मा. गो. वैद्य, खेडेकर प्रथमच येणार एकत्र

नागपूर,दि.29ः-विचारसरणींच्या दोन ध्रुवांवर असणारे रा. स्व. संघाचे माजी प्रवक्ते मा. गो. वैद्य आणि मराठा सेवा संघाचे संस्थापक अध्यक्ष पुरुषोत्तम खेडेकर प्रथमच एका मंचावर येणार आहेत.
मीडिया वॉच पब्लिकेशनतर्फे प्रकाशित ‘संघाचे हिंदू राष्ट्राचे स्वप्न साकार होईल?’ या पुस्तकाचा प्रकाशन सोहळा व या विषयावरील चर्चासत्राचे आयोजन शनिवार, १४ जुलै रोजी होत आहे. ‘हिंदू राष्ट्र’ हा विषय ज्वलंत आणि वादग्रस्त असल्याने याविषयावर उभय नेते कशी भूमिका मांडतात, याकडे नागरिकांचे लक्ष लागले आहे.
धनवटे सभागृह, शंकरनगर येथे सायंकाळी ५ ते ७ वाजेदरम्यान हा कार्यक्रम होणार आहे. अध्यक्षस्थानी साहित्यिक व ज्येष्ठ पत्रकार सुरेश द्वादशीवार राहतील. मा. गो. वैद्य, पुरुषोत्तम खेडेकर यांच्याशिवाय सामाजिक कार्यकर्ते व साहित्यिक रवींद्र रुक्मिणी पंढरीनाथ यांचाही या चर्चासत्रात सहभाग राहील.
या कार्यक्रमाला उपस्थित राहावे, असे आवाहन आशुतोष शेवाळकर, अरुणा सबाने, अतुल लोंढे आदींनी केले आहे.