बीड, दि. १२ – बीड जिल्ह्यातील परळी येथे अठरा एकर क्षेत्रावर उभारण्यात आलेल्या गोपीनाथ गड या लोकनेते गोपीनाथराव मुंडे यांच्या भव्य स्मारकाचे लोकार्पण आज भाजपा अध्यक्ष अमित शाह यांच्या हस्ते करण्यात आले आहे. मुंडे यांच्या भव्य पुतळ्याचे अनावरण करण्यात आले, यावेळी मुख्यमंत्री देवेंद्र फडणवीस उपस्थित होते.
मुंडे यांच्या पहिल्या जयंतीनिमित्त वैद्यनाथ सहकारी साखर कारखान्याच्या परिसरात हे प्रेरणास्थळ उभारण्यात आले आहे. प्रज्ञा गोपीनाथ मुंडे तसेच गोपीनाथ मुंडे यांच्या कन्या ग्रामविकासमंत्री पंकजा मुंडे, खासदार डॉ. प्रीतम मुंडे व यशःश्री मुंडे यांनी या कार्यक्रमाचे आयोजन केले.
गोपीनाथ गड या नावाने हे प्रेरणास्थळ उभारण्यात आले आहे. लोटस टेंपल नावाने मुंडे यांचे समाधी स्थळ उभारण्यात आले आहे. कमळाप्रमाणे त्याची प्रतिकृती साकारली असून ७२ फुट उंच आणि १११ फुट अष्टकोनी घेर असलेले हे कमळाचे फुल पाहणा-याचे लक्ष वेधून घेत आहे. लोकनेते गोपीनाथराव मुंडे यांचा २२ फूट उंचीचा पंचधातूचा भव्य पुतळा उभारण्यात आला असून पुतळ्याच्या चबुतऱ्याची उंची दहा फूट आहे.
परळी वैजनाथ येथील वैद्यनाथ साखर कारखान्याच्या भव्य मैदानावर गोपीनाथ मुंडेंवर जेथे अंत्यसंस्कार करण्यात आले.
त्याठिकाणी समाधीस्थळ उभारण्यात आले आहे. याच मैदानाच्या 12 एकर जागेत गोपीनाथ गड उभारला गेला आहे.
– या स्मारकात गोपीनाथ मुंडे यांच्या जीवनातील 18 ते 20 महत्त्वाचे प्रसंग विविध माध्यमातून साकारण्यात आले आहे.
– या गडात एक मेडिटेशन सेंटर उभारण्यात आले असून तेथे 30 फुटी पुतळा उभारण्यात आला आहे.
– या गडात 12 ज्योतिलिंर्गाचे दर्शन घडवणारी एक विशेष डार्क राइडही असणार आहे.
– या स्मारकात मुंडे यांच्या जीवनपटासह स्पर्धा परीक्षेची तयारी करणा-या तरूणांसाठी एक अद्ययावत प्रशिक्षण केंद्र आहे.
– गेल्या वर्षी गोपीनाथ मुंडे यांच्या जन्मदिनी म्हणजेच 12 डिसेंबर 2014 रोजी मुख्यमंत्री देवेंद्र फडणवीस आणि पंकजा मुंडे यांच्या हस्ते या स्मारकाचे भूमिपूजन व पायाभरणी समारंभ झाला होता.
– पुण्यातील गार्डियन कॉर्पोरेशनच्या ‘गार्डियन मिडिया अॅंड एन्टरटेन्मेंट’ या कंपनीने हे स्मारक उभारले आहे.
