berartimes.com
आमगाव,दि.8- येथील पंचायत समितीच्या कृषी विभागात कार्यरत तांत्रिक अधिकारी भक्तप्रसाद राऊत याला पाच हजार रुपयाची लाच स्विकारतांना आज (दि.8) रंगेहाथ लाचलुचपत प्रतिबंधक विभागाच्या पथकाने पकडले.मग्रारोहयो अंतर्गत झालेल्या भातखाचराच्या जून 2016 पर्यंतच्या कामाचे 28 हजार रुपयाचे बील काढून देण्याकरीता तांत्रिक अधिकारी राऊत यांनी सहा हजार रुपयाची मागणी केली होती.परंतु अर्जदाराला लाच देण्याची मूळीच ईच्छा नसल्याने त्यांने लाचलुचपत प्रतिंबधक विभागाकडे 6 सप्टेंबरला तक्रार नोंदविली.त्या तक्रारीच्या आधारे लाचलुचपत विभागाने आज सापळा रचून राऊत याला पाच हजार रुपये स्विकारतांना अटक केली आहे.पोलीस स्टेशन आमगाव येथे याप्रकरणी गुन्हा दाखल करण्यात आले आहे.एसीबीचे पोलीस अधिक्षक संजय दराडे,अपर पोलीस अधिक्षक राकेश शर्मा यांच्या मार्गदर्शनात ही कारवाई गोंदिया येथील एसीबीच्या चमू ने केली आहे.

berartimes.com साकोली,दि.8- महाराष्ट्र शासनाच्या महाराष्ट्र प्रोटेक्शन अॅण्ड इंटरनल शिक्युरीटी अॅक्टच्या संदर्भात साकोली तालुका काँग्रेस कमिटीची सभा घेऊन मार्गदर्शन करण्यात आले.त्याचप्रमाणे सदर अॅक्ट रद्द करण्यात यावे यामागणीचे निवेदन उपविभागीय अधिकारी यांच्यामार्फेत महाराष्ट्र शासनाला पाठविण्यात आज गुरुवारी पाठविण्यात आले.या अॅक्ट मुळे सामान्य मानसाला एखादा घरगुती कार्यक्रम घ्यायचा असेल बारसा,साखरपुडा, कुणाच्या घरी मय्यत (अंत्यसंस्कार) ईत्यादि ईत्यादी आणी या कार्यक्रमामध्ये 100 पेक्षा जास्त लोकं एकत्र येत असतील तर पोलीस परवानगीशिवाय कार्यक्रम करता येणार नाही. तसेच या कार्यक्रमात सिसिटिव्ही कॅमेरे बसविणे बंधनकारक राहिल.म्हणजेच एखाद्या व्यक्तीच्या घरी मय्यत झाल्यास अंत्यसंस्कार करायचे असल्यास दुखः विसरून आधी पोलीसाची परवानगी घ्यायची हि सरकारची हिटलरशाही खपवून घेणार नाही.त्या विरोधात रस्त्यावर उतरून निदर्शने करण्याचा इशारा निवेदनात देण्यात आला.यावेळी भंडारा जिल्हा काँग्रेस जिल्हाध्यक्ष प्रेमसागर गणविर,अजयराव तुमसरे, तालुका अध्यक्ष नंदकिशोर समरीत, शहर अध्यक्ष अश्विन नशीने, जेष्ठ नेते मधुकरजी लिचडे होमराजभाऊ कापगते उपस्थित होते.

