टी-१३ वाघीनीला जेरबंद करण्यात वडसा वन विभागाला मिळाले यश

गडचिरोली (विष्णू वैरागडे)– जिल्ह्यातील रामाळा येथील शेतशिवारात धान कापणीसाठी गेलेल्या महिलेवर हल्ला करुन तिचा बळी घेणाऱ्या टी-१३ वाघिणीला मौजा मुलुरचक येथे जेरबंद करण्यात वनखात्याला यश आले. ताडोबा-अंधारी व्याघ्रप्रकल्पाचे पशुवैद्यकीय अधिकारी डॉ. रविकांत खोब्रागडे व नेमबाज अजय मराठे यांच्या चमूने ही कामगिरी केली. मानव-वन्यजीव संघर्षात आतापर्यंत ६० वाघांना त्यांनी जेरबंद केले.

19.10.2023 रोजी श्रीमती ताराबाई एकनाथ धोडरे, वय 76 वर्ष, रा. आरमोरी (काळागोटा) यांना शेत सके क्र. 6131 मध्ये T-13 या मादी वाघीणीने हल्ला करून ठार केले होते. शिवाय T 13 वाघीणीचे सदर परिसरातील वास्तव्य कायम असल्याने रामाळा- वैरागड या मार्गावर आवागमन करणाऱ्या नागरीकांचा पाठलाग करीत असल्याच्या तक्रारी होत्या.त्यामुळे सदर मार्ग बंद ठेवण्यात आलेला होता. वनविभागाकडुन सदर वाघीणीचे संनियंत्रण करण्याची कार्यवाही सुरू होती.T-13 या मादी वाघीणीमुळे रस्त्याने आवागमन करणाऱ्या नागरीकांना भविष्यात मानव-वन्यजीव संघर्षाच्या घटना घडून नयेत याकरीता मुख्य वन्यजीव रक्षक तथा प्रधान मुख्य वनसंरक्षक (वन्यजीव)यांचे परवानगीने आज दिनांक 23.10.2023 रोजी T-13 वाघीण (मादी) हिला आरमोरी वनपरिक्षेत्रातील आरमोरी उपक्षेत्रामध्ये मुल्लुरचक गावातील सर्व्हे क्र. 12/1 (झुडपी जंगल) मध्ये सकाळी 7.48 वा. बेशुध्द करून त्यांचे चमुचे सहाय्याने वाघिणीला कोणतीही इजा न करता पिंजराबंद केले.

सदरची कार्यवाही वनसंरक्षक (प्रा) गडचिरोली वनवृत्त रमेशकुमार यांचे मार्गदर्शनाखाली धर्मवीर सालविठ्ठल, उपवनसंरक्षक (प्रा) वडसा वनविभाग, संदिप भारती, सहाययक वनसंरक्षक,पवनकुमार जोंग, वनपरीक्षेत्र अधिकारी (प्रा) आरमोरी, यांचे उपस्थितीत व आरमोरी परिक्षेत्रातील क्षेत्रीय कर्मचारी यांच्या सहाय्याने यशस्वीरित्या पूर्ण केली. सदर मोहिमेत RRT गडचिरोली चे  दिपेश डि. टेंभुर्णे, योगेश डि. लाकडे,गुरूनानक ढोरे, वसीम एन. शेख,विकास एस.ताजने, प्रफुल एन वाडगुरे,निकेश शेंद्र,मनन शेख, वाहन चालक,ए. डी. कारपे, वाहन चालक, ए. एम. दांडेकर, वाहन चालक यांनी सहभाग घेतला. जेरबंद करण्यात आलेल्या T-13 वाघीण (मादी) ची वैद्यकीय तपासणी केल्यानंतर तिला मा. बाळासाहेब ठाकरे, आंतरराष्ट्रीय प्राणी संग्रहालय गोरेवाडा, नागपुर येथे पाठविण्यात आले आहे.