अर्थमंत्री मुनगंटीवार आमदार असताना त्यांनी जुनी पेन्शन योजना लागू करण्यासाठी पाठपुरावा केला होता. मात्र, राज्यात त्यांचे सरकार आल्यानंतर आणि राज्याचे अर्थमंत्री झाल्यानंतर त्यांनी या मागणीकडे सपशेल दुर्लक्ष केले. ते योजना लागू कारण्यास टाळाटाळ करत आहेत, असा आरोप यावेळी करण्यात आला. यामध्ये नागपूर विभागातील विविध जिल्ह्यातील वेगवेगळ्या विभागातील राज्य कर्मचारी सहभागी झाले होते.
आझाद बगीच्यापासून मोर्चाला सुरुवात झाली. अर्थमंत्री मुनगंटीवार यांच्या घरासमोर आंदोलनकर्ते पोहोचल्यावर येथे एका पेटीत गुलाबपुष्प आणि जुनी पेन्शन योजना लागू करण्याचे विनंतीपत्र टाकण्यात आले. यानंतर गांधी चौक, जटपुरा गेट मार्गे जिल्हाधिकारी कार्यालयासमोर मोर्चा नेण्यात आला. यानंतर जिल्हाधिकारी डॉ. कुणाल खेमणार यांच्या माध्यमातून सुधीर मुनगंटीवार यांना निवेदन देण्यात आले.
