देवरी,दि.4 जुलै – तालुका आरोग्य अधिकारी कार्यालय येथील सभागृहात विविध राष्ट्रीय आरोग्य कार्यक्रमांचा आढावा सभा संपन्न झाली.सदर आढावा सभेत जिल्हा माता व बाल संगोपन अधिकारी डॉ.रोशन राऊत,जिल्हा हिवताप अधिकारी डॉ.विनोद चव्हाण,देवरी तालुका आरोग्य अधिकारी डॉ.ललित कुकडे उपस्थित होते.आढावा सभेत देवरी तालुक्यातील प्राथमिक आरोग्य केंद्राचे वैद्यकीय अधिकारी,सामुदायिक आरोग्य अधिकारी,आरोग्य सहायक,आरोग्य सहयिका,आरोग्य सेवक,आरोग्य सेविका,आशा गट प्रवर्तक, तालुका स्तरीय कर्मचारी उपस्थित होते.

आढावा सभेत जिल्हा माता व बाल संगोपन अधिकारी डॉ.रोशन राऊत यांनी माता व बाल मृत्यु टाळण्यासाठी प्रतिबंधात्मक उपाययोजना राबविणे त्यात किशोरावस्थापासुनच त्यांच्या विविध तपासणी सोबत गरोदर मातेचे बारा आठवड्याच्या आत नोंदणी,लोह,रक्तक्षय व कँल्शियम यांची मात्रा लाभार्थ्यांना देणे,वेळेत लसीकरण व फॉलोअप ठेव्ण्याच्या सुचना दिल्या.आरोग्य व्यवस्थापन माहिती प्रणाली(एच.एम.आय.एस.) ,एकात्मिक आरोग्य माहिती मंच आय.एच.आय.पी. ऑनलाइन पोर्टल,फॅमिली प्लॅनिंग लॉजिस्टिक मॅनेजमेंट इन्फॉर्मेशन सिस्टीम (एफ.पी.एल.एम.आय.एस.)ॲप कुटुंब नियोजन वस्तूंचा साठा व्यवस्थापित करणे, मागणी करणे आणि जारी करणे यावर मार्गदर्शन केले.DHIS2 आरोग्य व्यवस्थापन माहिती प्रणाली,यू-विन पोर्टलवरून गरोदर माता आणि बाळाची लसीकरणाची नोंद ऑनलाइन पोर्टल अद्यावत करणे, यू-विन पोर्टल अंतर्गत लाभार्थ्यांच्या लसींची रिअल-टाइम एन्ट्री नियमित करणे.

एकात्मिक रोग देखरेख कार्यक्रम (IDSP) हे साथीचे रोग तसेच इतर आरोग्यविषयक माहितीचे संकलन आणि विश्लेषण करण्यासाठी महत्वाचे पोर्टल असुन सर्व आरोग्य संस्थानी एस,पी व एल.फॉर्म दैंनदीन भरण्याच्या सुचना दिल्या.

जिल्हा हिवताप अधिकारी डॉ.विनोद चव्हाण  यांनी पावसाळ्यात जलजन्य व किटकजन्य आजार जसे हिवताप व डेंग्युची रुग्ण संख्या कमी करण्यासाठी आरोग्य कर्मचारी यांचे नियमित गृहभेटी सर्वेक्षण,डासांची पैदास रोखण्यासाठी गावपातळीवर ग्रामपंचायतीचे उपाययोजना, गावात आरोग्य कर्मचार्यामार्फत करण्यात येणारे प्रतिबंधात्मक उपाययोजना, जैविक बाबी,प्रौढ डास व अळी कमी करण्याचे विविध पद्धती,मलेरियाच्या डासांची उत्पत्ती थांबवण्यासाठी उपाययोजना,नवीन आणि उपचारांच्या पद्धती विषयी मार्गदर्शन करणे,डासअळी नाशक पद्धती अशा विविध बाबींचा आढावा याप्रसंगी घेवुन मार्गदर्शन केले.आढावा सभा यशस्वीतेसाठी देवरी तालुका आरोग्य सहाय्यक वरखेडे, संगणक परिचालक शहारे यांनी विशेष प्रयत्न केले.

