युवकाच्या मृतदेहासह चौदा जण परतले गावी

गोरेगाव,दि.21 : तालुक्यातील परसाडीटोला येथील काही युवक मजुरीच्या कामासाठी आंध्रप्रदेश राज्यात गेले होते. मात्र, कोरोनाच्या पार्श्वभुमीवर देशात संचारबंदी लागू करण्यात आली. त्यामुळे ते युवक पायी प्रवास करीत गावाकडे निघाले. काही अंतरावर एक टँकर मिळाल्याने त्या माध्यमातून प्रवास करीत होते. त्यातच टँकरचा अपघात झाल्याने एका युवकाचा जागीच मृत्यू झाला तर चौदा युवक जखमी झाले. सर्व जखमींना आंध्रप्रदेशातील रूग्णालयात दाखल करण्यात आले. आणि  (दि.१९) रूग्णालयातून सुट्टी देवून रूग्णवाहिकेच्या माध्यमातून गोरेगाव तालुक्यातील परसाडीटोला गावात सोडण्यात आले. दरम्यान एका युवकाच्या मृतदेहासह चौदा युवक गावात पोहोचताच परिसरात शोककळेसह खळबळ उडाली.
गोरेगाव तालुक्यातील काही युवक मजुरीच्या कामासाठी आंध्रप्रदेश राज्यात रोजगारासाठी गेले होते. संचारबंदीमुळे ते युवक तिथेच अडकून पडले. १५ एप्रिलनंतर मुभा मिळेल, या आशेवर कंत्राटदाराच्या आश्रयाखाली ते तिथेच थांबले. मात्र, १५ एप्रिलनंतर संचारबंदीत वाढ झाल्याने ते १५ युवक गावी येण्यासाठी पायदळ निघाले. काही अंतरावर आल्यानंतर एक टँकर चालकाने त्यांना मदत केली. सर्व युवक टँकरमध्ये बसून येत असताना टँकरचा अपघात झाला. या घटनेत राजेश प्रेमलाल ऊईके रा. परसाडीटोला या युवकाचा मृत्यू झाला. तर चौदा जण जखमी झाले. सर्व जखमींना उपचारासाठी हैदराबाद येथे पुन्हा दाखल करण्यात आले. रूग्णालयातून सुट्टी झाल्यानंतर १४ युवकांना राजेशच्या मृतदेहासह रूग्णवाहिकेने गोरेगाव येथील परसाडीटोला येथे पाठविण्यात आले. ते १४ युवक मृतदेहासह गावी पोहोचताच शोककळेसह एकच खळबळ उडाली.