गोंदिया दि.०६–सरकारी-निम सरकारी, जिल्हा परिषद, शिक्षक-शिक्षकेत्तर, नगरपालिका-नगरपरिषदा कर्मचारी समन्वय समितीची सभा दिनांक 6 जुलै 2025 रोजी मध्यवर्ती संघटनेचे कार्यालय गोंदिया येथे संपन्न झाली. महाराष्ट्र शासनाचे आपल्या प्रलंबित मागण्यांबाबत उदाशिन धोरण दिसुन येत आहे. नवागत सरकार स्थापण झाल्यावर सहा महिण्याचा कालावधी लोटुन गेला मधल्या कालावधीत  मुख्यमंत्री पातळीवर चर्चा करुन ठोस निर्णय घेण्यात यावे यासाठी राज्य संघटनेमार्फत सातत्याने वारंवार पत्रव्यवहार करण्यात आला. परंतु संघटनात्मक प्रयत्नांना वाटाण्याच्या अक्षता लावण्यात आली. प्रलंबित मागण्याबाबत कर्मचारी वर्गात असंतोषाची भावना निर्माण झालेली आहे. शासनाचे मात्र या संदर्भात उदाशिन धोरण दिसून येत आहे.

देशातील प्रधान 11 कामगार संघटनांच्या वतीने दिनांक 09 जुलै 2025 रोजी देशव्यापी संप पुकारण्यात आला आहे. मार्च 2023 मध्ये झालेल्या बेमुदत संपाच्या पार्श्वभूमिवर दिलेल्या आस्वासनाची पुर्तता अद्यापर्यन्त शासन स्तरावरुन करण्यात आली नाही त्यामुळे कर्मचारी वर्गात संतापाची लाट उमलली आहे. तसेच शासनाने दिनांक 6 सप्तेंबर 2023 रोजी शासन निर्णय काढून राज्यातील सर्व विभागातील वर्ग 1 ते 4 पर्यन्त कर्मचारी कंत्रााटी कामगार नऊ कंपनीकडून भरण्याचे आदेश काढले आहे. त्यामुळे भविष्यात सरकारी कर्मचारी राहणार नसून सर्व कंत्रााटी कामगार असतील अशा शासनाच्या धोरणामुळे फारच भयानक परिस्थिती निर्माण होणार आहे त्यामुळे प्रलंबित 20 मागण्या बाबत दिनांक 09 जुलै 2025 रोजी दुपारी 1 ते 3 या दरम्यान मध्यवर्ती संघटनेचे निमंत्रक लिलाधर पाथोडे यांचे नेतृत्वात जिल्हाधिकारी व जिल्हा परिषद कार्यालयासमोर भव्य निदेर्शने करण्यात येणार आहेत. व  जिल्हाधिकारी व कार्यकारी अधिकारी यांचे मार्फत  मुख्यमंत्री यांना मागण्यांचे निवेदन सादर करण्यात आले.
समन्वय समिती सभेमध्ये मध्यवर्ती संघटनेचे अध्यक्ष चंद्रशेखर वैद्य, निमंत्रक लिलाधर पाथोडे, जिल्हा परिषद कर्मचारी महासंघाचे राज्य उपाध्यक्ष व जिल्हा अध्यक्ष पी.जी.शहारे, कमलेश बिसेन जिल्हाध्यक्ष ग्राम पंचायत अधिकारी यूनियन यांचे समवेत आशिष रामटेके, संतोष तोमर, सौरभ अग्रवाल, भगीरथ नेवारे, राकेश डोंगरे, रमेश नामपल्लीवार, तु.बा.झंजाड, विस्वनाथ कापगते, डी.एल.गुप्ता, उमेश कावरे, सुरेश आष्टिकर, नितेश बांते, जितेंद्र अदमाने, विदेश सासरे, मोहनलाल पटले, यासह जिल्हयातील विविध विभागातील मोठया संख्येने शासकिय कर्मचारी, जिल्हा परिषद कर्मचारी उपस्थित होते.

गोंदिया – शहरातील सहेजपूर दांडेगाव येथील रहिवासी सलोचना रंजनकुमार नागपुरे (वय ३९ वर्षे) यांची तब्येत अचानक खालावल्याने त्यांना मीरावत हॉस्पिटल येथे डॉ. वैद्य यांच्या देखरेखीखाली दाखल करण्यात आले. उपचारादरम्यान डॉक्टरांनी सांगितले की रुग्णाच्या शरीरात रक्ताची तीव्र कमतरता आहे आणि तातडीने AB- निगेटिव्ह रक्ताची गरज आहे. हा रक्तगट अत्यंत दुर्मिळ असून हजारो लोकांमध्ये एखाद्याचामध्ये आढळतो.

