरासरी 1 लक्ष हेक्टर सिंचन क्षमता निर्माण होईल असेही यावेळी विभागीय आयुक्त अनूप कुमार यांनी सांगितले.

जलसंधारण विभागाचे सचिव पुरुषोत्तम भापकर यांनी नागपूर विभागात जलयुक्त शिवार अंतर्गत चांगले काम झाले असून मागील अपूर्ण कामे प्राधान्याने पूर्ण करुन यावर्षीची कामे निर्धारित वेळेत पूर्ण करा. नदी पुर्नरजीवन कार्यक्रमाअंतर्गत विभागाला 22 कोटी रुपयाच्या निधीची आवश्यकता असून तातडीने 11 कोटी रुपये उपलब्ध करुन देण्यात आले आहे. विभागात शेतकऱ्याच्या मागणीनुसार 11 हजार विहिरींचा कार्यक्रम प्रस्तावित असून नरेगा अंतर्गत 10 हजार कोटीचे कामे राज्यात घेण्यात येणार असल्याचे त्यांनी सांगितले.

प्रारंभी विभागीय आयुक्त अनूप कुमार यांनी स्वागत करुन प्रास्ताविकात नागपूर विभागात मागील वर्षी व यावर्षी जलयुक्त शिवार अभियानात नागपूर विभागात 1 हजार 981 गावांची निवड करण्यात आली होती. मागील वर्षाचे अपूर्ण व यावर्षी सूचविण्यात आलेल्या एकूण 28 हजार 740 कामांसाठी 750 कोटी रुपयाचा आराखडा तयार करण्यात आला आहे. यावर्षी 3 हजार 216 कामे हाती घेण्यात आली होती. त्यापैकी 3 हजार 207 कामे पूर्ण झाली आहेत.
‘मागेल त्याला शेततळे’ या कार्यक्रम अंतर्गत 8 हजार 474 च्या उद्दिष्टापैकी 8 हजार 882 ऑन लाईन अर्ज केले. त्यापैकी 7 हजार 594 कामे सुरु झाली आहेत.
विदर्भातील माजी मालगुजारी तलावांचे पुनरुज्जीवन करण्याचा महत्त्वाचा कार्यक्रम आहे. त्यात नागपूर, चंद्रपूर, वर्धा व गडचिरोली या जिल्ह्यांमध्ये 6 हजार 489 मामा तलाव अस्तित्वात आहे. या तलावातील पूर्ण गाळ काढला तर 1 लक्ष सिंचन क्षेत्र ओलिताखाली येणार असल्याचे त्यांनी सांगितले.
नागपूर विभागाचे जिल्हानिहाय आढावा जिल्हाधिकारी यांनी सादर केला. यावेळी लोकप्रतिनिधींनी जलयुक्त शिवार अभियानाअंतर्गत लोकसहभाग वाढविण्यासाठी तसेच नियोजित वेळात कामे पूर्ण करण्यासाठी लोकप्रतिनिधींना गावनिहाय कामांची माहिती उपलब्ध करुन द्यावी, अशी सूचना केली. भंडारा जिल्ह्याची जलयुक्त शिवार या पुस्तिकेचे विमोचन जलसंधारण मंत्री यांच्या हस्ते यावेळी करण्यात आले.
कार्यक्रमाचे संचालन दिनेश मासुळकर, उपमुख्य कार्यपालन अधिकारी कमलकिशोर फुटाणे व विजयी बोंद्रे यांनी केले. आभार प्रदर्शन उपायुक्त पराग सोमण यांनी मानले. यावेळी नागपूर विभागातील सर्व जिल्हाधिकारी, मुख्य कार्यपालन अधिकारी तसेच विभाग प्रमुख यांनी जलयुक्त शिवार विभागनिहाय सादरीकरण करुन विभाग व जिल्ह्यात सुरु असलेल्या कामांची व प्रगतीची माहिती दिली.

गोंदिया : विदर्भ स्टडी सर्कल गोंदियाच्या वतीने भारतीय प्रशासकीय सेवा (यूपीएससी) उत्तीर्ण डॉ. आमीर सिद्दिकी तसेच विदर्भ स्टडी सर्कलमधून शासकीय सेवेत झेप घेणार्‍या विद्यार्थ्यांच्या पालकांचा सत्कार करण्यात आला.डॉ. आमिर सिद्दिकी यांचा खा. नाना पटोले यांच्या हस्ते शाल, श्रीफळ व स्मृतिचिन्ह देवून सत्कार करण्यात आला.
अध्यक्षस्थानी खा. पटोले होते. अतिथी म्हणून पोलीस अधीक्षक दिलीप भुजबळ, सत्कारमूर्ती डॉ. आमिर सिद्दिकी, पोलीस उपनिरीक्षक पी.एस. देशमुख, अमर वर्‍हाडे, त्रिलोक शेंडे उपस्थित होते. याप्रसंगी मान्यवरांनी, विद्यार्थ्यांनी जास्तीत जास्त परिश्रम घेवून अभ्यास करावा व आपल्या ध्येयाकडे वाटचाल करावी. पुढील यूपीएससी परीक्षेत किमान दहा विद्यार्थी उत्तीर्ण व्हावे व जिल्ह्याचे नाव वाढवावे, असे सांगितले. संचालन विनोद माने यांनी केले. आभार प्रविण माने यांनी मानले.
विदर्भ स्टडी सर्कलच्या वतीने घेण्यात आलेल्या विविध स्पर्धांचे निरीक्षक म्हणून विनोद माने, गोपाल कदम यांनी काम सांभाळले. कार्यक्रमासाठी सुमित कावळे, उषा कठाणे, वैभव खोब्रागडे, सचिन बिजेवार, आशिक बिसेन आदींनी सहकार्य केले

