– वृत्तसंस्था
बरेली (उत्तर प्रदेश)- मुंबईवर झालेल्या दहशतवादी हल्ल्याचा मुख्य सूत्रधार व जमात-उद-दावा या दहशतवादी संघटनेचा म्होरक्‍या हाफिज सईद हा मुस्लिम नसून दहशतवादाचा प्रसार करणारा आहे, असा फतवा येथील दरगाह अल्ला हजरत सेनिनरीने काढला आहे.
फतव्यामध्ये म्हटले आहे की, ‘भारतामध्ये विविध ठिकाणी झालेल्या दहशतवादी हल्ल्यांमध्ये सईदचा हात आहे. ‘इस्लामिक दहशतवादी‘ हा मुस्लिम असू शकत नाही. इस्लाम व मुस्लिम नावाचा वापर करून तो जगभर दहशतवादी हल्ले घडवून आणत आहे.‘
‘सईद हा इस्लाम व मुस्लिम धर्माचा गैरवापर करत असून, त्याच्यामुळे जगभर नाव खराब होत आहे. दहशतवादाचा तो प्रसार करत आहे. सईदचे इस्लामशी कोणतेही नाते नाही. यामुळे त्याच्या बोलण्याकडे नागरिकांनी दुर्लक्ष करावे. मुस्लिम नागरिकांनी त्याच्या विचारापासून दरू रहावे,‘ असेही फतव्यामध्ये म्हटले आहे.
