मुंबई, दि. २७ मे: टाळेबंदीच्या काळात अध्ययन-अध्यापन पद्धतीमध्ये खंड पडू नये यासाठी तंत्रज्ञानाच्या सहाय्याने मुंबई विद्यापीठाने आज पहिल्यांदाच पीएचडी शिक्षणक्रमासाठी ऑनलाईन मौखिक परीक्षेचे (वायव्हा-व्होसे) यशस्वी आयोजन केले. विज्ञान आणि तंत्रज्ञान विद्याशाखेतील इलेक्ट्रॉनिक्स अँड टेलेकम्युनिकेशन इंजीनिअरींग या विषयात संशोधन करणाऱ्या रुपाली पाटील या विद्यार्थीनीने ही मौखिक परीक्षा उत्तीर्ण केली. ‘डॉक्युमेंटेड सिग्नल रिट्रायल अँड आयडेंटिफिकेशन’ या संशोधन विषयात सादर केलेल्या प्रंबधावर आज आयोजित केलेल्या मौखिक परीक्षेसाठी बाह्य परीक्षक म्हणून आयआयटी मुंबई येथील प्रा. सब्बीर मर्चंट, संशोधन मार्गदर्शक, प्रा. डॉ. रमेश कंरदीकर, सोमय्या अभियांत्रिकी महाविद्यालय आणि मौखिक परीक्षेसाठी अध्यक्ष म्हणून डॉ. जे. डब्ल्यू बाकल यांचा सहभाग होता. मुंबई विद्यापीठाचे कुलगुरू प्रा. सुहास पेडणेकर यांच्या संकल्पनेतून आणि प्र-कुलगुरू प्रा. रविंद्र कुलकर्णी यांच्या मार्गदर्शनाखाली प्रबंध विभागाचे उपकुलसचिव निलकंठ तलवडेकर यांनी पहिल्यांदाच या मौखिक परीक्षेचे यशस्वी आयोजन केले.
विद्यापीठ अनुदान आयोगाने निर्गमित केलेली मार्गदर्शक तत्वे आणि राज्य शासनाने गठीत केलेल्या समितीच्या शिफारशीच्या अनुषंगाने मुंबई विद्यापीठामार्फत तयार केलेल्या कृती आराखड्यान्वये विद्यापीठाने मौखिक परीक्षेचे नियोजन केले असून येत्या काही दिवसात विज्ञान व तंत्रज्ञान विद्याशाखेतील ८ आणि मानव्यविज्ञान शाखेतील ४ अशा १२ विषयांसाठी मौखिक परीक्षांचे नियोजन विद्यापीठामार्फत करण्यात येत आहे.