प्रभारी कृषी विकास अधिकाऱ्याची सीईओंकडे तक्रार

गोंदिया ः कृषी सेवा केंद्राच्या तपासणीआड प्रभारी कृषी विकास अधिकाऱ्याने कृषी व्यवसायीकांकडून वसुलीचा प्रयत्न केल्याचा धक्‍कादायक प्रकार समोर आला आहे. व्यवसायीकांनी याप्रकरणी जिल्हा परिषद उपाध्यक्षांकडे व त्यांनी थेट मुख्य कार्यकारी अधिकाऱ्यांकडे तक्रार करीत कारवाईचे निर्देश दिले आहे.

जिल्ह्यात खरिपाच्या तोंडावर खताची साठेबाजी होत असून, शेतकऱ्यांवर वाढीव दराने खत खरेदीची वेळ आली आहे. याविषयी शेतकऱ्यांनी जिल्हा परिषद उपाध्यक्ष सुरेश हर्षे यांच्याकडे तक्रारी केल्या होत्या. त्याची दखल घेत जिल्हा परिषदेचे प्रभारी कृषी विकास अधिकारी प्रमोद कागदीमेश्राम यांना काही कृषी सेवा केंद्राची तपासणी करा, अशी सूचना केली. परंतु, नव्या शासन आदेशानुसार कृषी विकास अधिकाऱ्यांचे तपासणीचे अधिकार काढल्याचे सांगत हे काम करण्यास कागदीमेश्राम यांनी नकार दिला. मात्र, त्यानंतर काही वेळातच ते आमगाव येथील जय भवानी कृषी सेवा केंद्र व त्यानंतर कट्टीपार येथील कृषी सेवा केंद्राची तपासणी करून पैशाची मागणी करीत असल्याचे व्यवसायीकांनी भ्रमणध्वनीवरून जिल्हा परिषद उपाध्यक्ष हर्षे यांना कळविले. त्यानंतर गोरेगाव तालुक्‍यातूनही कागदीमेश्राम यांनी पैशाची मागणी केल्याबाबत व्यवसायीकांनी माहिती दिली. यावेळी भ्रमणध्वनीवरून कागदीमेश्राम यांच्याशी उपाध्यक्ष सुरेश हर्षे यांनी संवाद साधला असता त्यांनी चूक झाल्याची कबुली दिली. मात्र, हर्षे यांनी ही बाब गांभीर्याने घेत थेट जिल्हा परिषदेचे मुख्य कार्यकारी अधिकारी एम. मुरूगानंथम यांना याबाबत माहिती देत कागदीमेश्राम यांच्यावर कारवाईची सूचना केली. आता त्यांच्यावर काय कारवाई होते, हे पाहणे आैत्सुक्याचे आहे.

प्रभारी कृषी विकास अधिकारी कागदीमेश्राम हे तपासणीआड पैशाची मागणी करीत असल्याच्या अनेक तक्रारी कृषी व्यवसायीकांनी केल्या. त्यामुळे त्यांचा पदभार काढावा, अशी शिफारस सीईओंकडे केली आहे.

-सुरेश हर्षे,उपाध्यक्ष, जिल्हा परिषद, गोंदिया

तिरोडा-सामाजिक वनीकरण विभाग गोंदिया परिक्षेत्र तिरोडा अंतर्गत वृक्षारोपणाचा कार्यक्रम भिवरामजी विद्यालय व कनिष्ठ महाविद्यालय वडेगाव येथे वनपाल एम आर एटरे, वनपाल पी एफ डहाट, उपसरपंच बाळकृष्ण सोनेवाने, प्राचार्य डी आर गिरीपुंजे ,ज्येष्ठ शिक्षक गोविंदप्रसाद बिसेन, डी एस बोदेले, वनमजूर इंद्रकुमार साठवणे, चंद्रशेखर पटले, राजू नंदेश्वर ,यांच्या प्रमुख उपस्थितीत वृक्षारोपणाचा कार्यक्रम घेण्यात आला.

