गोंदिया,दि.16 : जिल्ह्यात अवैध धंदे, गुन्हे प्रतिबंधक कारवाईच्या माध्यमातून वचक घालता यावा यासाठी जिल्हा पोलिस अधीक्षक मंगेश शिंदे यांच्या मार्गदर्शनात कार्यरत पथकाने आठवड्याभर्यात मोठी कारवाई करून जुगार व दारूच्या अड्ड्यावर धाडी मारून मुद्देमालासह आरोपींना अटक केली आहे. या कारवाईने अवैध धंदे करणार्यांचे चांगलेच धाबे दणानले आहेत.
सविस्तर असे की, ९ डिसेंबर रोजी गोरेगाव पोलिस ठाणे हद्दीत पेट्रोलिंग वर असतांना तुमसर येथे अवैधरित्या दारू विक्री होत असल्याची माहिती मिळताच विजय प्रल्हाद साखरे यांच्याघरी धाड टाकून ३ हजार ८५० रुपयांची दारू तर रजत राजू साखरे याच्या घरून ५ हजार २५० रुपयाची देशी दारू हस्तगत केली. १० डिसेंबर रोजी तिरोडा पोलिस ठाणे हद्दीत डाकराम सुकडी येथे फुलचंद जगलू शेंडे याच्या शेतात हातभट्टी दारूवर धाड मारून ११ हजार रुपयांचा मुद्देमाल तर ११ व १२ डिसेंबर रोजी शहर पोलिस ठाणे हद्दीत क्षत्रिय मराठा भवन गोंदिया येथे सट्टापट्टी खेडविणार्या खुर्शिद याशीन सैय्यद (५२) रा. गौतमनगर याच्याकडून सट्टापट्टी व साहित्य असा एकूण ३ हजार ३२० रुपये, ग्रामीण पोलिस ठाणे हद्दीत आसोली येथे केवलदास ढेकल कांबळे याच्याकडून सट्टापट्टी व साहित्य असा एकूण २ हजार १६० रुपये, रामनगर पोलिस ठाणे हद्दीत फिरोज सरवर खान (४०) रा. शास्त्रीवार्ड याच्याकडून सट्टापट्टी व साहित्य असा एकूण १५७३ रुपये या शिवाय आमगाव पोलिस ठाणे हद्दीत आसोली येथे सुरेंद्र ईश्वरदास चंद्रिकापुरे (४५) रा. सरकारटोला याच्याकडून सट्टापट्टी व साहित्य असा एकूण २ हजार ७०५ रुपये तर गंगाझरी पोलिस ठाणे हद्दीत ईश्वर माणिकराम फरकुंडे (३१) रा. भीमनगर याच्याकडून सट्टापट्टी व साहित्य असा एकूण १० हजार ७३२ रुपयांचा मुद्देमाल हस्तगत केला. या शिवाय दवनीवाडा पोलिस ठाणे हद्दीत बघोली येथे दिलीप मनिराम अंबुले याच्या घरून देशी-विदेशी दारू असा एकूण १० हजार ४०० रुपयाचा मुद्देमाल हस्तगत केला. तर १४ डिसेंबर रोजी आमगाव पोलिस ठाणे हद्दीत टेकळी शिवारातील ढाब्यावर लखन संपत सहारे (३०) रा. मोहगाव यांच्याकडून ५ हजार ४० रुपयाची देशी दारू हस्तगत करण्यात आली. ही कारवाई पोलिस अधीक्षक मंगेश शिंदे यांच्या मार्गदर्शनाखाली सपोनि. प्रदीप अतुलकर, सपोनि. रमेश गर्जे, पोउपनि. मेश्राम, सफौ. कापगते, करपे, रहांगडाले, बैस, राऊत, पो.हवा. कृपाण, जगनाडे, फुलबांधे, गुरनुले, शेंडे, हातझाडे, गौतम यांच्या मार्गदर्शनात पार पडली.
