गडचिरोली द.14: छत्तीसगडच्या बिजापूर जिल्ह्यातील कुटरू परिसरातून माओवाद्यांनी चार पोलिस हवालदारांचे अपहरण केले. ही खळबळजनक घटना सोमवारी सायंकाळी ६ वाजताच्या सुमारास घडली. यातील तीन हवालदार कुटरूत तर एक बेदरे पोलिस ठाण्यात कार्यरत आहे. त्यांना अडपल्लीच्या जंगलात नेल्याची माहिती आहे.
जयदेव यादव, मंगल सोढी, राजू तेला (कुटरू) व रामा मज्जी (बेदरे), अशी अपहरण झालेल्या पोलिस हवालदारांची नावे आहेत. हे चौघेही बिजापूरवरून कुटरुकडे बसने जात होते. ही माहिती माओवाद्यांना मिळताच त्यांनी या मार्गावरील वाहनांची सकनापल्लीजवळ तपासणी सुरू केली. यात हे चौघे हवालदार आढळल्याने त्यांचे अपहरण करण्यात आले. या घटनेनंतर पोलिसांनी स्वबळावर या जवानांची शोध मोहीम हाती घेतली आहे. तीन दिवसांपूर्वी सुकमा जिल्ह्यात एका पोलिस जवानाचे माओवाद्यांनी अपहरण केले होते. त्यांचा अजूनही शोध लागलेला नाही. त्यातच आता या घटनेची भर पडल्याने संताप व्यक्त होत आहे. बसमधून पोलिस प्रवास करीत असतानाही माओवाद्यांनी याची माहिती मिळाल्याने चालकांवर संशय व्यक्त केला जात असल्याची माहिती पोलिस विभागाच्या वरिष्ठ सूत्रांनी दिली आहे.
