भंडारा : मागील तीन दिवसांपासून जिल्ह्यात पाऊस सुरू आहे. या पावसामुळे वैनगंगा नदी भरून वाहत असून गोसेखुर्द धरणाचा जलस्तर वाढला आहे. धरणाचा जलस्तर २४१.५00 मीटरवर स्थिर ठेवण्यासाठी धरण विभागाने ३३ पैकी २९ दरवाजे अर्धा मीटरने सुरू केले आहे. या दरवाजामधून १ लाख ४,५३२ क्युसेस पाण्याचा विसर्ग सुरू आहे. या धरणामुळे गडचिरोली जिल्ह्यात पूर येण्याची शक्यता बळावली आहे. वैनगंगा नदीच्या वरच्या भागात शनिवारपासून संततधार पाऊस सुरू आहे. त्यामुळे सीमावर्ती भागात नदी-नाले आणि धरणाचा जलस्तर वाढला आहे. संभावित पूरस्थिती नियंत्रित करण्यासाठी गोंदिया जिल्ह्यातील पुजारीटोला, कालीसराड आणि सिरपूर जलाशयाचे दरवाजे सुरू केल्यामुळे पाणी वैनगंगा नदीत सोडण्यात आले आहे.
कालीसराड धरणाचे दोन दरवाजे १.६0 मीटर, पुजारीटोला धरणाचे १0 दरवाजे १.२0मीटर तर सिरपूर धरणाचे ६ दरवाजे 0.३0 मीटरने सुरू केले आहे. त्यामुळे वैनगंगा नदीचा जलस्तर वाढत असून गोसेखुर्द धरणाचा जलस्तर वाढत आहे.
गोसेखुर्द धरणाचा वाढता जलस्तर लक्षात घेता ३३ दरवाजांपैकी २९ दरवाजे सोमवारच्या रात्री ११ वाजता अर्धा मीटरने सुरू करण्यात आले. या दरवाजांमधून १ लाख ४.५३२ क्युसेस पाण्याचा विसर्ग सुरू आहे. मंगळवारला सकाळी कारधा नदी पुलावर वैनगंगा नदीचा जलस्तर ४.९७ मीटर नोंदविण्यात आला असून ९ मीटर या धोक्याच्या पातळीपासून ४ मीटरने खाली आहे.

तिरोडा : शुक्रवारी ९ सप्टेंबरला गोंडमोहाडी येथे शेतकरी मेळावा घेण्यात आला. यात धानपिकांवर लागणारे रोग, रोगांवरील औषधींचे नावे व किती प्रमाणात औषधी फवारणी करावी तसेच धानपिकांना कोणत्या प्रकारे रोग लागण्याची शक्यता असते व उपाययोजना यावर शेतकऱ्यांशी प्रत्यक्ष चर्चा करून त्यांच्या समस्यांचे निराकरण करण्यात आले.

यावेळी आ. विजय रहांगडाले यांनी शासनाच्या शेतीविषयक योजना व इतर योजनांचा लाभ घेण्यास जनतेस प्रवृत्त केले. अध्यक्षस्थानी आ. विजय रहांगडाले होते. मार्गदर्शक म्हणून तालुका कृषी अधिकारी पोटदुखे तसेच प्रमुख पाहुणे म्हणून कृषी उत्पन्न बाजार समितीचे प्रशासक चिंतामन रहांगडाले, भाजपा तालुका अध्यक्ष भाऊराव कठाणे, जिल्हा किसान आघाडीचे महामंत्री चतुर्भुज बिसेन व समस्त गावकरी उपस्थित होते.

गोरेगाव,दि.१३-गोंदिया जिल्हा परिषदेच्या वित्त विभागार्तंगत कार्यरत फनेंद्र हरिणखेडे यांची तिरोडा पंचायत समिती येथून गोरेगाव पंचायत समितीमध्ये कनिष्ठ लेखाधिकारी या पदावर पदोन्नती झाली आहे.हरिणखेडे यांनी ३१ ऑगस्ट रोजी गोरेगाव ंपंचायत समितीमध्ये कनिष्ठ लेखाधिकारी पदाची जबाबदारी स्विकारली असून त्यांचे अभिनंदन करण्यात येत आहे.