गोंदिया,दि.०४ः ग्रामविकासाची सर्वांगीण व शाश्वत अशी विकासाची संकल्पना जी संयुक्त राष्ट्राने प्रस्तावित केली आहे,ती संकल्पना आपल्या अडीच वर्षाच्या ग्रामपंचायत सदस्य व उपसरपंच पदावर राहून सरपंच व इतर सदस्यांच्या मनात उतरवण्याचे सातत्याने प्रयत्न करुनही त्यात असमर्थ ठरल्याने सेवानिवृत्त जिल्हा उपनिबंधक एड.लखनसिंह कटरे यांनी आपल्या ग्रामपंचायत सदस्यत्वासह उपसरपंचपदाचा राजीनामा १ जुर्ले रोजी ग्रामपंचायत सरपंचाना सादर केला आहे.

गोंदिया जिल्ह्यातील आमगाव तालुक्यातील बोरकन्हार ग्रामपंचायत मधील वार्ड क्रं.३ मधून सेवानिवृत्त जिल्हा उपनिबंधक राहिलेले एड.लखनसिंह कटरे यांनी निवडणूक लढली होती.निवडणुकीत विजय मिळाल्यानंतर उपसरपंच पद ही मिळाले.आपण आपल्या गावाचा सर्वांगीण विकासाच्या ध्यास मनात घेत ग्रामपंचायततमधील प्रशासकीय कामकाजात विकासाचा दृष्टीकोन समोर ठेऊन पाऊल ठेवले होते.परंतु आपल्या अडीच वर्षाच्या काळात सरपंच व सदस्यांकडून त्याकरीता पाहिजे तसे सहकार्य न मिळाल्याने प्रशंसनीय व डोळ्यात भरण्यालायक असे कार्य आपणास करता आले नाही,ही बाब स्विकारत आपल्या ग्रामपंचायत सदस्यत्वासह उपसरपंच पदाचा राजीनामा एड.कटरे यांनी दिला.त्यांच्या या राजीनाम्याने ग्रामपंचायत प्रशासनात चांगले व्यक्ति जे शाश्वत विकासाची कास मनात घेऊन जाण्याची इच्छा ठेवतात अशा नागरिकांसमोर एक प्रश्न उभा ठाकला आहे.

गोंदिया : ग्रामपंचायतींचे प्रशासकीय कामकाज कार्यक्षम करण्यासाठी तसेच कार्यपद्धतीत सुधारणा करण्याच्या उद्देशाने ग्राम पंचायतींना आयएसओ मानांकन दिले जाते. यात सेजगाव ग्राम पंचायतीने बाजी मारली असून आयएसओ मानांकन प्राप्त केले आहे. नुकतेच प्रमाणपत्र देवून सेजगाव ग्राम पंचायतीचा सन्मान करण्यात आला.
केंद्र सरकारच्या सूचनांनुसार पंचायत राज संस्थांच्या कारभारात पारदर्शकता आणणे, नागरिकांना विविध प्रशासकीय विभागाअंतर्गत आवश्यक असलेले दाखले मिळण्यासाठी ई-पंचायत प्रकल्प राबवण्यात येत आहे. ग्रामपंचायतींच्या कामकाजात अत्याधुनिक तंत्रज्ञानाचा वापर केला जात आहे. ग्राम पंचायतींमधील कागदपत्रांचे संगणकीकरण करून पेपरलेस ग्रामपंचायतींकडे वाटचाल सुरू आहे. यासाठी ग्रामपंचायतींचे आयएसओ प्रमाणीकरण करून घेतले जात आहे. आयएसओ मानांकन घेण्यासाठी कोणत्या कार्यपद्धतीचा वापर करावा याचे वेळापत्रक निश्चित करून देण्यात आले होते. त्यानुसार राज्य आणि जिल्हा पातळीवर समितीच्या माध्यमातून ग्रामपंचायतींच्या कामकाजाचे मूल्यमापन करून त्यांना मानांकन देण्यात येणार आहे. यानुसार सेजगाव ग्राम पंचायतीने शासनाने दिलेल्या निकषानुसार कामगिरी करून उत्तम ठरली आहे.
वैयक्तिक – सार्वजनिक शौचालय सुविधा व वापर, पाणी गुणवत्ता तपासणी, सांडपाणी व घनकचरा व्यवस्थापन, पायाभूत सुविधांचा विकास, आरोग्य व शिक्षण विषयक सुविधा, केंद्र वा राज्य पुरस्कृत योजनांची प्रभावी अंमलबजावणी, बचतगट, प्लास्टिक वापर बंदी, ग्रामपंचायतीच्या घरपट्टी वा पाणीपट्टी वसुली आदिमध्येही सेजगाव ग्राम पंचायतीने दमदार कामगिरी करीत नाव लौकिक केले आहे. या कामगिरीची दखल घेत सेजगाव ग्राम पंचायतीला आयएसओ मानांकन देण्यात आले आहे. नुकतेच सरपंच सौ.उषा कठाणे, उपसरपंच टेकचंदउ बिसेन यांनी आयएसओ प्रमाणपत्र स्विकारले. यावेळी ग्राम पंचायत सदस्य टी.एल.पारधी, गौरीशंकर पारधी, ग्रा.पं.अधिकारी अतुल ठाकरे, भिकराम रहांगडाले, तथा कर्मचारी वृंद उपस्थित होते.

