नागपूर,दि.0८ः- : स्थानिक नगरपरिषदेअंतर्गत प्रदूषण व आरोग्याशी निगडित प्रश्नांकडे नगरपरिषद व लोकप्रतिनिधींचे अक्षम्य दुर्लक्ष, राजकीय, सामाजिक संघटना पुढाकार न घेतल्याने राष्ट्रीय ओबीसी विद्यार्थी महासंघाच्या नेतृत्वात शुक्रवारी वाडीतील जवाहरलाल नेहरू महाविद्यालयाचे विद्यार्थी शुक्रवारी (७ सप्टेंबर) रस्त्यावर उतरले. ‘कचरा हटाओ’, ‘विद्यार्थी बचाओ’, ‘नगरपरिषदेचा निषेध असो’, अशा घोषणा देत नगरपरिषदेवर धडक देऊन युवाशक्तीची ताकद दाखवली..
वाडीतील जवाहरलाल नेहरू महाविद्यालयातील विद्यार्थ्यांनी कचऱ्याविरोधात न.प.च्या नि्क्रिरय कार्यपद्धतीविरोधात आक्रोश मोर्चा काढला. दररोज कचरागाडीतून जमा होणारा शेकडो टन कचरा गोडाउन संचालक, रुग्णालये, धोकादायक वेस्टेज, औषधी निकषाचे पालन न करता महाविद्यालयासमोरील खदान किंवा रस्त्यावर वर्षभरापासून टाकला किंवा जाळला जातो. त्यामुळे नागरिक, विद्यार्थी व शिक्षकांना दुर्गंधीचा सामना करावा लागतो. शिक्षणात अडथळा व साथीचे रोग पसरल्याचे भीतीने महाविद्यालय चिंताग्रस्त आहे. प्राचार्य डॉ. दंतुलवार यांनी प्रदूषण नियंत्रण मंडळ, जिल्हाधकारी कार्यालय, आमदार समीर मेघे यांच्याकडे तक्रारी केल्या. प्रदूषण नियंत्रण मंडळाने कारवाई निर्देश दिले. परंतु कचरा टाकणे बंद झाले नाही. त्यामुळे विद्यार्थ्यांनी आक्रोश व्यक्त केला. बॅनर, मागण्यांचे फलक हातात घेऊन विद्यार्थी न.प.मध्ये पोहोचले. घोषणांनी परिसर दणाणून सोडला. मोर्चाचे नेतृत्व ओबीसी विद्यार्थी महासंघाचे जिल्हाध्यक्ष नीलेश कोढे, जिल्हा महासचिव रोशन कुंभलकर, छगन साव, विशाल हिवसे यांनी करीत नगराध्यक्ष प्रेम झाडे यांना निवेदन दिले. डम्पिंग यार्डमुळे शिक्षण घेणे कठीण झाले. आरोग्य धोक्यात आले. त्यामुळे डम्पिंग यार्ड हलविण्याची मागणी केली.नगराध्यक्षांनी डम्पिंग यार्डसाठी जागा शोधण्यासाठी प्रयत्न केल्याचे स्पष्ट केले. दोन दिवसांत जिल्हाधिकाऱ्यांची भेट घेऊन डम्पिंग यार्ड जागेचा प्रस्ताव मंजूर करण्याची विनंती केली. दहा दिवसांत समस्या निकाली नाहीतर तीव्र आंदोलनाचा इशारा दिला. याप्रसंगी आरोग्य सभापती शालिनी रागीट, महिला व बालकल्याण सभापती कल्पना सगदेव, नगरसेवक श्याम मंडपे, आशिष नंदागवळी व उपमुख्याधिकारी आकाश सहारे उपस्थित होते.
