अमरावती – धनुर्विद्येत (आर्चरी) भारताचा दबदबा कायम राखण्याची परंपरा अमरावतीच्या पूर्वशा शेंडे हिने कायम राखली आहे. तायवान येथे झालेल्या एशियन कप स्टेज-२ च्या स्पर्धेत पूर्वशाने रौप्य पदक पटकावले असून, या वर्षाचे हे तिचे सातवे आंतरराष्ट्रीय पदक आहे.
कंपाउंड गटात भारताच्या मुलींच्या संघाने रौप्यपदक पटकावले. तर, वैयक्तिक खेळ प्रकारातसुद्धा पूर्वशाने दोन रौप्यपदके पटकावली. या स्पर्धेतील तिच्या प्रदर्शनामुळे जागतिक क्रमवारीत तिने २७ वे स्थान प्राप्त केले. आजवर अशा पद्धतीने आगेकूच करणारी अमरावतीची पूर्वशा सुधीर शेंडे ही एकमेव खेळाडू ठरली आहे. जागतिक क्रमवारीत पहिल्या ३० खेळाडूंमध्ये अमरावतीच्या खेळाडूचा समावेश झाल्याने येथील क्रीडा जगतात उत्साहाचे वातावरण आहे.