चंद्रपूर 4 जुलै – महापालिका क्षेत्रातील शिकस्त इमारतींपासून परिसरातील रहिवाशांच्या जीविताला निर्माण होऊ शकणारा संभाव्य धोका पाहता चंद्रपूर महानगरपालिकेने कारवाई करण्यास सुरवात केली असुन मागील काही दिवसात 62 जीर्ण इमारतींना नोटीस देण्यात आली आहे.
पावसाळ्यात दरवर्षी महापालिका क्षेत्रातील जीर्ण व शिकस्त इमारतींचा सर्व्हे करण्यात येतो. यात आढळलेल्या धोकादायक इमारतीतील रहिवाश्यांना महाराष्ट्र महानगरपालिका अधिनियम, 1949 चे कलम 264 अन्वये नोटीस जाहीर करण्यात येते. चंद्रपूर मनपातर्फे झोन 1 अंतर्गत 30, झोन 2 अंतर्गत 20 तर झोन 3 अंतर्गत 12 अश्या एकुण 62 धोकादायक इमारतींना नोटीस देण्यात आली आहे.
नोटीसनुसार धोकादायक इमारतीमध्ये वास्तव्यास असलेल्या सर्व व्यक्तींना व महत्वाचे साहित्य अन्यत्र सुरक्षित ठिकाणी तात्काळ स्थलांतरीत होण्यास सांगण्यात आले असुन त्वरित आपल्या इमारतीची दुरुस्ती करुन घेण्याचे तसेच त्यांनतर आपल्या इमारतीचे नोंदणीकृत स्ट्रक्चरल अभियंता यांचेकडून सर्वेक्षण करुन त्याबाबतचे स्ट्रक्चरल स्टॅबिलिटी सर्टिफिकेट मनपा कार्यालयास सादर करण्यास कळविण्यात आले आहे.
अश्या 6 इमारती यापुर्वी मनपाने निर्लेखित केल्या आहेत. पावसाळ्यापूर्वी सदर कारवाई दरवर्षी मनपातर्फे करण्यात येते मात्र काही मालमत्ताधारक जिवाची पर्वा न करता त्याच इमारतीत तळ ठोकून राहतात. यामुळे परिसरातील रहिवाशांच्या जिवालासुद्धा धोका निर्माण होतो. मग अश्या प्रसंगी निष्कासीत करण्याची अथवा नियमानुसार कारवाई मनपातर्फे करण्यात येते.

भंडारा : भंडारा जिल्ह्यात मागील तीन दिवसांपासून पावसाने दमदार हजेरी लावली आहे. दिवसभर पावसाची रिपरिप सुरु आहे. कुठे दमदार तर कुठे रिपरिप पाऊस सातत्याने कोसळत आहे. तसेच गोसेखुर्द धरणाच्या पाणलोट क्षेत्रात जोरदार दमदार व जिल्ह्यालगतच्या प्रदेशात अतिवृष्टी होत असल्याने गोसेखुर्द धरणाच्या ३३ द्वारांपैकी १३ वक्रद्वारे दि. ३ जुलै २०२५ रोजी सायंकाळी उघडण्यात आली. यामुळे काही प्रमाणात वैनगंगानदीच्या पात्रात पाणी वाढल्याने नदीकाठच्या गावांना प्रशासनाने सतर्कतेचा ईशारा दिला आहे.

या वर्षीच्या पावसाळ्यात पहिल्यांदाच गोसेखुर्द धरणाची १३ वक्रद्वारे अर्ध्या मिटरने उघडण्यात आली असून १३८५ क्युमेकस पाण्याचा विसर्ग नदीपात्रात करण्यात येत आहे. याशिवाय धापेवाडा धरणाची ७ द्वारे उघडली असून ८९०.९ क्युमेकस पाण्याचा विसर्ग सुरू आहे. त्यामुळे वैनगंगा नदीच्या पाणी पातळीत वाढ झाली आहे. वैनगंगा नदीची कारधा येथील धोक्याची पातळी २४५.५० मी असून सध्या पाण्याची पातळी ईशारा पातळीच्या खाली आहे. (Gosekhurd Dam) गोसेखुर्द धरणाची १३ वक्रद्वारे उघडल्यामुळे वैनगंगा नदी दुथळी भरून वाहत आहे. त्यामुळे नदी काठावरील गावांना सतर्कतेचा ईशारा प्रशासनाने दिला आहे.

