नागपूर,दि.30 – डोळ्यावर शस्त्रक्रियेपूर्वी रुग्णाला देण्यात येणाऱ्या इंजेक्शनसाठी रुग्णाच्या नातेवाइकाकडून तीन हजार रुपयांची लाच घेताना मेडिकलच्या दोन डॉक्टरांना लाचलुचपत प्रतिबंधक विभागाने (एसीबी) रंगेहात पकडले. एसीबीने ही कारवाई सोमवारी रात्री दहा वाजताच्या सुमारास केली. डॉ. वंदना अय्यर (वय ३५) आणि डॉ. स्वानंद शैलेश प्रधान (वय २६) अशी लाचखोर डॉक्टरांची नावे आहेत. या घटनेमुळे मेडिकलमध्ये एकच खळबळ उडाली होती.
तक्रारदार संदीप पांडे हे खासगी कंपनीत मजूर आहेत. त्यांनी पत्नीला मेडिकलमधील नेत्र विभागात दाखवले. तेथील डॉक्टरांनी डोळ्याचा रेटिना खराब असल्याचे सांगून शस्त्रक्रिया करण्याची तयार दर्शविण्यास सांगितले. त्यासाठी डॉक्टरांनी नेत्रविभागातील प्रा. डॉ. वंदना अय्यर आणि डॉ. स्वानंद प्रधान यांनी डोळ्यात देण्यात येणाऱ्या अवास्तिंज नावाचे औषध बाहेरून आणण्यास सांगितले. त्या इंजेक्शनची किंमत जवळपास २४ हजार रुपये आहे. आर्थिक स्थिती खराब असल्यामुळे पांडे यांनी डॉक्टरांना सांगितले. डॉक्टरांनी २२ जानेवारीला पत्नीसह येण्यास सांगितले. त्यावेळी डॉ. वंदना आणि डॉ. स्वानंद यांनी इंजेक्शन देण्यासाठी तीन हजार रुपयांची मागणी केली. मात्र, पैसे नसल्याचे सांगताच डॉक्टरांनी इंजेक्शन देण्यास नकार दिला. पांडे यांनी एसीबी कार्यालयात लाच मागितल्याची लेखी तक्रार केली.