देवरी,दि.22:- स्थानिक नगर पंचायत प्रशासनाच्या वतीने प्रभाग क्रमांक १३ मध्ये दोन्ही बाजूच्या नालीचे बांधकाम व सिमेंट रस्त्याचे बांधकाम दलीतवस्ती फंडातुन मंजूर करण्यात आले.कामाला जवळपास 2 महिना झाले असून सुदधा आतापर्यंत 200 मीटर नालीचे बांधकाम पूर्ण झाले नाही.बांधकाम साहित्य रस्त्यावर असल्याने तसेच नालीत रेती पडून असल्याने 2 महिन्यापासून नालीत पाणी साचल्याने जंतू निर्माण झाले आहेत त्यामुळे रोग पसरण्याची शक्यता निर्माण झाली आहे.या प्रभागातील नागरिकांना त्रास सहन करावा लागत आहे. मात्र या गंभीर प्रकाराकडे नगर पंचायत प्रशासन दुर्लक्ष करीत असल्याचा आरोप नागरिकांनी केला आहे.सदर परिसरात दाट वस्तीचे घरे आहेत. या घरातील लोकांना अर्धवट कामामुळे विविध समस्यांचा सामना करावा लागत आहे.
सदर बांधकाम जलद गतीने व्हावा म्हणून वारंवार पालिकेच्या मुख्यधिकाऱ्यांना सांगून सुद्धा कंत्राटदाराकडून या कामात गती दिसून येत नाही.पालिका प्रशासनाने या समस्येकडे गांभीर्याने लक्ष देऊन न्याय द्यावा, अशी मागणी मोहन डोंगरे, उमेश येरपुडे, आशिष डोंगरे, आस्तिक येरपुडे,गुणीलाल शहारे, सुमित्राबाई गिऱ्हेपुंजे, जनाबाई येरणे, भागणबाई वट्टी यांच्यासह प्रभागवासीयांनी केली आहे. तसेच कामाची गती वाढवून उत्कृष्ट दर्जाचा काम नाही झाल्यास काम बंद करण्याचे चर्चा प्रभात सुरू आहे.यासंदर्भात मुख्याधिकारी राजेंद्र चिखलखुंदे यांना विचारणा केली असता त्यांनी कंत्राटदार बबलू डाये स्वतः मनमर्जी करीत असून वारंवार सांगूनही दुर्लक्ष करत असल्याचे सांगितले.
