अपकार्यकारी खोब्रागडेवर शिक्षणाधिकार्याची मेहरबानी का-परशुरामकर

गोंदिया,दि.7-जिल्हा परिषदेच्या स्व.वसंतराव नाईक सभागृहात झालेल्या स्थायी समितीच्या सभेत सत्तेत असलेल्या काँग्रेसच्या जिल्हा परिषद सदस्यासह राष्ट्रवादी व भाजपच्या सदस्यांनी शिक्षण सभापती पी.जी.कटरे व शिक्षणाधिकारी उल्हास नरड यांच्या कार्यप्रणालीवर चांगलीच नाराजी नोंदवली.तर तिरोडा पंचायत समितीमध्ये कार्यरत अधिक्षक दिवाकर खोब्रागडे यांच्यावर संगणक चोरीचा गुन्हा दाखल असताना आणि विभागीय आयुक्त नागपूर यांनी त्यांना निलबंन काळात अपकार्यकारी दर्जा देत देवरी, सालेकसा किंवा आमगाव येथे पाठविण्याचे आदेश दिलेले असताना शिक्षणाधिकारी उल्हास नरड यांनी मात्र त्यांना मुख्यालयात कुठल्या आधारावर ठेवल्याचा मुद्दा जिल्हा परिषदेचे राष्ट्रवादी काँग्रेसचे विरोधी पक्षनेते गंगाधर परशुरामकर यांनी उपस्थित केला.
परशुरामकर यांनी शिक्षण विभागातील गोंधळ प्रकार समोरच आणला.आयुक्तांनी अपकार्यकारी आदेश दिलेल्या व्यक्तीला कुठल्याही फाईलवर स्वाक्षरी करण्याचे अधिकार नसतात परंतु खोब्रागडे यांनी अनेक फाईलीवर शिक्षण विभागात स्वाक्षरी करुन आयुक्तांच्या आदेशालाही हरताळ फासले आहे.खोब्रागडे हे कुणाच्या बळावर मुख्यालयात काम करीत आहेत.त्या अधिकार्याचीही चौकशी का करण्यात येऊ नये अशा मुद्दा उपस्थित करुन सभागृहातील चर्चैचा सुरच पलटविला.शिक्षण ,आरोग्य व बांधकाम विभागातील कामाबाबत स्थायी समितीच्या बैठकीत पदाधिकारी वगळता सर्व सदस्य एकसुरात बोलत राहिल्याने पदाधिकार्यांची चांगलीच ताराबंळ उडाली होती. चर्चेमध्ये रमेश अंबुले, उषा सहारे, राजलक्ष्मी तुरकर, अलफाब पठान, रजनी कुंभरे, सुरेश हर्षे, शोभेलाल कटरे यांनी चर्चेत भाग घेतला.