परिवारातील सदस्यांनी रक्तमित्र विनोद चांदवानी (गुड्डू) यांच्याशी संपर्क साधला. माहिती मिळताच विनोद चांदवानी यांनी तात्काळ त्यांच्या नियमित AB- रक्तदात्यांच्या यादीतील शाम नोतानी यांच्याशी संपर्क साधून परिस्थितीची माहिती दिली.

शाम नोतानी यांनी क्षणाचाही विलंब न करता लोकमान्य ब्लड बँक येथे जाऊन AB- रक्तदान करून माणुसकीचे उदाहरण साकारले. त्यांच्या या रक्तदानामुळे रुग्णाचे प्राण वाचले.

या प्रेरणादायी आणि मानवीय कार्याबद्दल विनोद चांदवानी (गुड्डू) व अपूर्व लिलहारे यांनी शाम नोतानी यांना प्रमाणपत्र देऊन सन्मानित केले.

नागपुरे कुटुंबियांनी रक्तदाता शाम नोतानी तसेच रक्त समन्वयक विनोद चांदवानी यांचे मनःपूर्वक आभार मानले व समाजासाठी हे कार्य प्रेरणादायी असल्याचे नमूद केले.

*जि.प.सदस्य किरण पारधी यांचा पुढाकार
चित्रा कापसे
तिरोडा–तालुक्यातील मिनी पंढरपूर समजल्या जाणाऱ्या बेलाटी बु.येथे आषाढी एकादशी निमित्ताने जिल्हा परिषद सदस्य किरण पारधी यांनी श्री विठ्ठलरुक्माईची पूजा अर्चना करून अनेक विकास कामाचे भूमिपूजन केले.

भूमिपूजनाचे उद्घाटन टिकास मारून जि प सदस्य किरण पारधी, प.स. सदस्य पिंटू चौधरी, गावातील सरपंच सौ. स्वातीबाई चौधरी, उपसरपंच मोरेश्वर आगाशे, सर्व ग्रामपंचायत सदस्य गावकरी बांधव, शाळेतील सर्व शिक्षक वर्ग मोठ्या संख्येने उपस्थित होते विठ्ठल रुक्मिणी देवस्थान समितीचे सर्व सदस्य अध्यक्ष उपस्थित होते.
या विविध कामांचे भूमिपूजनात जिल्हा परिषद पंधरावे वित्त निधीतून बंदिस्त नाली बांधकाम ५ लाख रुपये, आरो प्लांटचा लोकार्पण (खासदार सुनील मेढे यांच्या प्रयत्नातून) पंचायत समिती निधीतून शौचालय दुरुस्तीचे काम, वृक्षारोपण करण्यात आले. कार्यक्रमाचे संचालन मोरेश्वर आगाशे व आभार प्रदर्शन पिंटू चौधरी यांनी केले
याप्रसंगी गाव सदैव सुख शांती समाधानाने व समृद्धीने पूर्ण रहावे म्हणून विठ्ठल रुक्मिणी च्या चरणी गावातील सरपंच उपसरपंच यांनी साकडे घातले.

मुख्याधिकारी मालकर व कंत्राटदारांची उपस्थिती
नगरपरिषद क्षेत्रातील रस्त्यांच्या प्रश्नावरही चर्चा
चित्रा कापसे
तिरोडा–भुयारी गटार योजनेच्या अंमलबजावणीबाबत नागरिकांच्या तक्रारी व प्रश्नांच्या पार्श्वभूमीवर आज आमदार विजय रहांगडाले यांच्या उपस्थितीत एक महत्त्वपूर्ण बैठक घेण्यात आली. या बैठकीत नगरपरिषदेचे मुख्याधिकारी मालकर तसेच कामाचे कंत्राटदार उपस्थित होते.

