गोंदिया—,श्रावण मासाच्या पवित्र निमित्ताने नाग मंदिर सेवा समिती, फुलचूर यांच्या वतीने रविवारी भव्य कावड यात्रा काढण्यात आली. सकाळी ८:३० वाजता नाग मंदिरातून यात्रेला प्रारंभ झाला. या यात्रेत मोठ्या संख्येने कावडीये व भक्त सहभागी झाले. कावड यात्रेचा जत्था भक्तीगीतांच्या आणि “बम-बम भोले” या घोषणांच्या गजरात पंगोली नदी येथे पोहोचला. तेथे सर्व कावडीये यांनी विधीवत पवित्र जल भरले व गंगाजीची सामूहिक आरती केली.
यानंतर सर्व कावडीये पुन्हा नाग मंदिरात परतले. दुपारी १:३० वाजता पं. आशीष मिश्रा यांच्या वैदिक मंत्रोच्चारात भगवान भोलेनाथ यांचा जलाभिषेक करण्यात आला. यावेळी मंदिर परिसरात धार्मिक वातावरण निर्माण झाले होते.
या जलाभिषेक कार्यक्रमाला विशेष उपस्थिती मा. आमदार श्री विनोद अग्रवाल यांनी लावली. त्यांनी स्वतः जलाभिषेक करून भगवान भोलेनाथाचे आशीर्वाद घेतले आणि कावड यात्रेत सहभागी झालेल्या भक्तांशी संवाद साधला.
यानंतर भक्तीमय हनुमान चालीसा पठण करण्यात आले. कार्यक्रमाच्या समारोपानंतर सर्व उपस्थित श्रद्धाळूंना महाप्रसाद वितरित करण्यात आला. हा सोहळा रात्री ९:०० वाजता यशस्वीरीत्या पूर्ण झाला.
भक्तांची मोठ्या संख्येतील उपस्थिती व त्यांची भक्तिभावना यामुळे हा धार्मिक सोहळा अधिकच विशेष ठरला. दिवसभर मंदिर परिसरात श्रद्धा, आस्था आणि उत्साहाचे वातावरण पाहायला मिळाले.
नाग मंदिर सेवा समिती, फुलचूर यांनी या कार्यक्रमात सहभागी झालेल्या सर्व श्रद्धाळू, कावडीये आणि सहकार्यकर्त्यांचे मनःपूर्वक आभार मानले.
