गोंदिया : जुन्या वाहनांमध्ये स्वत: वाहनधारकाने बनवून घेतलेली साधी नंबरप्लेट आता कालबाह्य झाली आहे. सर्व वाहनांना आता परिवहन कार्यालयामार्फत बनवून दिली जाणारी हाय सिक्युरिटी रजिस्ट्रेशन प्लेट (एचएसआरपी) बसविणे आवश्यक करण्यात आले आहे. त्यासाठी 31 मार्चपूर्वी अर्ज न केल्यास अशा वाहनांसंदर्भातील पुढील व्यवहार होणार नाही. शिवाय पुढे दंडही आकारल्या जाणार आहे.
वाहनांच्या नंबर प्लेटमध्ये छेडछाड व बनावटगिरी करुन होणारे गुन्हे कमी करणे, रस्त्यावर धावणाऱ्या वाहनांची ओळख पटविणे व तसेच राष्ट्रीय सुरक्षेच्या दृष्टीकोनातून सर्व वाहनांना एचएसआरपी बसविणे आवश्यक असल्याचे सर्वोच्च न्यायालयाचे निर्देश आहे. केंद्रिय मोटार वाहन नियम 1989 च्या कलम 50 अन्वये महाराष्ट्र शासनाने सर्व वाहनांना हाय सिक्युरिटी रजिस्ट्रेशन प्लेट बसविण्याची तरतुद केली आहे. यानुसार गोंदिया जिल्ह्यातील सर्व वाहनधारकांनी त्यांच्या वाहनांना एचएसआरपी नंबर प्लेट बसविण्याच्या सूचना उपप्रादेशिक परिवहन कार्यालयातर्फे देण्यात आल्या आहेत.
गडचिरोली जिल्ह्याकरिता रियल मेझोन इंडिया लि.ही एजन्सी निश्चित करण्यात आलेली आहे. एचएसआरपी नंबरप्लेट बसविण्याकरिता http://maharashtrahsrp.com हे बुकिंग पोर्टल निश्चित करण्यात आले आहे. वाहनधारकांनी त्वरीत पोर्टल बुकींग करुन त्यांच्या सोईप्रमाणे अपॉईंटमेंट घेवून एचएसआरपी नंबर प्लेट बसवून घ्यावी. वाहनधारक गडचिरोली जिल्ह्यातील नसला तरी काही कामानिमीत्त गडचिरोली जिल्ह्यात वाहन वापरत असेल तरी देखील सदर वाहनास एचएसआरपी नंबर प्लेट बसविणे आवश्यक आहे. सदर एचएसआरपी नंबर प्लेट बसविण्याकरिता किमान 500 रुपयांचा भुर्दंड सहन करावा लागणार आहे. त्यात जीएसटी वगळून दुचाकी / ट्रॅक्टर याच्यासाठी 450 रुपये, तीन चाकी वाहनासाठी 500 रुपये, तर इतर सर्व वाहनांसाठी 745 रुपये याप्रमाणे शुल्क द्यावे लागणार आहे.
नंबरप्लेट बसविण्यासंदर्भात काही तक्रार असल्यास संबंधित सेवा पुरवठाधारकांच्या पोर्टलवर तसेच उपप्रादेशिक परिवहन कार्यालय, गडचिरोली येथे तक्रार दाखल करता येईल. वाहनांवर एचएसआरपी नंबर प्लेट न बसविल्यास वाहनाचे मालकी हस्तांतरण, पत्ता बदल, वित्त योजना चढविणे/ उतरविणे /दुय्यम प्रत /विमा अद्यावत करणे इत्यादि कामकाज थांबविण्यात येणार आहे. तसेच परिवहन आयुक्त कार्यालयाकडून सुचना प्राप्त झाल्यानंतर दंडात्मक कारवाईसुद्धा करण्यात येणार असल्याचे सहायक प्रादेशिक परिवहन अधिकारी यांनी कळविले.
