तिरोडा , ता.11: आपणास औष्णिक उर्जा ही महाग पडत असून आवश्यकतेऐवढी आपण निर्माण करु शकत नाही. त्यामुळे प्रदूषणही भरपूर होतो. वीज वापरताना महाग पडत असून सौर ऊज्रेचा वापर केल्यास त्यातही एलईडीचा वापर केल्यास प्रकाश भरपूर मिळेल व बिलही भरावे लागणार नाही. नागरिकांनाही एलईडी लाईटच्या वापर करावा, असे आवाहन आ. विजय रहांगडाले यांनी केले.विरसी चौकातील हायमास्ट लाईटचे उद््घाटन करताना ते बोलत होते.
उद््घाटन आमदार विजय रहांगडाले यांच्या हस्ते, सरपंच पद्मा वैद्य यांच्या अध्यक्षतेखाली करण्यात आले. याप्रसंगी प्रामुख्याने पोलीस पाटील हेमंत नागपुरे, प्रमोद गौतम, प्रफुल टेंभरे, गोपीचंद बावणकर, भाजपा तालुकाध्यक्ष भाऊराव कठाने, गजानन फटिंग, बकाराम पटले उपस्थित होते.
पुढे ते म्हणाले, हे हायमास्ट लाईट आपल्या आमदार निधीतून लावले असून तिरोडा तालुक्यात आठ ठिकाणी लावण्यात आले आहेत. असा हा नाविण्यपूर्ण उपक्रम संपूर्ण महाराष्ट्रात आपल्याच विधानसभा क्षेत्रात होत असल्याचे सांगितले. शाळेच्या आवार भिंतीसाठी पाच लाखांचा निधी मंजूर झाल्याचेही सांगितले.
शेतीसाठी पाणी महत्वाचे आहे. खळबंदा तलावात लवकरच पाणी सोडले जाईल तर चोरखमारा व बोदलकसा जलाशयात पाणी सोडण्याचे कार्य टप्पा-२ मध्ये होणार आहे. प्रकाशाच्या बाबतीत प्रथमत: गोला लाईट, ट्यूब लाईट, सीएफएल बल्व आणि आता एलईडी बल्ब आलेत. एलईडीमुळे विद्युत बचत होते. त्यामुळे नागरिकांनी एलईडीचा वापर करावा. शासनाचे पाऊलसुद्धा याकडे आहे, असे त्यांनी सांगितले. प्रास्ताविक हंसराज रहांगडाले यांनी मांडले. संचालन नरेश रहांगडाले यांनी केले. आभार घनश्याम पटले यांनी मानले.

गोरेगाव , ता.11: तालुक्यातील सर्व गणेश मंडळाच्या पदाधिकाऱ्यांची सभा नुकतीच पंचायत समिती सभागृहात पार पडली. या सभेद्वारे सर्व गणेश मंडळाच्या पदाधिकाऱ्यांना गणेशोत्सव शांततेत पार पाडण्याचे आवाहन पोलीस निरीक्षक सुरेश कदम यांनी केले.सभेला मार्गदर्शक म्हणून पोलीस निरीक्षक सुरेश कदम यांच्यासह उपनिरीक्षक श्रीधर खडके, नरेंद्र भड, डिलेश्वर पंधरे उपस्थित होते. यावेळी तालुक्यातील ५५ गणेश मंडळाचे पदाधिकारी उपस्थित होते. ५ सप्टेंबरपासून स्थापित केलेल्या गणेशाचे विसर्जन १५ सप्टेंबरपर्यंत करावयाचे आहे. १० दिवस विराजमान गणेशोत्सवात शांतता राहावी म्हणून घ्यावयाच्या काळजीबाबत सुरेश कदम यांनी उच्च न्यायालयाच्या निर्देशानुसार यावर्षी सहाय्यक धर्मादाय आयुक्तालय यांच्यामार्फत सर्व मंडळांनी तात्पुरत्या १० दिवसांची नोंदणी करणे गरजेचे आहे. नोंदणी झालेल्या मंडळांना परवानगी मिळेल. पण नोंदणी न झालेल्या मंडळांना स्वजबाबदारीवर गणेशोत्सव साजरा करावा लागेल. यासाठी रितसर सूचनांचे पालन करून गावातील शांतता भंग होणार नाही. लेखी परवानगी शिवाय वर्गणी गोळा करू नये व रहदारी अडवू नये, मंडप बांधण्यासाठी खासगी व ग्रामपंचायत जागेची लेखी परवानगी द्यावी. गणेश मूर्तीचे आसन मजबूत करावे. पावसापासून संरक्षण करावे, सजावटीमध्ये हॅलोजन व प्रखर उजेड देणारे विद्युत बल्व वापरु नये. उत्सवामध्ये व मिरवणुकीमध्ये करण्यात येणाऱ्या देखाव्याची माहिती पोलीस ठाण्याला देऊनच देखावे सादर करावे. जातीय भावना दु:खवतील असे आक्षेपार्ह गाणे, पोवाडे, पोस्टर्स लावू नये. मंडपाच्या ठिकाणी, विद्युत खांबावर धार्मिक किंवा संघटनेचे झेंडे लावू नये. मद्यपान करून झगडा- भांडण करणाऱ्या व्यक्तीस पोलिसाच्या स्वाधीन करावे. मिरवणुकीत गुलाल उडवू नये. मोठ्या आवाजाचे फटाके फोडू नये. मिरवणुकीच्या वेळी लहान मुलांना वाहनाच्या वरच्या भागावर बसवू नये, असे मार्गदर्शन केले.मंडळाच्या सर्व पदाधिकाऱ्यांनी आपली नावे, मोबाईल क्रमांक देऊन पोलीस विभागाला वेळोवेळी सूचना द्यावे व कुठलाही अनुचित प्रकार घडणार नाही, याची दक्षता घ्यावी, असे सांगितले.