हायकोर्टाचा आदेश : विभागीय सहनिबंधकांकडे जबाबदारी
नागपूर : मुंबई उच्च न्यायालयाच्या नागपूर खंडपीठाने आर्थिक अफरातफरीच्या आरोपाची दखल घेऊन गोंदिया जिल्हा मध्यवर्ती सहकारी बँकेच्या व्यवहाराची तीन महिन्यांत चौकशी पूर्ण करण्याचा आदेश नागपूर विभागीय सहनिबंधक (लेखा) यांना दिला आहे. चौकशीत गैरप्रकार आढळून आल्यास दोषी व्यक्तींवर योग्य कारवाई होण्यासाठी सक्षम प्राधिकरणाकडे अहवाल सादर करावा असे सहनिबंधकांना सांगण्यात आले आहे.
न्यायमूर्तीद्वय भूषण गवई व विनय देशपांडे यांनी हा आदेश देऊन संबंधित जनहित याचिका निकाली काढली आहे. यासंदर्भात महेशकुमार अग्रवाल व जगदीशप्रसाद अग्रवाल यांनी याचिका दाखल केली होती. भंडारा जिल्हा मध्यवर्ती सहकारी बँकेचे विभाजन होऊन गोंदिया जिल्हा मध्यवर्ती सहकारी बँक अस्तित्वात आली.बँकेच्या मुख्यालयासाठी जमीन खरेदी करण्यास मुख्य कार्यकारी अधिकार्‍यांनी १७ ऑगस्ट २00९ रोजी हिरवी झेंडी दाखविली. यानंतर अर्जुनी मोरगाव येथील गंगादेवी अग्रवाल यांची जमीन २ कोटी २ लाख ५0 हजार रुपयांत खरेदी करण्याचा निर्णय घेण्यात आला.त्यावेळच्या बाजारभावानुसार या जमिनीची किंमत केवळ २१ लाख २१ हजार रुपये होती. असे असताना अधिक किंमत मोजून जमीन खरेदी करण्यात आली. या व्यवहारात १ कोटी ९४ लाख रुपयांची अफरातफर झाली. यासंदर्भात २५ जून २0१४ रोजी सहकार विभागाकडे तक्रार करण्यात आली होती. विभागीय सहनिबंधकांनी प्रकरणाच्या चौकशीचे आदेश दिले होते.

नागपूर, दि. 8 – एक याचिकाकर्ता वारंवार केवळ हिंदू धर्माशी संबंधित गोष्टींनाच विरोध करीत असल्याचे पाहून मुंबई उच्च न्यायालयाच्या नागपूर खंडपीठाने बुधवारी तीव्र नाराजी व्यक्त केली. तुमचा उद्देश प्रामाणिक आहे तर, तुम्ही केवळ हिंदू धर्मालाच लक्ष्य का करता, इतर धर्मांतील गोष्टींना विरोध का करीत नाही, असा सवाल न्यायालयाने संबंधित याचिकाकर्त्याला विचारला. याचे समाधानकारक उत्तर याचिकाकर्त्याला देता आले नाही.

न्यायमूर्तीद्वय भूषण गवई व विनय देशपांडे यांच्यासमक्ष हे प्रकरण सुनावणीसाठी आले होते. भारताचा सर्वधर्मसमभाव व माणवतेवर विश्वास आहे. येथील प्रत्येक नागरिकाने स्वत:च्या धर्मासह इतरांच्या धर्मांचाही आदर केला पाहिजे. भारतीय राज्यघटनेने प्रत्येकाला स्वत:च्या धार्मिक परंपरा व प्रथेचे पालन करण्याचे आणि उपासना करण्याचे स्वातंत्र्य दिले आहे. अशा परिस्थितीत केवळ हिंदू धर्मालाच लक्ष्य करण्यात काहीच तथ्य दिसून येत नाही असे मौखिक मत न्यायालयाने नोंदविले.

जनार्दन मून असे याचिकाकर्त्याचे नाव असून ते नागरी हक्क संरक्षण मंचाचे केंद्रीय अध्यक्ष आहेत. लोकमान्य बाळगंगाधर टिळक यांनी दिलेल्या स्वराज्य हा माझा जन्मसिद्ध हक्क आहे आणि तो मी मिळवणारच या घोषणेला १०० वर्षे पूर्ण झाली आहेत. शासनाने घोषणेचे शताब्दी वर्ष साजरे करण्याचा निर्णय घेतला आहे. त्यासाठी लोकमान्य सार्वजनिक गणेशोत्सव अभियान व लोकमान्य उत्सव कार्यक्रम आयोजित करण्यात आला आहे. याअंतर्गत गणेशोत्सव सजावट स्पर्धा जाहीर करण्यात आली आहे. स्वदेशी, साक्षरता, बेटी बचाव – बेटी पढाव, दारुबंदी व जल संवर्धन ही स्पर्धेची थीम आहे. विभागीय स्तरावर २ लाख, १ लाख ५० हजार व १ लाख रुपये, जिल्हास्तरावर १ लाख, ७५ हजार व ५० हजार रुपये तर, तालुकास्तरावर २५ हजार, १५ हजार व १० हजार रुपये असे अनुक्रमे प्रथम, द्वितीय व तृतीय पुरस्कार देण्यात येणार आहेत. २५ सप्टेंबर रोजी विजेत्यांची नावे घोषित करण्यात येणार आहे. यासंदर्भात शासनाने २७ जुलै २०१६ रोजी जीआर जारी केला आहे. या निर्णयावर याचिकाकर्त्याचा आक्षेप होता.