गोंदिया,berartimes.com दि.21-गोंदिया जिल्हा परिषदेच्या शिक्षण विभागातील सहाय्यक प्रशासन अधिकारी डी.टी.खोब्रागडे यांच्या न्यायालयीन व इतर प्रकरणाच्या चौकशीतील आदेशाला अधिन राहून अकार्यकारी पदावर सालेकसा किंवा आमगाव आमगाव तालुक्यात विभागीय आयुक्ताच्या पत्रानुसार मंजुरी प्रदान करण्यात आली होती.परंतु जिल्हा परिषदेच्या सामान्य प्रशासन विभागाने विभागीय आयुक्त कार्यालयाच्या पत्राकडे दुर्लक्ष करीत जागा रिक्त नसल्याचे बाब समोर करीत खोब्रागडे यांची प्राथमिक शिक्षण विभागात अकार्यकारी पदावर सहाय्यक प्रशासन अधिकारी म्हणून नेमणुक केली होती.परंतु गेल्या काही दिवसात खोब्रागडे यांच्यावर झालेल्या आरोपामुळे आणि वृत्तपत्रातील बातम्यामुळे त्यांना सालेकसा पंचायत समिती येथे रिक्त असलेल्या सहाय्यक प्रशासन अधिकारी या पदावर अकार्यकारी म्हणून पुढील आदेशापर्यंत पदस्थापना करण्यात येत असल्याचे आदेश 15 सप्टेंबर रोजी प्रभारी मुख्य कार्यकारी अधिकारी जयंवत पाडवी यांच्या स्वाक्षरीने काढण्यात आले आहेत.परंतु खोब्रागडे हे अद्यापही शिक्षण विभागातून कार्यमुक्त झाले नसल्याचे वृत्त समोर आले आहे.विशेष म्हणजे या आदेशात स्पष्टपणे 15 सप्टेबंरच्या मध्यानंनंतर त्यांना  नवीन पदस्थापनेच्या जागी पदभार स्विकारण्यासाठी कार्यमुक्त करण्यात येत असल्याचा उल्लेख केला गेला आहे,तरीही या आदेशाला डावलत ते अद्यापही शिक्षण विभागात कार्यरत आहेत.दरम्यान प्राथमिक विभागाचे शिक्षणाधिकारी उल्हास नरड यांना बेरार टाईम्सच्या प्रतिनिधीने विचारणा केली असता त्यांनी जोपर्यंत त्यांच्याजागेवर पर्यायी व्यक्ती येत नाही,तोपर्यंत ते कार्यमुक्त होणार नसल्याचे सांगितले.

