पुणे-राज्य सहकारी बँकेला झालेल्या अब्जावधी रुपयांच्या तोट्याची जबाबदारी निश्चित करण्याप्रकरणी माजी उपमुख्यमंत्री अजित पवार, विजयसिंह मोहिते पाटील यांच्यासह ६० ते ७० बड्या नेत्यांना नोटिसा बजाविण्यात आल्या आहेत. विधानसभा निवडणुकीतील पराभवापाठोपाठ काँग्रेस-राष्ट्रवादीच्या नेत्यांना यामुळे आणखी एक दणका बसला आहे.
तोट्यातील साखर कारखाने, सूतगिरण्या यांना नियम डावलून कर्जपुरवठा, तारण नसताना कर्जपुरवठा, वसुलीकडे दुर्लक्ष अशा विविध कारणांमुळे राज्यातील बँकांची शिखर बँक असलेल्या राज्य सहकारी बँकेला अब्जावधी रुपयांचा तोटा झाला. त्या पार्श्वभूमीवर प्रभारी सहकार आयुक्त दिनेश ओऊळकर यांनी २० एप्रिल २०११ रोजी बँकेवर प्रशासक नियुक्त करण्याची परवानगी रिझर्व्ह बँकेकडे मागितली आणि सात मे २०११ रोजी सचिव सुधीरकुमार गोयल यांची प्रशासक म्हणून नियुक्ती करण्यात आली होती. राष्ट्रवादीचे वर्चस्व असलेल्या या बँकेचे संचालक मंडळ बरखास्त झाल्याने राज्यात मोठे राजकीय वादळ निर्माण झाले होते. सहकार कायद्याच्या कलम ८३ नुसार झालेल्या चौकशीत अब्जावधी रुपयांचा तोटा झाल्याचे समोर आले. त्यानंतर कलम ८८ नुसार संबंधित संचालकांवर जबाबदारी निश्चित करण्याची प्रक्रिया सुरू करण्यात आली; परंतु गेल्या काही महिन्यांमध्ये त्याला मुदतवाढ देण्यात आली होती. ही मुदत समाप्त झाल्यानंतर चौकशी अधिकारी शिवाजी पहिनकर यांनी या नोटिसा काढल्या आहेत.

मुंबई -भाजपचा विधिमंडळ पक्षनेता निवडण्यासाठी मंगळवारी विधानभवन परिसरात मोठी लगबग सुरू असतानाच राज्यातील भाजपचे एक प्रमुख नेते विनोद तावडे यांना केंद्रीय गृहमंत्री राजनाथ सिंह यांच्या बॉडीगार्डने धक्काबुक्की केल्याचे उघड झाले आहे. तावडे राजनाथ यांच्याशी चर्चा करण्यासाठी त्यांच्या गाडीत चढण्याचा प्रयत्न करत असताना या बॉडीगार्डने त्यांना बखोटीला धरून खेचल्याचे व्हिडिओ फुटेजमध्ये स्पष्टपणे दिसत आहे. 
भाजप हायकमांडने नेतानिवडीची प्रक्रिया पार पाडण्यासाठी दिल्लीतून राजनाथ सिंह यांना पाठवले होते. राजनाथ यांच्या अध्यक्षतेखाली झालेल्या बैठकीत देवेंद्र फडणवीस यांची विधिमंडळ पक्षनेता म्हणून निवड करण्यात आली. यादरम्यान भाजपचे महाराष्ट्रातील प्रमुख नेते आणि दिल्लीतून आलेल्या नेत्यांमध्ये बरीच खलबतं सुरू होती. त्यात विनोद तावडे हेही दिल्लीतील नेत्यांशी चर्चा करत होते. मात्र, राजनाथ बैठक आटोपून दिल्लीकडे निघाले असताना त्यांच्या गाडीतून जाण्यासाठी टाकलेले पाऊल तावडे यांना चांगलेच महागात पडले. 
