बेंगळुरू(वृत्तसंस्था),दि.03 : पत्रकार, सामाजिक कार्यकर्त्या गौरी लंकेश यांच्या हत्येप्रकरणी कर्नाटक पोलीस विशेष पथकाने (एसआयटी) हिंदू युवा सेनेच्या नवीन कुमारला अटक केली आहे. नवीन कुमारने गौरी लंकेशच्या मारेकऱ्यांना आश्रय देण्यासोबत हत्या करण्यासाठी सराव शिबिरासाठीची व्यवस्था केली असल्याची माहिती समोर आली आहे.
आरोपी नवीन कुमारला सत्र न्यायालयाने आठ दिवसांची कोठडी सुनावली आहे. नवीन कुमार हा मांड्या जिल्ह्यातील मद्दूर येथे राहणारा आहे. गौरी लंकेश यांच्या हत्येनंतर पाच महिन्यानंतर विशेष पथकाला यश मिळाले. नवीन कुमारला मागील आठवड्यात बेंगळुरूतील मॅजेस्टीक भागातील परिवहन महामंडळाच्या बस स्टॅण्डजवळून ताब्यात घेण्यात आले होते. त्यावेळी त्याच्याकडून एक ३२ कॅलिबर बंदूक आणि १५ जिवंत काडतूसे सापडली होती. एसआयटीने केलेल्या चौकशीत नवीन कुमारचा गौरी लंकेशच्या हत्येत सहभाग आढळला. एम.एम. कलबुर्गी, कॉ. गोविंद पानसरे आणि डॉ. नरेंद्र दाभोलकर यांची हत्यादेखील गौरी लंकेश यांच्या मारेकऱ्यांनी, गटाने केली असल्याची शक्यता एसआयटीच्या सूत्रांनी व्यक्त केली आहे. गौरी लंकेश यांच्या हत्येआधी त्यांच्या घराबाहेर बाईकस्वार घराचे निरीक्षण करत असल्याचे सीसीटीव्ही फुटेज मिळाले असल्याची माहिती सूत्रांनी दिली. एसआयटीला सध्या फॉरेंसिक अहवालाची प्रतिक्षा असून त्या सीसीटीव्ही फूटेजमध्ये नवीन असल्याची खात्री पोलिसांना आहे. त्याशिवाय नवीन कुमार व अन्यजण गौरी लंकेशच्या घराबाहेर असल्याचे अन्य पुरावे पोलिसांच्या हाती लागले असल्याची माहिती सूत्रांनी दिली.
एसआयटीने दिलेल्या माहितीनुसार, जुलै २०१७ मध्ये चार जणांची सराव करण्यासाठी व्यवस्था करण्यात आली होती. हे चौघेही कर्नाटक राज्याबाहेरील अतिउजव्या संघटनांशी निगडीत असल्याची माहिती समोर आली आहे. नवीनने दिलेल्या जबाबानुसार, नवीनच्या एका मित्राने प्रशिक्षण शिबिराची व्यवस्था करण्यासाठी सांगितले होते. हे चौघेही जण नवीनला त्याच्या राहत्या घरी भेटले होते. सूत्रांनी दिलेल्या माहितीनुसार, या चौघांनी नवीनला सोबत कोल्लेगल आणि चामराज नगरमधील जंगलात घेऊन गेले आणि तेथे गोळीबाराचा सराव केला. ऑगस्ट तिसऱ्या आठवड्यापर्यंत त्यांचा हा सराव सुरू होता.