दरम्यान,गोसेखुर्द धरणातून वैनगंगा नदीपात्रामध्ये पूर नियंत्रण करिता दि.३ जुलै रोजी सायंकाळी ६.४५ वाजता १३ वक्रद्वारे खुली करून अंदाजे १३८५ क्यूमेक्स पाणी नदीपात्रात सोडण्यात येत आहे. दोन्ही जलविद्युत प्रकल्पांचा २०८ क्युमेक्स पाण्याचा विसर्ग पकडून एकूण अंदाजे १५९३ क्युमेक्स पाणी नदीपात्रात सोडण्यात येत आहे. त्यामुळे नदी पात्रात आवागमन करणार्‍यांनी तसेच नदीकाठावरील नागरिकांना सतर्कतेचा ईशारा प्रशासनाच्यावतीने देण्यात आला आहे.

आमगांव  : आमगांव नगरपरिषदेच्या हद्दीतील मुख्य रस्त्यांवर दिवसभर वाहनांची वर्दळ असते. परंतु सकाळपासून सायंकाळपर्यंत बसस्थानक चौक, गांधी चौक, कामठा चौक, आंबेडकर चौकातील मुख्य रस्त्यांच्या मधोमध गाई व पाळीव प्राण्यांनी आपला ठिय्या मांडल्याने वाहनचालकांना (Driver) कमालीचा त्रास होत आहे.आमगांव येथील या मुख्य रस्त्यांवरून येणाऱ्या-जाणाऱ्या वाहनधारकांना रस्त्यावर बसणाऱ्या जनावरांचा (Animals) त्रास सहन करावा लागतो. पशुमालकांचे (Animal Owner) याकडे अक्षम्य दुर्लक्ष होत असल्यामुळे हे प्राणी दिवसभर रस्त्याच्या मधोमध बसलेले असतात. वाहनचालक व सामाजिक कार्यकर्त्यांनी न.प.च्या मुख्याधिकाऱ्यांना (Principal) याबाबत माहिती दिली. परंतु आजपर्यंत, रस्त्याच्या मधोमध बसणाऱ्या पाळीव प्राण्यांवर त्यांनी कोणतीही कारवाई केली नाही. त्यामुळे वाहनधारक व नागरिकांनी त्यांच्या कार्यप्रणालीवर प्रश्नचिन्ह उपस्थित केले आहे. आमगांव शहराच्या मुख्य रस्त्यावर बसणाऱ्या जनावरांच्या मालकांवर त्यांनी तातडीने कारवाई करावी, अशी विनंती जनतेने केली आहे.

गोंदिया,दि.०४ः सालेकसा तालुक्यातील साखरीटोला/सातगाव येथील रितिका प्रभाकर दोनोंडे हिने एमपीएससी राज्यसेवा परीक्षा उत्तीर्ण करून गावासह आईवडिलांचे नाव मोठे केले. त्यामुळे तिच्यावर सर्व स्तरातून कौतुकाचा वर्षाव होत आहे.
मेहनत व जिद्द असेल तर सर्व काही शक्य आहे, हे रितिकाने राज्यसेवा परीक्षा उत्तीर्ण करून सिद्ध केले. एमपीएससी राज्यसेवा परीक्षा उत्तीर्ण केल्यामुळे महाराष्ट्र शासनाच्या पीडब्लूडी विभागात वर्ग 2 पदी तिची नियुक्ती झाली आहे. या यशाचे श्रेय तिने वडील प्रभाकर दोनोंडे, आई मंजुषा दोनोडे आणि मार्गदर्शक शिक्षक व सततच्या अभ्यासाला दिले. निरंतर अभ्यासामुळेच ही मजल मारल्याचे एमपीएससी परीक्षा विजेती रितिका दोनोंडे हिने प्रतिनिधीशी बोलताना सांगितले. भविष्यात गोंदिया जिल्हा व सालेकसा तालुक्यात काम करण्याची संधी मिळाली तर नक्कीच आवडेल. तसेच तालुक्याचे नाव मोठे करण्यासाठी प्रयत्न करणार असल्याचे तिने यावेळी स्पष्ट केले.