गोंदिया,01- गेल्या 29 वर्षापासून व्याख्यानमालांच्या आयोजनात सातत्य राखत वैचारिक प्रबोधनाची परंपरा जपणाऱ्या वर्धा येथील यशवंतराव दाते स्मृतिसंस्थेद्वारे दिल्या जाणाऱ्या पुरस्कारासाठी आपली पुस्तके पाठविण्याचे आवाहन संस्थेचे अध्यक्ष प्रदीप दाते यांनी केले आहे.
यशवंतराव दाते स्मृती संस्थेने गेल्या 29 वर्षांपासून सातत्याने व्याख्यानमाला आयोजित करुन वैचारिक प्रबोधन आणि आपल्या साहित्यिक, सांस्कृतिक, सामाजिक व शैक्षणिक उपक्रमांद्वारे संपूर्ण महाराष्ट्रात नावलौकिक प्राप्त केला आहे. या संस्थेच्या वतीने दरवर्षी सर्वोत्कृष्ट मराठी कादंबरीला ‘बाबा पद्मनजी साहित्य पुरस्कार’, सर्वोत्कृष्ट कथासंग्रहाला ‘शिक्षण व सहकारमहर्षी बापूरावजी देशमुख पुरस्कार’, सर्वोत्कृष्ट कवितासंग्रहाला ‘संत भगवानबाबा काव्य पुरस्कार’ व ‘पद्माकर श्रावणे स्मृती बालसाहित्य पुरस्कार, भाऊरावजी शिंगाडे विनोदी साहित्य पुरस्कार‘ दिला जातो. रोख पाच हजार रुपये, मानपत्र व स्मृतीचिन्ह असे या पुरस्कारांचे स्वरुप आहे. या शिवाय, डॉ. भा. ल. भोळे वैचारिक साहित्य पुरस्कार तसेच अंजनाबाई इंगळे तिगावकर स्मृती स्त्रीवादीसाहित्य पुरस्कार, डॉ. यशवंत सुमंत स्मृती प्रेरणा पुरस्कार देण्यात येत आहे. अनुवादीत साहित्याकरिता यशवंतराव दाते स्मृती अनुवाद पुरस्कार सुद्धा देण्याचे ठरले आहे.
पुरस्कारासाठी नियम व अटी :
० पुरस्कारासाठी मराठीतून लिहिलेल्या साहित्याचाच विचार केला जाईल.
० पुरस्कारासाठी 1 जानेवारी 2016 ते 31 डिसेंबर 2017 या कालावधीत प्रकाशित झालेल्या साहित्याच्या प्रत्येकी दोन प्रती पाठवाव्यात.
० अनुवाद पुरस्काराकरिता इतर भाषेतील मराठीत अनुवादीत पुस्तकांचाच विचार केला जाईल.
० सोबत लेखकाचा विस्तृत परिचय दोन छायाचित्रांसह पाठवावा.
० प्रकाशित साहित्य 5 जानेवारी 2018 पूर्वी पोहचेल अशा बेताने पाठवावे.
० परीक्षण समितीचा निर्णय अंतिम राहील.
० पुरस्कार विजेत्यांची नावे 20 जानेवारी 2018 पर्यंत जाहीर करण्यात येतील.
० पुरस्कार वितरण समारंभ 1 फेब्रुवारी 2018 ला वर्ध्यात होईल.
पुरस्कारासाठी पुस्तके संयोजक पुरस्कार समिती, यंशवंतराव दाते स्मृती संस्था, द्वारा प्रदीप दाते, शिवबावाडी, साबळे प्लॉट, वर्धा 442001 या पत्यावर पाठवावीत. अधिक माहितीसाठी दूरध्वनी 07152-241051, 252510, 9422144817 वर संपर्क साधावा.
या पुरस्कारासाठी जास्तीत जास्त साहित्यिकांनी/प्रकाशकांनी कादंबरी/कथा/काव्यसंग्रह/ वैचारिक साहित्य/स्त्रीवादीसाहित्य/बालसाहित्य/विनोदी/अनुवादीत पुस्तके पाठवून सहकार्य करावे, ही विनंती. संस्थेचे अध्यक्ष प्रदीप दाते, संयोजक प्रा. डॉ राजेंद्र मुंढे, उपाध्यक्ष प्रा. शेख हाशम व सचिव संजय इंगळे तिगावकर यांनी केली आहे.