राजनाथ यांच्या स्कॉर्पिओ गाडीभोवती त्यांच्या गार्ड्सचा गराडा होता. तो भेदून विनोद तावडे राजनाथ यांच्या गाडीत बसण्याचा प्रयत्न करत होते. मात्र त्यांना एका गार्डने रोखले. त्यामुळे तावडे व या गार्डमध्ये चांगलीच जुंपली. गाडीत भाजप नेते जे. पी. नड्डा हे आधीच बसलेले होते तर राजनाथ गर्दीतून आपल्या गाडीत बसण्यासाठी येत होते. त्यावेळी राजनाथ गाडीत बसण्याआधीच तावडे गाडीजवळ पोहोचले. तावडे यांनी गाडीचा मागचा दरवाजा उघडलाही होता. मात्र त्याचवेळी तेथे असलेल्या राजनाथ यांच्या गार्डने त्यांची बखोटी धरली. त्यामुळे या तावडे गार्डवर चांगलेच भडकले. पण, त्यानंतरही तावडे यांना गार्डने गाडीत प्रवेश दिला नाही. पुढच्याच क्षणी राजनाथ तेथे आले. तावडे यांनी त्यांच्याकडे गार्डची तक्रार करण्याचा प्रयत्न केला. मात्र राजनाथ यांनी त्याला फारसं महत्व दिलं नाही. तावडेंच्या म्हणण्याकडे दुर्लक्ष करून राजनाथ गाडीत बसून निघून गेले. याप्रकाराने तावडे राजनाथ यांच्यावर चांगलेच नाराज असल्याचे सांगण्यात येत आहे. ङआयबीएन ७ या वृत्तवाहिनीने तावडे आणि बॉडीगार्डमधील हे खटके चित्रित केले आहेत.

नागपूर-भाजपच्या नेतृत्वातील नव्या सरकारचा शपथविधी येत्या बुधवारी होण्याची शक्यता आहे. देवेंद्र फडणवीस यांच्या नावावर शिक्कामोर्तब होण्याची दाट शक्यता असून त्याच दिवशी राज्यपालांची भेट घेऊन सरकार स्थापन करण्याचा दावा करण्यात येईल. त्यानंतर लगेच २९ तारखेला नव्या मुख्यमंत्र्ङ्र्माचा जाहीर राज्याभिषेक करण्याचे भाजपचे प्रयत्न आहेत. त्यासाठी वानखेडे स्टेडियम बूक करण्ङ्मात आले आहे. या सोहळ्यासाठी इच्छुकांसह नेते व समर्थक सज्ज झाले आहे.
मिनिमम गव्हर्नमेंट, मॅक्झिमम गव्हर्नन्स या पंतप्रधान नरेंद्र मोदी यांनी घालून दिलेला पायंड्याची महाराष्ट्रातही अंमलबजावणी होणार असल्याची चिन्हे आहेत. राज्यातील मंत्रिमंडळ नॅनो असेल, असे संकेत पक्षाने दिले आहेत. ही शक्यता लक्षात घेऊन इच्छुकांची जोरदार फिल्डिंग सुरू आहे. मंत्रिमंडळाची संख्या मर्यादित असल्याने समर्थकांची वर्णी लावण्यात आपसूक अडचणी येतात. भाजपला पूर्ण बहुमत नसल्याने शिवसेनेला सोबत घेतले जाण्याची शक्यता आहे.
शिवसेनेला किती जागा द्यायचा याचा निर्णय पक्ष नेता निवडीनंतरच ठरणार आहे. शिवसेनेच्या संख्याबळानुसार ९ ते ११ जागा द्याव्या लागतील. शिवसेनेने आपल्या मर्यादेत राहून अटी लावल्यास चर्चा होऊ शकते, अन्यथा त्यांच्या भूमिकेचा फेरविचार होऊ शकतो, अशी स्थिती आहे.
विदर्भात ६२ मतदारसंघांतून भाजपचे ४४ आमदार निवडून आले आहेत. आघाडी सरकारने विदर्भाला सात मंत्री दिले होते, त्यामुळे भाजपने किमान दहा मंत्री द्यावे, अशी चर्चा सुरू झाली आहे.
विदर्भातून सुधीर मुनगंटीवार, पांडुरंग फुंडकर, चैनसुख संचेती, गोवर्धन शर्मा, चंद्रशेखर बावनकुळे, प्रकाश भारसाकळे, सुनील देशमुख, राजकुमार बडोले, यांची नावे चर्चेत आहेत. यात आणखी कुणाची लॉटरी लागते की कुणाची विकेट जाते हे वेळेवरच कळणार आहे.