berartimes.com
गोंदिया दि. 12 : गोंदिया जिल्हयातील पर्यटनस्थळांवर आधारीत असलेल्या गोंदिया इसेन्स ऑफ इंडिया आणि राज्यात केवळ गोंदिया जिल्हयात आढळणाऱ्या दुर्मिळ अशा सारस पक्षावरील सारस वैभव गोंदियाचे या दोन्ही माहितीपटाचे
विमोचन मुख्यमंत्री देवेन्द्र फडणवीस यांच्या हस्ते आज दीक्षाभूमी येथील सभागृहात नागपूर विभागातील विविध योजनांच्या अंमलबजावणी संदर्भात तालूकास्तरीय आढावा सभेत करण्यात आले. या प्रसंगी पालकमंत्री राजकुमार बडोले,उर्जामंत्री चंद्रशेखर बावनकुळे, मुख्य सचिव स्वाधीन क्षत्रीय,मुख्यमंत्र्याचे प्रधान सचिव प्रविण परदेशी,पाणी पुरवठा विभागाचे प्रधान सचिव राजेश कुमार,उर्जा विभागाचे प्रधान सचिव विपीन श्रीमाळी, सामाजीक न्याय विभागाचे प्रधान सचिव सुरेंदकुमार
बागडे,ग्रामविकास सचिव असीम गुप्ता, जलसंधारण सचिव डॉ. पुरूषोत्तम भापकर, कृषी आयूक्त विकास देशमुख,जमाबंदी आयुक्त एस पी कडू पाटिल, विभागीय आयुक्त अनुप कुमार, मनरेगा आयुक्त अभय महाजन व गोंदिया जिल्हाधिकारी डॉ.विजय सूर्यवंशी यांची प्रमुख उपस्थिती होती.नागपूर विभागातील सर्व जिल्हाधिकारी,सर्व मुख्य कार्यकारी अधिकारी यांची प्रामुख्याने उपस्थिती होती.
पूर्व विदर्भातील गोंदिया जिल्हा तलावांचा व धानाचे कोठार म्हणून ओळखला जातो. हा जिल्हा वनराई व वन्यजीवांनी समृध्द असून जिल्हयात नवेगांवबांध-नागझिरा व्याघ्र प्रकल्प,हाजफॉल,चुलबंद,बोदलकसा,मांडोदेवी यासह अनेक पर्यटन व तिर्थस्थळे आहेत. या स्थळांची माहिती राज्यभर व्हावी व जास्तीत जास्त पर्यटक व वन्यजीवप्रेमी पर्यटनासाठी व सारस पक्षांसह वन्य-प्राण्यांना बघण्यासाठी गोंदिया जिल्हयात यावे यासाठी पालकमंत्री राजकुमार बडोले यांच्या मार्गदर्शनातून व जिल्हाधिकारी डॉ. विजय सुर्यवंशी यांच्या संकल्पनेतून जिल्हा पर्यटन समितीने तयार केलेला गोंदिया इसेन्स ऑफ इंडिया हा माहितीपट 13 मिनीटाचा आहे. या माहितीपटात पाहुणे कलाकार म्हणून प्रसिध्द अभिनेते डॉ. गिरीष ओक यांनीसुध्दा काम केले आहे.
गोंदिया जिल्हयातील धानाची शेती,विदेशात निर्यात होणारा उच्च प्रतीचा तांदुळ,नवेगाव-नागझिरा व्याघ्र राखीव प्रकल्पातील वनराई-वन्यजीव चुलबंद,बोदलकसा, नवेगावबाध जलाक्षय,इटियाडोह प्रकल्प,बोदलकसा,चुलबंद,हाजराफॉल तसेच जिल्हयातील दंडार ही लोककला, ऐतिहासिक व तिर्थक्षेत्र असलेले कचारगड, मांडोदेवी,तिबेटियन शरणार्थी वसाहत यासह अनेक पर्यटन स्थळांची माहिती या माहितीपटातून देण्यात आली आहे.
राज्यात केवळ गोंदियात आढळणाऱ्या दुर्मिळ व सुंदर दिसणाऱ्या सारस पक्षांसह जिल्हयातील मालगुजारी तळावांवर येणाऱ्या स्थलांतरीत व विदेशी पक्षांवर जिल्हा माहिती कार्यालय गोंदिया यांनी तयार केलेल्या सारस वैभ्भ्‍व गोंदियाचे या वृत्तपटात सारस पक्षांचे सौदर्य आणि प्रेमाचे प्रतिक म्हणून दिलेली उपमा, ऐतिहासिक काळापासून आदिवासी बांधवांमध्ये सारस पक्षांच करण्यात येत असलेल पूजन, मागील वर्षीपासून जिल्हाधिकारी डॉ.सूर्यवंशी यांच्या पुढाकारातून सारस पक्षांच्या संरक्षण आणि संवर्धनासाठी आयोजित करण्यात येत असलेला सारस महोत्सव, सारस पक्षांच्या संरक्षण आणि संवर्धनासाठी उभी झालेली लोकचळवळ, पर्यटक आणि पक्षीप्रेमींनी सारस पक्षांना बघण्यासाठी गोंदिया जिल्हयात येण्यासाठी घातलेली साद या वृत्तपटातून सारस पक्षी गोंदिया जिल्हयाचे वैभव असल्याचे वर्णन करण्यात आले आहे.या माहितीपट व वृत्तपटाच्या विमोचन प्रसंगी नागपूर विभागातील सर्व जिल्हाधिकारी,सर्व मुख्य कार्यकारी अधिकारी तसेच जिल्हा अधिक्षक कृषी अधिकारी,उपजिल्हाधिकारी,उपविभागीय अधिकारी,उप मुख्य कार्यकारी अधिकारी,तहसिलदार,गट विकास अधिकारी,तालुका कृषी अधिकारी यांचेसह अन्य यंत्रणाचे अधिकारी देखील उपस्थित होते.