गडचिरोली, ता.10: व्यसनमुक्तीसाठी शासनस्तरावर कडक कायदे करण्यात आले आहेत. मात्र लोकशिक्षणाद्वारे प्रबोधन करुन समाजजागृती केल्यानंतरच त्यासंबंधीचा निर्बंधात्मक कायदा राबविता येईल, असे प्रतिपादन ‘सर्च’चे संचालक डॉ.अभय बंग यांनी  केले. तंबाखू व दारुमूक्त जिल्हा विकास कार्यक्रमांतर्गत सर्व विभागांतील अधिकारी व कर्मचाऱ्यांची एकदिवसीय कार्यशाळा (ता.९) जिल्हाधिकारी कार्यालयात आयोजित करण्यात आली, यावेळी प्रमुख मार्गदर्शक म्हणून ते बोलत होते.

जिल्हाधिकारी ए.एस.आर. नायक यांच्या हस्ते कार्यशाळेचे उद्घाटन झाले. प्रमुख पाहूणे म्हणून मुख्य कार्यकारी अधिकारी शांतनू गोयल, सहायक जिल्हाधिकारी कौस्तुभ दिवेगावकर, निवासी उपजिल्हाधिकारी दुर्वेश सोनावणे, जिल्हा आरोग्य अधिकारी डॉ. कमलेश भंडारी, दंततज्ज्ञ डॉ. कैलास नगराळे उपस्थित होते.

डॉ. बंग पुढे म्हणाले, गडचिरोली जिल्हा दारु व तंबाखुमुक्त व्हावा या हेतूने ‘मुक्तिपथ’ हे अभियान जिल्हयात सुरु होत आहे.  तंबाखू  व दारुचा वापर हे  भारतात रोग निर्मितीचे प्रमुख कारण झाले आहे.  त्यामुळे कॅन्सर, बीपी. लकवा, हृदयरोग असे अनेक रोग निर्माण होत आहेत. गडचिरोली जिल्हयात एकूण लोकसंख्येमध्ये ४० ते ६० टक्के लोक दारु किंवा तंबाखूजन्य पदार्थाचा वापर करतात. तंबाखू व दारु विकत घेण्यावर लोकांचा एकूण ३४० कोटी रुपये वार्षिक खर्च होतो. शिवाय आरोग्याचे व आर्थिक नुकसान प्रचंड होत आहे. समस्येचे हे स्वरुप बघता तंबाखू व दारुचा वापर वेगाने कमी करणे हे गडचिरोली जिल्हयाचे आरोग्य रक्षण व आर्थिक विकासासाठी आवश्यक ठरते. यापूर्वीचे अनुभव बघता फक्त बंदी किंवा व्यसनमुक्ती असे एकांगी काम करुन भागणार नाही, तर यासाठी अनेकांगी कार्यक्रमांचा वापर करुन ही समस्या नियंत्रित करण्याचे मुक्तिपथ  या अभियानांतर्गत ठरविले आहे, असेही ते म्हणाले. याकरिता शासनाने पुढाकार घेतला असून राज्यस्तरावर मुख्यमंत्र्यांच्या अध्यक्षतेखाली कार्यगटाची स्थापना करण्यात आली आहे.  समाज जागृतीसाठी शासकीय विभाग, मुक्तीपथ, ग्रामसभा आणि प्रसार माध्यमे यांची महत्वाची भूमिका असेल, असेही त्यांनी स्पष्ट केले.

जिल्हाधिकारी नायक म्हणाले, प्रत्येक कार्यालय प्रमुखांनी आपल्या कार्यालयातील कर्मचारी व्यसनमुक्त  होण्यासाठी प्रयत्न करावे व त्याची माहिती वेळोवेळी अवगत करावी. कार्यालयातील जे अधिकारी व कर्मचारी संपूर्ण व्यसनमुक्त होऊन समाजात आदर्श निर्माण करण्यासाठी प्रयत्न करतील त्यांचा येथोचित सत्कार करुन बक्षीससुध्दा प्रदान करण्याचा मनोदय असल्याचे ते म्हणाले.