तुमसर,दि.26ः- जवळच्या तुडका येथे शॉर्ट सर्किटमुळे तीन घरांना भीषण आग लागली. या आगीत घरासह तीन बकरी, गाय, वासरू तसेच दुचाकी व सायकल भस्मसात होऊन लाखो रुपयांचे नुकसान झाले. ही घटना शनिवारी दुपारी १ च्या सुमारास घडली.
तुडका येथील मधुकर वाडीभस्मे हे कुटुंबासह घरी असताना अचानकच दुपारी घरातील मिटरमध्ये शॉर्टसर्किट होऊन घराला व लागूनच असलेल्या जनावरांच्या गोठय़ाला आग लागली. क्षणात आगीने रौद्ररूप धारण करीत ५0 फूट अंतरावर असलेल्या दोन घरांनाही लक्ष्य केले. यात मधुकर वाडीभस्मे यांचे घर व गोठा पूर्णत: जळाले. गोठय़ातील ३ बकरी, गाय, वासरू तसेच सायकल व दुचाकी पूर्णत: जळाले. सुरेश पंधरे व गोविंद भिवगडे यांचे घराला मागच्या बाजूला आग लागून घरातील साहित्य जळाले. गावकर्यांनी वेळीच घटनास्थळी धाव घेऊन आगीवर नियंत्रण मिळविले. तुमसर नगर परिषदेचे अग्निशमन बंब बोलाविले. तोपर्यंत सर्वच भस्मसात झाले होते.
