नवी दिल्ली – राष्ट्रीय स्वयंसेवक संघाच्या विरोधात केलेल्या वक्तव्याप्रकरणी कॉंग्रेसचे उपाध्यक्ष राहुल गांधी यांनी माफी मागण्याचा प्रश्नच येत नाही, अशी प्रतिक्रिया पक्षातर्फे देण्यात आली.
आपल्या विधानाच्या समर्थनासाठी ते योग्य वेळी ऐतिहासिक तथ्ये आणि पुरावे सादर करतील. अशा प्रकारची सूचना यापूर्वीही करण्यात आली होती, मात्र ती राहुल यांनी फेटाळून लावली होती, अशी माहिती कॉंग्रेसचे मुख्य प्रवक्ते रणदीप सुरजेवाला यांनी दिली. हे प्रकरण न्यायालयात प्रलंबित असल्यामुळे त्याविषयी अधिक बोलणे उचित होणार नाही, असे सुरजेवाला म्हणाले.
महात्मा गांधींच्या हत्येमागे राष्ट्रीय स्वयंसेवक संघ असल्याचा आरोप करणारे कॉंग्रेस उपाध्यक्ष राहुल गांधी यांना सर्वोच्च न्यायालयाने “संघाची माफी मागा; नाही तर खटल्याला तोंड द्या‘ असे फटकारले आहे. तर, कॉंग्रेसने या निमित्ताने पुन्हा एकदा धर्मनिरपेक्षतेचा पत्ता खेळण्याचे ठरविले असून, “राहुल गांधी माफी मागणार नाहीत, न्यायालयात ऐतिहासिक पुरावे सादर करतील‘, असे बजावले आहे.
