नागपूर,दि.22 : नागो गाणार यांना विधान परिषद निवडणुकांसाठी उमेदवारी देण्याच्या मुद्यावरून महाराष्ट्र शिक्षक परिषदेत फूट पडली आहे. भंडारा जिल्ह्यातील वरठीमध्ये परिषदेच्या नागपूर विभागाच्या बैठकीत परिषदेतर्फे वर्धा जिल्ह्याच्या शेषराव बीजवार यांना उमेदवार घोषित करण्यात आले आहे. या निर्णयामुळे विद्यमान आमदार नागो गाणार यांच्या अडचणी वाढल्या आहेत. परिषदेच्या समर्थनामुळेच गाणारांनी मागील निवडणूक जिंकली होती.विभागीय अध्यक्ष उल्हास फडके यांनी बीजवार यांना उमेदवारी मिळाल्याच्या वृत्ताला होकार दिला. सध्या ते मतदार नोंदणीच्या कामात लागले आहेत.

 परिषदेच्या नागपूर विभागाचे पदाधिकारी संघटनेशी जुळलेल्या सदस्यांना याची माहिती देत आहेत. परिषदेच्या नागपूर विभागाचे अध्यक्ष डॉ.उल्हास फडके व कार्यवाह सुदाम काकपुरे  वृत्ताला दुजोरा दिला. गाणार नागपूर विभागातून उमेदवार नाहीत. संघटनेने बीजवार यांना उमेदवारी दिली आहे. ३ सप्टेंबर रोजी पुण्यात राज्य कार्यकारिणीने गाणार यांना उमेदवारी दिलेली नाही, असे त्यांनी स्पष्ट केले. परिषदेच्या मतदारांमध्ये संभ्रम निर्माण करण्याचा प्रयत्न करण्यात येत आहे. प्रत्यक्षात राज्य कार्यकारिणीच अवैध आहे. या कार्यकारिणीचा कार्यकाळ २०१४ मध्येच संपला. त्यामुळे आता कार्यकारिणीला निवडणूक कार्यात हस्तक्षेप करण्याचा अधिकार नाही, असे सांगितले.

विधान परिषदेच्या शिक्षक मतदारसंघाची निवडणूक पुढील महिन्यात होणार आहे. परिषदेच्यावतीने नागो गाणार यांना परत उमेदवारी देण्यासंदर्भात नागपूर विभागीय अध्यक्षांसमवेत कार्यकारिणीच्या सर्व पदाधिकारी व सदस्यांमध्ये नाराजीचा सूर आहे. याअगोदर सर्वांनी पदाचा राजीनामादेखील दिला होता. सोबतच ३ सप्टेंबर रोजी पुण्यात होणाऱ्या परिषदेच्या राज्यस्तरीय बैठकीत गाणार यांना उमेदवारी देण्याच्या विरोधात अविश्वास प्रस्ताव आणण्याचादेखील निर्णय घेतला होता. पुण्यात झालेल्या बैठकीत या निर्णयाला अमान्य करण्यात आले.

नागपूर ,दि.22: गुन्हे शाखा पोलिसांनी एका अल्पवयीन मुलीकडून देह व्यापार करवून घेणाऱ्या तीन आरोपींना पकडले.पोलिसांना वैशालीनगर येथील नासुप्रच्या मैदानाजवळील एका घरात देह व्यापार चालत असल्याची माहिती मिळाली. बुधवारी सायंकाळी पोलिसांनी डमी ग्राहक पाठवला. देह व्यापार सुरु असल्याची खात्री पटल्यावर पोलिसांनी धाड टाकली. या अड्ड्याची प्रमुख नीलेश अंतू कुडकी आणि त्याची नातेवाईक सारिका बच्चू कुडकी यांना अटक केली. तसेच दोघांनाही ग्राहक उपलब्ध करून देणाऱ्या लालचंद खरपत यादव यालाही पकडले. 
यादव हा नारळ पाणी विक्रीचा व्यवसाय करतो. नीलेश व सारिका घर भाड्याने घेऊन ग्राहकांना जागा उपलब्ध करून देत होते. दोघेही झारखंडचे राहणारे आहेत. त्यांच्याजवळ एक अल्पवयीन मुलगी सुद्धा सापडली. आरोपींच्या विरुद्ध पीटा अंतर्गत गुन्हा दाखल करण्यात आला.निरीक्षक पंडित सोनवणे यांच्या मार्गदर्शनात हवालदार गोपाल वैद्य, नायक शिपाई मनोज सिंह चव्हाण, अजय ठाकूर प्रफुल्ल बोंद्रे यांनी ही कारवाई केली. 

गोंदिया ,दि.22-: दक्षिण-पूर्व-मध्य रेल्वेच्या नागपूर विभागात सर्वाधिक उत्पन्न देणारे स्थानक म्हणून गोंदियाची ओळख आहे. परंतु रेल्वे स्थानकावर प्रवेश करण्यासाठी प्रवाशांना मोठ्या अडचणींचा सामना करावा लागत आहे. लोखंडी कटघरे व बंद असलेल्या लोखंडी गेट यामुळे प्रवाशांना लांब अंतर पायी चालत जावून स्थानकात प्रवेश करावा लागतो.

गोंदिया रेल्वे स्थानकात दरवर्षी कोट्यवधी रूपयांच्या तिकिटा विक्री होतात. लाखो रूपये विशेष तपास अभियानांतर्गत रेल्वेला उपलब्ध होतात. परंतु प्रवासी सुविधांच्या नावावर अडचणी तयार करण्यात रेल्वेचे अधिकारी कुशल आहेत, असा आरोप ड्रामाने (डेल्वी रेल्वे मुव्हर्स असोसिएशन) केला आहे.

बाजारा परिसराच्या रेल्वेच्या मुख्य प्रवेशद्वाराला लोखंडी पाईपने बेरिकेटिंग करण्यात आले आहे. चारही बाजूंना लोखंडी मोठमोठे पाईप लावून अडचणी निर्माण केल्या आहेत. गोंदियामध्ये लोखंडी गेट लावून कार, आॅटो, रिक्षा व इतर प्रवासी वाहनाने आपले लगेज घेवून पोर्चपर्यंत जावू दिले जात नाही. गोंदियात लोखंडी बेरिकेट्सशिवाय मोठे लोखंडी गेट लावण्यात आले आहेत. हे गेट नेहमीच बंद असतात. वृद्ध, महिला व बालकांना पोर्चपासून दूर अंतरावर उतरावे लागते. तसेच धावत जावून व पाईपवरून उडी घेवून आपला लगेज घेवून जावे लागते. जर पाऊस येत असेल तर आणखी समस्या उत्पन्न होते. अनेकदा रेल्वे अधिकारी व संसद सदस्यांना याकडे लक्ष देण्याची मागणी करण्यात आली. परंतु त्यांनी लक्ष न दिल्याने जनतेला समस्या सहन करावी लागत आहे.ड्रामाचे अध्यक्ष गोपाल अग्रवाल यांनी रेल्वे प्रशासनाला पुन्हा निवेदन दिले आहे. त्यात दोन्ही लोखंडी गेट मार्गावरून हटविण्याची मागणी आहे.