तिरोडा दि.21: गतिमान महाराष्ट्र राज्याचे मुख्यमंत्री देवेंद्र फडणवीस यांनी कमी खर्चामध्ये व शेतकर्‍यांना वैयक्तिक लाभ तसेच पाणी टंचाई दूर करण्याच्या दृष्टीने व जलस्तर वाढविण्याकरिता स्थानिक तहसील कार्यालय तिरोडा येथे जलयुक्त शिवार योजनेची सुरुवात केली. तिरोडा तालुक्यातील या कामांचा आढावा आमदार विजय रहांगडाले यांनी घेतला. यात पंचायत समितीमार्फत १३ कामे घेण्यात आली असून ८0 टक्के काम पूर्ण झाल्याची माहिती देण्यात आली.
सदर कामांची प्रशंसा महाराष्ट्रात तर नव्हे तर संपूर्ण भारतामध्ये होत आहे. याच जलयुक्त शिवार योजनेतून आ. विजय रहांगडाले यांनी सन २0१६-१७ जलयुक्त शिवार योजनेत असलेले गाव सोनेगाव येथे चार तलावांना जोडून एक मोठा तलाव बनविण्याकरिता समाविष्ट केले आहे. या कामाची सुरुवात होणार असून या तलावाच्या माध्यमाने ५00 हेक्टर शेतजमीन सिंचित होणार असून मोठा जलसाठा निर्माण होणार आहे.
या विषयी मुख्यमंत्र्यांना माहिती दिली असता आमदार विजय रहांगडाले यांचे प्रशंसा करण्यात आली. हे एक जलयुक्त शिवारमधील ड्रीम प्रोजेक्ट ठरणार आहे. तसेच तिरोडा तालुका हा जिल्ह्यामध्ये जलयुक्त शिवार योजनेत प्रथम क्रमांकावर असून या योजनेमध्ये पंचायत समितीमार्फत १३ कामे घेण्यात आली असून ८0 टक्के कामे पूर्ण झालेली आहेत.
कृषी विभागामार्फत २१५ कामे, वनविभागामार्फत आठ कामे, लघूसिंचन पाच कामे, ग्रामीण पाणीपुरवठामार्फत ११ कामे व इतर तलाव खोलीकरणाची कामे सीएसआर निधीच्या माध्यमाने झालेली आहेत. सन २0१६-१७ ची उर्वरित कामे यावर्षी पूर्ण होणार असल्याचे सांगण्यात आले आहे.
आढावा बैठकीमध्ये तिरोडा उपविभागाचे उपविभागीय अधिकरी सुनील सूर्यवंशी, तहसीलदार रविंद्र चव्हाण, गटविकास अधिकारी मानकर, तालुका कृषी अधिकारी पोटदुखे, वनपरिक्षेत्राधिकारी विजय कदम व इतर संबंधित सर्व अधिकारी उपस्थित होते. तसेच धडक योजनेमध्ये जिल्ह्यात पाच हजार विहिरी बांधण्याचे उद्दिष्ट असून या योजनेतून सर्वात जास्त विहिरी तिरोडा क्षेत्रात व्हाव्यात, असे निर्देशसुद्धा अधिकार्‍यांना दिले. शेतकर्‍यांना धडक योजनेच्या विहिरींचा लाभ घ्यावा, असे आवाहन आ. विजय रहांगडाले यांनी केले.

भंडारा ,berartimes.com दि.21: कृषी सेवक सरळ सेवा पदभरती परिक्षेच्या निकालात राज्यातील सर्वच विभागात मोठ्या प्रमाणात घोळ झाल्याचे लक्षात आल्यानंतर तसेच भंडारा जिल्ह्यातील विद्यार्थ्यांवर सुध्दा अन्याय झाल्याचे स्पष्ट दिसून आल्यानंतर पदवीधर महासंघाच्या कार्यकर्त्यांनी शहर अध्यक्ष पराग भुतांगे व राहुल शामकुंवर यांच्या नेतृत्वात मुख्यमंत्री देवेंद्र फडणवीस यांना जिल्हाधिकारी चौधरी यांच्या मार्फत निवेदन पाठवून सदर परिक्षा रद्द करुन पुर्नपरिक्षा घ्यावी अश्या प्रकारचे निवेदन देण्यात आले.राज्यात कृषी सेवकांच्या ७३० पदांसाठी परिक्षा ६ आॅगस्ट २०१६ रोजी घेण्यात आली. या परिक्षेत ६५ हजारावर विद्यार्थ्यांनी दखल केले होते. त्यापैकी ५७ हजार विद्यार्थ्यांनी परिक्षा दिली या परिक्षेचा निकाल ६ सप्टेंबर २०१६ रोजी जाहिर करण्यात आला.

पंरतु सदर निवड प्रक्रियेमध्ये घोळ आढळून आलेत. विशाल उखा पाटील (अर्ज क्र. १३६६४) हा विद्यार्थी औरंगाबाद विभागातून ओबीसी प्रवर्गातून १८२ गुण प्राप्त करीत ह्याची निवड ओपन जनरल १३ मध्ये झाली. हाच विद्यार्थी ठाणे विभागातून (अर्ज क्र. ४८१७) ओबीसी प्रवर्गातून १८२ गुण प्राप्त करीत ह्याची निवड ओपन जनरल ९ मध्ये झाली. पुणे विभागातून हरिश कैलास देवरे व नरेश कैलास देवरे भाऊ उत्तीर्ण झाले. या दोन्ही भावाना १८३ गुण प्राप्त झाले.

