गोंदिया,दि.26 : जंगलात लागणाऱ्या वणव्यामुळे होणाऱ्या नुकसानीला आळा घालता यावा यासाठी वनविभागाकडून दरवर्षी नियोजन करण्यात येत असताना वणव्यावर नियंत्रण ठेवण्यात वन विभाग कमी पडत असल्याचे चित्र आहे. विविध कारणांनी जंगल परिसरात आगीच्या घटना घडत असतात. यंदाही जिल्ह्यातील जंगलांमध्ये वणव्याच्या घटना घडल्या असून ४४०.०८ हेक्टर वन परिसर प्रभावित झाला आहे. वन विभागाकडून ३२० घटनांची नोंद करण्यात आली आहे. विशेष म्हणजे मागील वर्षीच्या तुलनेत यंदा या घटनांमध्ये वाढ झाल्याचे दिसत आहे. .
दरम्यान, यंदा १२ रेंज व दोन डेपो मिळून फायर वॉचर्स पथकही नेमण्यात आले होते. यात एका पथकात पाच कर्मचारी व स्थानिक मजुरांची निवड करण्यात आली होती. तर त्यांच्या मदतीला वनविभागाचे वनरक्षक, वनमजुरांना देखील या कामी लावण्यात आले होते. विशेष म्हणजे, शासनाकडून विभागाला फायर ब्लोअर मशिन व फायर ब्लोअर इंजिनही पुरविण्यात येत असून यंदा गोंदिया वन विभागाकडे २५५ फायर ब्लोअर मशिन उपलब्ध झाल्या असल्याची माहिती आहे. असे असतानाही अनेक कारणांनी जंगलात आग लागत असते. वन विभागाकडून करण्यात आलेल्या नोंदीनुसार यंदाच्या फेब्रुवारी ते मे या चार महिन्यात ३२० वणव्याच्या घटनांची नोंद करण्यात आली असून यात ४४०.०८ हेक्टर वनक्षेत्र जळून खाक झाले आहे. विशेष म्हणजे मागील वर्षी २४१ वणव्याच्या घटनांची नोंद करण्यात आली होती. ज्यामध्ये यंदा वाढ आहे. मात्र, प्रभावित क्षेत्र पाहता गतवर्षी जानेवारी ते जून या कालावधीत ६८६.०७६ हेक्टर वनक्षेत्र प्रभावित झाले असल्याची नोंद आहे.