यावेळी शालेय पटांगणात विविध वृक्षांच्या रोपांची लागवड करण्यात आली विद्यार्थ्यांनी ‘ एक पेड मा के नाम ‘ यानुसार मनाशी गाठ बांधून वृक्ष संवर्धनाची कास धरली. त्या झाडाला दत्तक समजून संरक्षण करण्याची जबाबदारी स्वीकारली.
कार्यक्रमाचे संचालन डी एस बोदेले ,प्रास्ताविक प्राचार्य डी आर गिरीपुंजे ,आभार प्रदर्शन आर के किरसाण यांनी केले यशस्वीतेसाठी शाळेतील शिक्षक शिक्षकेतर कर्मचारी व विद्यार्थ्यांनी मोलाचे सहकार्य केले.

गोरेगाव,दि.०३ः तालुक्यातील मुंडीपार ग्रामपंचायत अंतर्गत येत असलेल्या वार्ड क्र. 2 मध्ये आखरटोली येथे कोहमारा रोड ते ममताताई धामगाये यांच्या घरापर्यंत सिमेंट रस्ता कामाचे भूमिपूजन जिल्हा परिषदेचे अर्थ व बांधकाम समिती सभापती डॉ.लक्ष्मण भगत यांच्या हस्ते करण्यात आले.
या कार्यक्रमास मुंडीपार ग्रामपंचायतीच्या सरपंच सौ. प्रेमलता ताई राऊत, ग्रामपंचायत सदस्य चंद्रशेखर शहारे,राजाभाई खान ग्रामपंचायत सदस्य, प्रलय धामगाये तसेच रोहित पांडे, सुनील वाघाडे, अजय नेवारे, शिवा बिसेन, राहुल राऊत, राजु भोयर व इतर मान्यवर मोठ्या संख्येने उपस्थित होते.
यावेळी परिसरातील नागरिकांनी सिमेंट रस्त्याच्या कामासाठी समाधान व्यक्त केले असून लोकवस्तीतील नागरी मूलभूत सुविधा उपलब्ध करून देण्याच्या दृष्टिकोनातून हे पाऊल महत्त्वाचे असल्याचे डॉ. भगत यांनी सांगितले.कार्यक्रमाचे आयोजन यशस्वीपणे पार पडले असून स्थानिक नागरिकांत आनंदाचे वातावरण आहे.

सिदेंवाही तालुक्यातील विकास कामाची पाहणी

चंद्रपूर ,दिनांक 3 जुलै 2025 – चंद्रपूर जिल्हा परिषदचे मुख्य कार्यकारी अधिकारी पुलकित सिंह यांनी नुकताच सिदेंवाही तालुक्याचा दौरा केला असून, सिदेंवाही तालुक्यातील विविध विकास कामांना भेटी देऊन, पाहणी केली आहे. या भेटी दरम्यान गावातील विकास कामे गतीने निर्माण करा. कामात गती आणा असे सूचना यावेळी मुख्य कार्यकारी अधिकारी पुलकीत सिंह यांनी केल्या ‌.

सर्वप्रथम सिंदेंवाही पंचायत समितीमध्ये सर्व विभागाचा आढावा घेण्यात आला यामध्ये कामात पारदर्शकता ठेवून कामे करा. सर्व विकासकामे वेळेत पूर्ण करा .अशा सूचनाही पुलकित सिंह यांनी दिली आहे. यावेळी पुलकीत सिंह यांनी सिंदेंवाही तालुक्यातील काही गावातील विकास कामांची पाहणी केली . यावेळी पेडगाव या गावात व्हिजिट देऊन, गावातील शाळा व अंगणवाडी , मोहाडी येथील प्राथमिक आरोग्य केंद्र, जामसाळा ग्रामपंचायत ला भेट देऊन ग्रामपंचायतच्या कामकाजाची विचारणा केली. नवरगाव येथील नव्याने तयार झालेले घनकचरा व्यवस्थापन प्रकल्पची पाहणी करून, गावातील कचऱ्याचे  वर्गीकरण करून, सर्व प्रकारचा कचरा घनकचरा व्यवस्थापन प्रकल्पात रोज आणावा .गावातील कचरा रोज गोळा करावा .अशा सूचना केल्या. यासोबतच मामा तलाव दुरुस्तीच्या कामाची पाहणी करून यंत्रणेला योग्य ते निर्देश दिले . यावेळी पंचायत समिती सिंदेंवाहीचे गटविकास अधिकारी आत्मज मोरे तथा विविध विभागाचे अधिकारी कर्मचारी उपस्थित होते.