चिचगड,दि 13(सुभाष सोनवाने)ः भाताच्या उत्पादनवाढीसाठी बीज प्रक्रिया व बियाणे उगवण क्षमतेची तपासणी करणे गरजेचे आहे. याच अनुषंगाने देवरी तालुक्यातील गावागावांमध्ये तालुका कृषी अधिकारी यांच्या मार्गदर्शनात धान बियाणे प्रक्रिया आणि बीज अंकुरण क्षमता तपासणीचे प्रात्यक्षिके शेतकऱ्यांना देण्यात येत आहे.यावेळी आत्मा यंत्रणेच्या तालुका तंत्रज्ञान व्यवस्थापक स्वप्ना लांडगे, सहाय्यक तंत्रज्ञान व्यवस्थापक सिद्धार्थ राऊत,कृषी सहाय्यक अजय कडव,सेवार्थ शेतकरी उत्पादक कंपनीचे संचालक श्री देशमुख,श्री हेमणे,श्री नागोसे,श्री देसाई, श्री पारधी, श्री रहांगडाले,श्री कोसमे व भागी येथील शेतकरी बांधव या वेळी उपस्थित होते.
प्रात्यक्षिकाचा एक भाग म्हणून देवरी तालुक्यातील भागी या गावी सेवार्थ शेतकरी उत्पादक कंपनी देवरीच्या गटामार्फत तालुका कृषी विभागातील कृषी व्यवस्थापन आत्मा यंत्रणा, क्षेत्रीय अधिकारी, कर्मचारी हे शेतकऱ्यांना प्रात्यक्षिक दाखवून कमी खर्चाची बीज प्रक्रिया करून शेतकऱ्यांमध्ये जागृती करीत आहे. धान पिकावरील रोग आणि किडीचा प्रादुर्भाव कमी करण्यासाठी बीज प्रक्रिया करणे महत्त्वाचे आहे. तीन टक्के मिठाच्या द्रावणाची प्रक्रिया व 100 दाण्यांची अंकुरण क्षमता तपासण्याचे प्रात्यक्षिके भागी येथे शेतकऱ्यांना प्रत्यक्ष करून दाखविण्यात आली.
