राज्यात वाशिमच सर्वोत्कृष्ट; पाचव्यांदा ‘सीएस’ नंबर वन!

आरोग्य निर्देशकांवर आधारीत रॅंकिंग : डीएचओ दुसऱ्यांदा प्रथम

वाशिम,दि.१२ मार्च : गोरगरीब, सर्वसामान्य रुग्णांपर्यंत तत्पर व दर्जेदार आरोग्य सेवा पोहोचवितानाच, राष्ट्रीय आरोग्य कार्यक्रमातील निर्देशकांची तंतोतंत अंमलबजावणी करण्यात वाशिमचे जिल्हा शल्य चिकित्सक (सीएस) डाॅ. अनिल कावरखे राज्यात पाचव्यांदा ‘नंबर वन’वर आहेत. जिल्हा आरोग्य अधिकारी डॉ. प्रेमकुमार ठोंबरे यांनीदेखील दुसऱ्यांदा राज्यात प्रथम क्रमांक मिळविला. जानेवारी महिन्यातील सीएस व डीएसओंच्या प्रथम क्रमांकाच्या रॅंकिंगने राज्यात वाशिमचा आरोग्य विभागच सर्वोत्कृष्ट असल्यावर शिक्कामोर्तब केले.

रुग्णांप्रती आत्मियता, तळमळ, कर्तव्याशी प्रामाणिकता, नाविण्यपूर्ण कार्य करण्याची धडपड, वरिष्ठांशी योग्य समन्वय व सर्व सहकाऱ्यांना सोबत घेऊन चालण्याची सकारात्मक दूरदृष्टी असेल तर अशक्यप्राय वाटणारे कामही सहज सुलभरित्या पुर्णत्वास जाते, याची प्रचिती वाशिमच्या जिल्हा शल्य चिकित्सक ( सीएस) डाॅ. अनिल कावरखे यांच्या काम करण्याच्या शैलीवरून पुन्हा एकदा आली आहे. जिल्हा आरोग्य अधिकारी डाॅ. प्रेमकुमार ठोंबरे यांनीदेखील सरस कामगिरी करीत दुसऱ्यांदा राज्यात प्रथम येण्याचा बहुमान मिळविला आहे. या दोन्ही अधिकाऱ्यांनी जिल्हाधिकारी बुवनेश्वरी एस., जिल्हा परिषदेचे मुख्य कार्यकारी अधिकारी वैभव वाघमारे यांच्या मार्गदर्शनात व सर्व आरोग्य अधिकारी, कर्मचाऱ्यांना सोबत घेऊन आरोग्य संस्थांमध्ये केलेले बदल आणि रुग्णांना पुरविलेली आरोग्य सेवा राज्यात सर्वोत्कृष्ट ठरली.

राष्ट्रीय आरोग्य कार्यक्रमांतर्गत मातृ स्वास्थ्य, मुलांचे आरोग्य, कुटुंबनियोजन यांसह एकूण ३० निर्देशांकाच्या अनुषंगाने आरोग्य विभागाच्या पथकामार्फत डीएचओ व सीएसच्या अधिनस्त असलेल्या आरोग्य संस्थांमध्ये प्रत्यक्ष पडताळणी व पाहणी केली जाते. जानेवारी २०२५ मध्ये विशेष चमूमार्फत सरकारी रुग्णालयांमध्ये पाहणी व पडताळणी केली होती. माता व बालकांना पुरविण्यात येणाऱ्या सेवा, लसीकरण, कुटुंब नियोजन कार्यक्रम, साथरोग प्रतिबंधात्मक उपाययोजना तसेच हृदयरोग, उच्च रक्तदाब, मधुमेही रूग्णांना पुरविण्यात येणाऱ्या आरोग्य सेवा, महिलांची प्रसुती, अद्ययावत डायलिसीस सेवा, कुपोषित बालकांसाठी पोषण पुर्नवसन केंद्र (एन.आर.सी.), क्रिटीकल रुग्णांसाठी आयसीयु तसेच शस्त्रक्रियांकरीता अत्याधुनिक व सुसज्ज शस्त्रक्रियागृह, मोतीबिंदु शस्त्रक्रिया, रक्तपेढी, सोनोग्राफी व सी. टी. स्कॅन यांसह अन्य आरोग्य सेवांमध्ये केलेली कामगिरी कौतुकास्पद व सर्वोत्कृष्ट असल्यावर या पथकाने तपासणीदरम्यान शिक्कामोर्बत केले.

राष्ट्रीय आरोग्य कार्यक्रमांतर्गत निर्देशांक अंमलबजावणीत पाचव्यांदा राज्यात प्रथम येण्याची रेकाॅर्डब्रेक कामगिरीची नोंद वाशिमचे जिल्हा शल्य चिकित्सक डाॅ. अनिल कावरखे यांच्या नावावर झाली आहे. ते स्वत:च शासनाने नेमून दिलेल्या वेळेपूर्वीच जिल्हा सामान्य रुग्णालयात उपस्थित राहत असल्याने इतर अधिकारी व कर्मचारीदेखील शासकीय वेळेचे बंधन पाळत आहेत. रुग्णांशी सौजन्यपूर्ण वागणूक ठेवत आहेत. आरोग्य संस्थांमध्ये मुलभूत व भौतिक सुविधा उपलब्ध होत आहेत. जिल्हा सामान्य रुग्णालयात नियमित साफसफाई, नीटनिटकेपणा प्रकर्षाने दिसून येतो.

जिल्हा आरोग्य अधिकारी डाॅ. प्रेमकुमार ठोंबरे यांनीदेखील ग्रामीण भागातील आरोग्य केंद्रांमध्ये बदल घडवून आणण्यासाठी ठोस कार्यवाही केली. यामुळेच सर्वसामान्य नागरिकांचा आरोग्य सेवेवर विश्वास बसल्याने सरकारी आरोग्य संस्थांमध्ये रुग्णसंख्या प्रचंड वाढत आहे. या दोघांचे परिश्रम आता चांगलेच फळास आले असून, याचीच पोचपावती म्हणून पाचव्यांदा राज्यात आरोग्य विभागाच्या कामगिरीत वाशिम जिल्हा प्रथम आला आहे.

सरकारी आरोग्य सेवेचा लाभ सर्वसामान्य व गरजू रुग्णांपर्यंत पोहोचविण्याचा प्रामाणिक प्रयत्न केला जात आहे. आरोग्य सेवेच्या बळकटीकरणासाठी जिल्हाधिकारी बुवनेश्वरी एस. मॅडम व मुख्य कार्यकारी अधिकारी वैभव वाघमारे सरांचे वेळोवेळी मार्गदर्शन लाभत आहे. वैद्यकीय अधिकारी व कर्मचाऱ्यांचेदेखील पूर्ण सहकार्य मिळत आहेत. सर्वांच्या प्रयत्नातूनच राज्यात वाशिमचा आरोग्य विभाग सरस ठरत आहे, याचा आम्हाला अभिमान वाटतो. यापुढेही अधिक प्रभाविपणे आरोग्य सेवा पुरविण्याला आमचे सर्वोच्च प्राधान्य राहणार आहे.