76 मतदान केंद्रावर 304 मतदान अधिकाऱ्यांचे एअर-लिफ्ट
एकूण 211 निवडणूक पथके हेलिकॉप्टरने होणार रवाना
गडचिरोली,दि.18:विधानसभा सार्वत्रिक निवडणूकीसाठी 20 नोव्हेंबर रोजी होणाऱ्या मतदानाकरिता
जिल्ह्यातील संवेदनशील व अतिसंवेदनशील मतदान केंद्रांवर मतदान पथके रवाना करण्यास आजपासून सुरूवात
करण्यात आली. 69-अहेरी मतदारसंघात 76 निवडणूक पथकातील 304 मतदान अधिकारी व कर्मचाऱ्यांना ईव्हीएम
आणि इतर युनिटसह आज सकाळी भारतीय वायुसेनेच्या एम.आय.-17 हेलिकॉप्टरच्या मदतीने 14 बेसकॅम्पवर
सुरक्षितपणे पोहचिविण्यात आले. यावेळी निवडणूक विभागाद्वारे मतदान पथकातील अधिकाऱ्यांचे बँडबाजा, पुष्पहार व
औक्षण करून स्वागत करण्यात आले.
गडचिरोली जिल्ह्यात 67-आरमोरी, 68-गडचिरोली व 69-अहेरी या तीन विधानसभा मतदार संघातील 972
मतदान केंद्रापैकी 211 मतदान केंद्रावर 17 ते 19 नोव्हेंबर या कालावधीत हेलिकॉप्टरद्वारे मतदान अधिकारी व मतदान
साहित्य पोहचविण्यात येणार आहे. अहेरीत आज 76, उद्या 25 व 19 नोव्हेंबर रोजी 44 पथकांना एअर लिफ्ट करण्यात
येत असून गडचिरोली मतदारसंघात 18 नोव्हेंबर रोजी 13 पथके तर आरमोरी मतदार संघात 18 नोव्हेंबर रोजी 39
पथके व 19 नोव्हेंबर रोजी 14 पथके हेलिकॉप्टरने रवाना करण्यात येणार आहे. जिल्हा निवडणूक अधिकारी संजय दैने व
जिल्हा पोलिस अधिक्षक श्री निलोत्पल यांच्या मार्गदर्शनात निवडणूक पथकांना सुरक्षीतपणे पोहचविण्यात येत आहे .
