दूध उत्पादक शेतकऱ्यांना मुख्यमंत्र्यांचा दिलासा
मुंबई, दि. 28 : राज्यातील दूध उत्पादक शेतकऱ्यांचे हित
जोपासण्याच्या दृष्टीने शासकीय दूध योजनेमार्फत खरेदी करण्यात येणाऱ्या
गाय व म्हशीच्या दूधाच्या दरामध्ये प्रति लिटर दोन रुपयांनी वाढ करण्याचा
निर्णय मुख्यमंत्री देवेंद्र फडणवीस यांनी आज घेतला. ही दूध खरेदी दरवाढ
1 जुलै 2016 पासून लागू करण्यात येणार आहे. या निर्णयामुळे राज्यातील दूध
उत्पादक शेतकऱ्यांना मोठा दिलासा मिळाला आहे.
राज्यातील शासकीय दूध योजनांमार्फत खरेदी करण्यात येत
असलेल्या दुधाच्या खरेदी दरात वाढ करण्याबाबत पशुसंवर्धन, दुग्धव्यवसाय व
मस्त्यव्यवसाय विभागाच्या प्रधान सचिवांच्या अध्यक्षतेखाली प्रदत्त समिती
गठीत करण्यात आली होती. राज्यातील सद्यस्थितीतील दूध खरेदी दर, उत्पादन
खर्च याबाबींचा विचार करून समितीने केलेल्या दूध दरवाढीच्या शिफारशीला
मुख्यमंत्र्यांनी आज मान्यता दिली.
या निर्णयामुळे गायीच्या दूध खरेदी दरात प्रति लिटर दोन
रुपयांनी वाढ करण्यात आली असून शासकीय दूध योजनेमध्ये संकलित होणाऱ्या
गायीच्या दुधासाठी खरेदी दर आता 20 रुपयांवरून 22 रुपये एवढा करण्यात आला
आहे. तर म्हशीच्या दुधाचा खरेदी दर आता 29 रुपयांवरून 31 रूपये इतका झाला
आहे. या दरवाढीमुळे राज्यातील दूध उत्पादक शेतकऱ्यांना मोठा दिलासा
मिळाला आहे.
शासकीय दूध योजनेमार्फत विक्री करण्यात येणाऱ्या गाय आणि
म्हशीच्या दूध विक्री दरातही प्रति लिटर दोन रुपयांनी वाढ करण्यात आली
आहे. गायीचे दूध 35 रुपये प्रति लिटर तर म्हशीचे 44 रुपये प्रति लिटर या
दराने विक्री करण्यात येईल. यासंदर्भातला शासन निर्णय आज प्रसिध्द
करण्यात आला आहे.
