अहेरी,दि.-5 :गडचिरोली जिल्ह्याच्या दक्षिण भागातील महत्वपूर्ण शहर अहेरी येथील उपजिल्हा रूग्णालयात आज दुपारी १.३० वाजता शाॅर्ट सर्कीट झाल्याने आग लागली. या आगीमध्ये रुग्णालयाचे मोठे नुकसान झाल्याची माहिती प्राप्त झाली असून रूग्ण, अधिकारी व कर्मचारी सुरक्षित असल्याचे सांगण्यात येत आहे यात कोणतीही जिवितहाणी झाली नाही.तरी टेलिमेडिसीन रुममधील संगणक, सोनोग्राफी मशिन, एअर कंडिशनर असे जवळपास ५० लााखांचे साहित्य जळून खाक झाले.
विद्युत तारांमधील शॉर्ट सर्किटने ही आग लागली. ५० खाटांच्या या रुग्णालयात जवळपास ७० रुग्ण भरती होते. टेलिमेडिसीन रुममधील विद्युत तारांनी पेट घेतल्याचे लक्षात येताच सर्व रुग्णांना बाहेर काढण्यात आले. महावितरण कंपनीच्या कर्मचाºयांनी माहिती मिळताच विद्युत पुरवठा खंडित केला. त्यानंतर रुग्णालयातील अग्निशमन यंत्रांनी आणि टाकीतील पाण्याचा मारा करून आगीवर नियंत्रण मिळविण्यात आले. विशेष म्हणजे आग विझविण्यासाठी अहेरी नगर पंचायतची अग्निशमन यंत्रणा पूर्णपणे कुचकामी ठरली. सात महिन्यांपूर्वीच नगर पंचायतला ८५ लाख रुपयांच्या खर्चातून अग्निशमन वाहन देण्यात आले. मात्र प्रशिक्षित कर्मचारीच नसल्यामुळे हे अग्निशमन वाहन शोभेचे ठरले. ही आग विझविण्यासाठी त्याचा काहीही उपयोग होऊ न शकल्यामुळे संताप व्यक्त केला जात आहे.
जि.प उपाध्यक्ष अजय कंकडालवार यांनी नगरपंचायकडे अग्निशमन दलाची गाडी असून सुद्धा आली नाही या बाबत खंत व्यक्त केली. तसेच नगर पंचायतचे नगराध्यक्षा प्राजक्ता पेदापलीवार, नगरसेवक अमोल मुक्कावार, शैलेश पटवर्धन, मालूताई इस्टाम यांनी रुग्णालयात धाव घेत भेट दिली.
रुग्णालयाची वायरिंग खूप जुनी आहे. मशिनरी आधुनिक लागल्या असल्यामुळे त्याअनुषंगाने वायरिंगमध्ये योग्य तो बदल करणे गरजेचे आहे. वायरिंग दुरूस्तीसाठी यापूर्वीच जिल्हा शल्य चिकित्सकांकडे निधीची मागणी केली आहे. मात्र निधी मिळाला नसल्यामुळे दुरूस्ती होऊ शकली नाही. डॉ.कन्ना मडावी, अधीक्षक, उपजिल्हा रुग्णालय, अहेरी
