महा अवयवदान अभियान – २०१६
गोंदिया, दि. १ :- ३० ऑगस्ट ते १ सप्टेंबर दरम्यान आयोजीत महा अवयवदान अभियानाला लोकचळवळीचे स्वरुप प्राप्त झाले आहे. आबालवृध्दांपासून सर्वाचाच सहभाग यामध्ये मिळत आहे. अवयवदानाबाबत जनजागृती व्हावी यासाठी विविध कार्यक्रमाचे आयोजन करण्यात आले आहे.
३१ ऑगस्ट रोजी या अभियानाच्या निमित्ताने शासकीय वैद्यकिय महाविद्यालय गोंदिया येथे विविध स्पर्धेचे आयोजन करण्यात आले. महा अवयवदान या विषयावर रांगोळी स्पर्धा, महा अवयवदान या विषवर पोस्टर्स स्पर्धा, अवयवदान- सर्वश्रेष्ठ दान या विषयावर निबंध स्पर्धा, आणि अवयवदान- महानकार्य या विषयावरील वक्तृत्व स्पर्धेतून अवयवदानाचे महत्व विषद करण्यात आले. निबंध व वक्तृत्व स्पर्धेतून तर विद्यार्थ्यानी अवयवदानाचे महत्व व आवश्यकता स्पष्ट केली. या स्पर्धेमुळे अनेकांना अवयवदान करण्याची प्रेरणा मिळाली.
गोंदिया शहरातील निर्मल इंग्लिश हायस्कूल,मनोहर म्युसीपल हायस्कूल, व ज्युनिअर कॉलेज,मारवाडी विद्यालय, एस.एस.गर्ल्स कॉलेज, जे.एम.ज्युनिअर कॉलेज,डि.बी.सायंस कॉलेज,एस.एस.ऐ.एम गर्ल्स हायस्कूल, व श्रीमती सरस्वतीबाई महिला विद्यालयाच्या विद्यार्थ्यानी या स्पर्धामध्ये सहभाग घेतला.
स्पर्धेचे परिक्षक म्हणून शासकिय वैद्यकिय महाविद्यालयाचे प्रा. डॉ. व्ही.पी.रुखमोडे, प्रा.डॉ.आर.एल.कांबळे, प्रा. डॉ.मकरंद व्यवहारे, प्रा.डॉ. सुरेखा मेश्राम, प्रा.डॉ.खन्नाडे, प्रा.डॉ.सुनंदा श्रीखंडे, प्रा.डॉ.संजीव चौधरी, प्रा.डॉ.प्रवीण जाधव, प्रा.डॉ.कवीता जैसवाल, प्रा.डॉ.संगीता भलावी, व डी.बी.सायंस कॉलेजचे प्रा.डॉ.गुणवंत गाडेकर यांनी काम पाहिले.