गोंदिया : भंडारा-गोंदिया जिल्ह्यात व्यवसायाच्या निमित्ताने आलेले अल्पशिक्षित स्व. मनोहरभाई पटेल यांनी गोंदिया शिक्षण संस्थेच्या माध्यमातून आदिवासीबहुल भागातील जनतेसाठी शिक्षणाची सोय करून दिली. संपूर्ण आयुष्य स्वत:साठी जगण्यापेक्षा दुसर्‍यांसाठी जगणारे स्व. मनोहरभाई पटेल हे ‘मन के मित’ असल्याचे प्रतिपादन राज्यसभा सदस्य प्रफुल्ल पटेल यांनी केले.
स्व. मनोहरभाई पटेल यांच्या पुण्यतिथीनिमित्त ते स्वत:च्या निवासस्थानी आयोजित कार्यक्रमात बोलत होते.
गोंदिया शिक्षण संस्थेद्वारे संचालित नमाद महाविद्यालयातील राष्ट्रीय सेवा योजनेच्या विद्यार्थ्यांनी प्राचार्य योगेश नासरे यांच्या मार्गदर्शनाखाली रासेयो जिल्हा समन्वयक प्रा. बबन मेश्राम, सहायक कार्यक्रम अधिकारी रवी रहांगडाले यांच्या नेतृत्वात स्व. मनोहरभाई पटेल यांच्या पुण्यतिथीनिमित्त शहरातून शांतात रॅली काढली. त्यानंतर खा. प्रफुल्ल पटेल यांच्या निवासस्थानी गोंदिया शिक्षण संस्थेद्वारे संचालित विविध महाविद्यालयाचे प्राचार्य, प्राध्यापक वर्ग, शिक्षकेतर कर्मचारी, प्रतिष्ठित नागरिक व रासेयोच्या विद्यार्थ्यांनी स्व. मनोहरभाई पटेल यांच्या पूर्णाकृती पुतळ्यासमोर पुष्प अर्पण करून आदरांजली दिली.
खा. पटेल पुढे म्हणाले, स्व. मनोहरभाई पटेल यांचा जन्म सामान्य कुटुंबात झाला. त्यांनी गोंदिया-भंडारा जिल्ह्याच्या विकासासाठी जात, धर्म, पंथ, गरीब, श्रीमंत असा भेद न करता सर्वसामान्यांसाठी शैक्षणिक व सामाजिक क्षेत्रात कार्य केले. त्यांचे कार्य पुढे नेण्याचा वारसा मी चालवित आहे. नवीन पिढीला अशा उपक्रमातून स्व. मनोहरभाई पटेल यांच्या कार्याची जाणीव होते, ही अत्यंत महत्वपूर्ण बाब आहे. त्यांच्या जन्मदिवसानिमित्त शैक्षणिक क्षेत्रात गुणवंत विद्यार्थ्यांचा सत्कार केला जातो.
या वेळी बी.कॉम. अंतिम वर्षाची विद्यार्थिनी भोजवानीने स्व. पटेल यांच्या जीवनकार्यावर प्रकाश टाकला. संचालन प्रा. बबन मेश्राम यांनी केले. आभार प्रा. रवी रहांगडाले यांनी मानले. कार्यक्रमासाठी योगेश खोब्रागडे, खुशाल हरिणखेडे, वामन तुरकर, जागृत सेलोकर, नंदनी कटंगीकार, दिपाली डहाटे, प्रियंका किरणापुरे, भाग्यवंती नागज्योती, शिल्पा राऊत, सोनिया दीप, आकाशा नागपुरे, पायल गजभिये, रोहीत नामुर्ते, शुभम सूर्यवंशी, गौतमी सदोपाच, माधुरी मेश्राम, खुशबू चिखलोंडे, शुभम कोल्हटकर, अश्‍विनी कावळे, रमेश बहेटवार, सरिता खोब्रागडे, सोनल पराते, महिवेश मंसुरी, निशा बोहने आदी रासेयोच्या सेवकांनी सहकार्य केले.