मुंबई,दि.07 (सुरेश भदाडे)- ओबीसी समाजातील आमदार-खासदार हे फक्त राजकीय पक्षांच्या हाताखालची खेळणी आहेत. या समाजातील लोकप्रतिनिधींनी पक्ष प्रमुखांच्या पुढ्यात नांगी टाकल्याने समाजाची फसगत होत आहे. परिणामी, अशा लाचार आमदार खासदारांकडून ओबीसी बांधवांनी समाज हिताची अपेक्षा ठेवू नये, असे स्पष्ट प्रतिपादन खासदार राजकुमार सैनी यांनी व्यक्त केले.
ते मुंबई येथे आयोजित ओबीसी महासंघाच्या तिसऱ्या राष्ट्रीय अधिवेशनात आपले विचार मांडताना बोलत होते. ते पुढे म्हणाले की, आपल्याला आपला राजकीय वाटा आणि हक्क मिळवून घ्यायचे असतील तर दुसऱ्या पक्षाची गुलामगिरी सोडून स्वतःचा पक्ष निर्माण करावा लागेल. न्याय प्रक्रियेतील आमचा वाटा हिरावल्या गेल्याने आपल्या समाजावर सातत्याने अन्याय होत आला आहे. आता ओबीसी आयोगाल संवैधानिक दर्जा मिळाला असला तरी आयोगाचा अध्यक्ष हा ओबीसीच राहणार का आणि असला तरी तो कोणाच्या इशाऱ्यावर नाचणारा तर नसेल, या बाबत साशंकता कायम आहे. केंद्रात फक्त 12 टक्के ओबीसी नोकरीवर आहेत.माजी खासदार हनुमंतराव म्हणाले, ओबीसी आरक्षणासाठी सर्वपक्षीय लोकांना घेऊन कामाला सुरवात केली. मंडल आयोग सुद्धा लागू झाले .पण, त्याचा लाभ हा मिळालाच नाही. एससीएसटी प्रमाणे ओबीसी संसदीय समिती तयार करण्याचे काम केले.आम्हालाच क्रिमिलेयरची गरज का ? क्रिमिलेयर हटविण्याचे काम का केले जात नाही? क्रिमिलेयर हटवले तर आयएएस-आयपीएस आमची मुले होतील. “वोट हमारा तो राज भी हमारा होना चाहिये”असेही ते म्हणाले
