नवी दिल्ली ,दि.26- काही डॉक्टरांच्या बेजबाबदार वर्तनामुळे त्रस्त झालेल्या इंडियन मेडिकल असोसिएशनने (आयएमए) नवीन आचारसंहिता तयार केली आहे. डॉक्टरांनी सोशल मीडियावरही कोणत्या पोस्ट कराव्या आणि काय टाळावे यासाठीच्या सूचना यात देण्यात आल्या आहेत. पेशंट्सबद्दल डॉक्टरांनी सोशल मीडियावर चुकीची किंवा खोटी माहिती देऊ नये असे स्पष्ट निर्देश आयएमएने दिले आहे. त्यासोबत डॉक्टरांनी जाती आणि धर्माच्या आधारे पेशंट्ससोबत भेदभाव करु नये हा गुन्हा असल्याचे म्हटले आहे. आयएमएने डॉक्टरांना व्यवसाय बाह्य लोकांसोबत मद्यपान करण्यापासूनही दूर राहाण्यास सांगितले आहे. तसेच महिला आणि पुरुष डॉक्टरांनी किती मद्यसेवन करावे याची मर्यादाही घालून दिली आहे. पुरुष डॉक्टरांसाठी 18 मिली तर महिला डॉक्टरांसाठी ही मर्यादा 9 मिली निर्धारित करण्यात आली आहे.
आयएमएला नुकताच एक मेल मिळाला होता. त्यात फेसबुकवर शेअर होत असलेल्या एका व्हिडिओचा हवाला देण्यात आला होता. या व्हिडिओमध्ये मुंबईतील एका डायलिसिस सेंटरवरील डॉक्टर, पेशंटला हॉस्पिटल बाहेर फेकण्याची आणि अखेरच्या श्वासापर्यंत न सोडण्याची धमकी देताना दिसत होता. हा व्हिडिओ व्हायरल झाल्यानंतरच आयएमएने नवीन कोड ऑफ कंडक्ट जारी केले आहे. आयएमएने म्हटले आहे, की डॉक्टर इतरांना ज्या हेल्दी लाइफ स्टाइलचा सल्ला देतात त्यावर स्वतःही अंमल केला पाहिजे. हे डॉक्टरांचे कर्तव्य देखिल आहे.
आयएमएचे राष्ट्रीय अध्यक्ष डॉ. के.के. अग्रवाल यांनी मेडिकल कौन्सिलच्या आचारसंहितेचा हवाला देऊन डॉक्टरांनी आपल्या व्यवसायाचे पावित्र्य कायम ठेवण्यास सांगितले. ते म्हणाले, रुग्णांनी आपल्या डॉक्टर्सवर विश्वास दाखवला पाहिजे. डॉक्टर सार्वजनिक जीवनात चुकीचे वागत असतील तर त्यांच्यावर लोकांचा विश्वास राहाणार नाही, एवढेच नाही तर लोकांचा या प्रोफेशनवरुनही विश्वास उडेल.