बैठकीत नागरिकांनी गटार योजनेमुळे निर्माण झालेल्या समस्यांबाबत आपली नाराजी व्यक्त केली. अनेक रस्ते खोदले गेले असून योग्य दुरुस्ती न झाल्याने जनतेला नाहक त्रास सहन करावा लागत आहे. यावर आमदार श्री. रहांगडाले यांनी स्पष्ट शब्दात कंत्राटदार व प्रशासनाला सूचना दिल्या की काम दर्जेदार आणि वेळेत पूर्ण झाले पाहिजे.शुक्रवार पर्यंत वेळ देवून रसत्याची डागडुजी करुण सुररित करण्याचे कंट्रातदार ला आमदार यानी बजावले

याच बैठकीत नगरपरिषद क्षेत्रातील रस्त्यांची अवस्था देखील चर्चेचा विषय ठरली. अनेक भागांतील रस्ते खड्डेमय असून पावसाळ्यात नागरिकांना मोठ्या अडचणींना सामोरे जावे लागत आहे. या समस्येवर लवकरात लवकर उपाययोजना करण्याचे आश्वासन मुख्याधिकारी मालकर यांनी दिले.

गोंदिया, दि.०५- पंजाबराव देशमुख कृषी विद्यापीठ संलग्न हिराटोला येथील मनोहरभाई पटेल कृषी महाविद्यालयाच्या विद्यार्थिनींनी काल शुक्रवारी (दि.०४) आमगाव तालुक्यातील बाम्हणी गावातील शेतशिवाराला भेट दिली.

मनोहरभाई पटेल कृषी महाविद्यालयाचे प्राचार्य एस सी अवताडे, कार्यक्रम समन्वयक मिथून भगत कार्यक्रम अधिकारी कमलेश चव्हाण सहप्रमुख सुयोग उराडे यांचे मार्गदर्शनाखाली हिराटोला येथील मनोहरभाई पटेल कृषी महाविद्यालयाचे विद्यार्थी सध्या आमगाव तालुक्यातील शेतकऱ्यांना  शेतीविषयक मार्गदर्शन, आधुनिक तंत्रज्ञान आणि जलव्यवस्थापन आदी विषयांवर शेतकऱ्यांना सल्ला व मार्गदर्शन करीत आहेत

.याचाच एक भाग म्हणून कृषिमहाविद्यालयाच्या विद्यार्थिनी सृष्टी भदाडे, तेजस्विनी बिसेन, सुहानी भुसारी, विशाखा आंबेडारे, वैदवी भरणे यांनी बाम्हणी येथील शेतकरी कालिचरण भिमटे यांच्या शेतशिवारास भेट दिली. या भेटीत या विद्यार्थिनिंनी त्यांच्या शेतातील शेततळ्याची पाहणी केली. यावेळी श्री भिमटे यांना या विद्यार्थिनींनी जलसिंचनासाठी शेततळे कसे उपयुक्त आहे, ते पटवून देत जलव्यवस्थापनाविषयी त्यांचे मार्गदर्शन केले. यावेळी श्री भिमटे यांनी विचारलेल्या प्रश्नांना या विद्यार्थ्यांनी समर्पक उत्तरे देत त्यांचे शंका समाधान केले. याशिवाय यावेळी त्या विद्यार्थ्यांनी शेतीविषयक माहिती, पर्यावरणाचे महत्व, जैविक तंत्रज्ञान, शेतीचे आधुनिक प्रकार आदी विषयावर सविस्तर मार्गदर्शन केले.

गोरेगाव (प्रतिनिधी) — “एक पेड माॅ के नाम” या अभिनव उपक्रमांतर्गत पी. डी. राहांगडाले विद्यालय व कनिष्ठ महाविद्यालय, गोरेगाव येथे वृक्षारोपणाचा कार्यक्रम उत्साहात पार पडला.

या उपक्रमाचे उद्घाटन विद्यालयाचे प्राचार्य सी. डी. मोरघडे यांच्या अध्यक्षतेखाली करण्यात आले. विद्यार्थ्यांनी आपल्या मातेसम प्रेम व्यक्त करत तिच्या नावे एक झाड लावले. या माध्यमातून पर्यावरण संवर्धनासोबतच मातृप्रेमाचा भावही जपण्यात आला.कार्यक्रमामध्ये शिक्षक, शिक्षकेत्तर कर्मचारी व विद्यार्थी मोठ्या संख्येने सहभागी झाले होते. पर्यवेक्षक ए एच कटरे यांनी वृक्षांचे महत्त्व सांगत विद्यार्थ्यांना दरवर्षी एक झाड लावण्याचे व त्याचे पालनपोषण करण्याचे आवाहन केले.

कार्यक्रमाचे संयोजन सौ. ए एस बावनथडे यांनी केले. शेवटी सर्वांनी झाडांच्या संगोपनाची जबाबदारी घेण्याचा निर्धार व्यक्त केला.