वृत्तसंस्था
पुणे : आम आदमी पक्षाने टेमघर धरणाचे काम निकृष्ट दर्जाचे झाल्याचे समोर आल्यानंतर, पुण्यातील इतर धरणांच्या बांधकामावर प्रश्नचिन्ह उपस्थित केले आहे. तसेच जलसंपदा मंत्री गिरीष महाजन हे बिल्डर अविनाश भोसलेंना वाचवण्याचा प्रयत्न करत असल्याचा आरोप आप नेत्या प्रीती मेनन यांनी केला.
‘आप’ने टेमघरसह वरसगाव आणि पवना धरणांमधून पाण्याची गळती होत असल्याचा दावा पुण्यात पत्रकार परिषद घेऊन केला आहे. श्रीनिवास एंटरप्रायजेस आणि प्रोग्रेसिव्ह एंटरप्रायजेस या कंपन्यांवर गुन्हा दाखल करण्याचे आदेश जलसंपदा मंत्री गिरीष महाजन यांनी दिले. परंतु सोमा एंटरप्रायजेसला त्यांनी यातून वगळले. कारण त्यांना अविनाश भोसलेंना वाचवायचे होते. जेव्हा टेमघरचे काम ‘सोमा’कडून झाले, तेव्हा अविनाश भोसले संचालक होते. या धरणांच्या दुरुस्तीसाठी संबंधीत कंत्राटदारांकडून खर्च वसूल करायला हवा. लोकांचे पैसे पुन्हा वाया घालवायला नको, असे प्रीती मेनन म्हणाल्या.
