नागपूर,दि.02 : लोकसभा निवडणुकीत पराभवाची जबाबदारी स्विकारून ऑल इंडिया काँग्रेस कमिटीच्या अनुसूचित जाती विभागाचे राष्ट्रीय अध्यक्ष डॉ. नितीन राऊत यांनी सोमवारी आपल्या पदाचा राजीनामा दिला आहे. त्यांनी हा राजीनामा काँग्रेसचे राष्ट्रीय अध्यक्ष राहुल गांधी यांच्याकडे पाठविला आहे.नुकत्याच पार पडलेल्या लोकसभा निवडणुकीत पक्षाला मिळालेल्या अपयशाचे अपश्रेय स्वत:कडे घेत त्यांनी या राजीनाम्यात, आपण कमी पडल्याचे नमूद केले आहे. आपली चमू निवडणुकांपूर्वी सहा महिने अगोदर परिश्रम घेत होती मात्र त्यांच्या या प्रयत्नांना यश आले नाही. आपण आपल्या पदाचा राजीनामा देत आहोत असे म्हटले आहे.लोकसभा निकालानंतर देशभरातून काँग्रेस पदाधिकारी राजीनामे देत आहेत, त्यात आता नितीन राऊत यांची भर पडली आहे. पक्षश्रेष्ठी राजीनामा स्विकारतील का याकडे सर्वांचे लक्ष लागले आहे.