विशेष प्रतिनिधी
मुंबई,berartimes.com दि. 21-: राज्याच्या महिला आणि बालकल्याण मंत्री पंकजा मुंडे यांनी राष्ट्रवादीचे नेते आणि माजी सार्वजनिक बांधकाम मंत्री छगन भुजबळ यांची जेजे हॉस्पिटलमध्ये जाऊन भेट घेतली. तब्येतीची विचारपूस केली. सत्ताधारी पक्षाच्या मंत्री पंकजा मुंडे यांच्या या भेटीमुळे राजकीय चर्चांना उधाण आले आहे.
राज्यात एकीकडे मराठा मोर्चाने महाराष्ट्र ढवळून निघाले. तर दुसरीकडे दोन ओबीसी नेत्यांच्या भेटीमुळे राजकारणाच्या सारीपाटावर खळबळ उडालीये. मनी लाँड्रिंग प्रकरणी राष्ट्रवादीचे नेते छगन भुजबळ आर्थर रोड जेलमध्ये न्यायलयीन कोठडीत आहेत. मागील आठवड्यात शनिवारी प्रकृती खालावल्यामुळे त्यांना जेजे हॉस्पिटलमध्ये दाखल करण्यात आले आहे. आज पंकजा मुंडे पालघर दौयावर जाण्याच्या आधी थेट जेजे हॉस्पिटलमध्ये जाऊन भुजबळांची भेट घेतली.
ही भेट राजकीय होती ही कौटुंबिक ? या प्रश्नाभोवती राजकीय चर्चांना उधाण आले आहे. छगन भुजबळ आणि गोपीनाथ मुंडे हे ओबीसी समाजाचे मोठे नेते होते. हे दोन्ही नेते राजकीय विरोधक असले तरी ओबीसी प्रश्नावर एकत्र होते. राज्यात एकीकडे मराठा मोर्च्याने विराट रुपधारण केले आहे. त्या पार्श्वभूमीवर पंकजा मुंडेंच्या भेटीला वेगळे महत्त्व प्राप्त झाले आहे.