विशेष म्हणजे या दोन भावाच्या वयात केवळ सहा महिन्याचे अंतर आहे. औरंगाबाद विभागात प्रथम क्रमांकाच्या विद्यार्थ्याला १८७ गुण त्याखालोखाल १८४ गुण प्राप्त केलेले पाच विद्यार्थी, १८३ गुण प्राप्त केलेले सहा विद्यार्थी, १८२ गुण प्राप्त केलेले तीन विद्यार्थी व त्यानंतर थेट १३७ गुण प्राप्त केलेला परिक्षार्थी. कोल्हापुर विभागात प्रथम क्रमांकाच्या विद्यार्थ्याला १८२ गुण त्याखालोखाल १८१ गुण प्राप्त केलेले चार विद्यार्थी व त्यानंतर थेट १५० गुण प्राप्त केलेला परिक्षार्थी. अमरावती विभागात सर्वसाधारण गटात फक्त १२४ गुणांवर प्रथम क्रमांकाचा विद्यार्थी आहे. नागपूर विभागात १६५ ते १८२ गुणांच्या दरम्यान १६ मुले आहेत व १४८ ते १६२ गुणांच्या दरम्यान एकही उमेदवार नाही व नंतर थेट १४८ गुणांच्या खाली इतर परिक्षार्थी आहेत.

मेरिट लिस्ट व प्रतिक्षा यादीतील गुणांमध्ये मोठी तफावत आहे. निवड यादीत ओपन प्रवर्गातील पुरुष निवड यादी ९२ गुणांवर तसेच महिला निवड यादी ९१ गुणावंर झाली. याच्या तुलनेत ओबीसी महिला यादी ११३ व ओबीसी पुरुष यादी १२९ गुणांवर अंतिम निवड करण्यात आली. ओबीसी उमेदवारांना जास्त गुण असूनसुध्दा डावलण्यात आल्याचे स्पष्ट होते व ओपन प्रवर्गातील विद्यार्थ्यांची निवड कमी गुणांवर सुध्दा करण्यात आली. सर्वसाधारण गटात गुणवत्ता यादीत १८६ गुणांचा विद्यार्थी पहिला आला आहे. परंतु प्रश्न पत्रिकेचे अवघड स्वरुप बघता मेरिटचे आकडे संशयास्पद आहेत. करिता सद विद्यार्थ्यांची परिक्षा केंद्रावरील व्हिडीओ रेकॉर्डींग तपासण्यात यावी जेणेकरुन कुणी याना मदत तर करीत किंवा अत्याधुनिक उपकरणाचे वापर तर करीत नाहीत तसेच सदर प्रकरणाची सीआयडी चौकशी करण्यात यावी व त्यात पदवीधर महासंघ भंडारा जिल्ह्यातील विद्यार्थ्यांचे मत सुध्दा नोंदविण्यात यावे. परीक्षा रद्द न झाल्यास तीव्र आंदोलन करण्याचा इशारा पदवीधर महासंघाचे शहर अध्यक्ष पराग भुतांगे, राहुल शामकुवर, जाबीर मालाधारी, शितल भुरे, प्रवीण अंबादे, सुदेश रामटेके, जितेंद्र मेश्राम, प्रफुल्ल कोटांगले, ब्रजेश खोब्रागडे, मयूर रामटेके, नितीन कांबळे, प्रमोद धुर्वे, रवी समरीत, संदीप वंजारी, प्रफुल्ल भोयर यांनी दिला आहे.

गोंदिया दि.21: काश्मीरमधील उरी येथील लष्करी तळावर झालेल्या हल्यात १८ जवान शहीद झाले असून या हल्याच्या निषेधार्थ येथील राष्ट्रवादी युवक काँग्रेसच्या तरूणांनी जयस्तंभ चौकात एकत्र येवून मंगळवारी (दि.२0) पालिस्तानचा झेंडा जाळला.
येथील जयस्तंभ चौकात तरूणांनी सर्वप्रथम मेणबत्ती जाळून तसेच दोन मिनिटांचे मौन धारण करून शहीद झालेल्या जवानांना श्रद्धांजली अर्पित केली. त्यानंतर पाकिस्तान विरोधी नारेबाजी करीत पाकिस्तानचा झेंडा जाळला.
याप्रसंगी रौनक ठाकूर, आकाश नेवारे, राजेश काळसर्पे, सौरभ सिंग, अक्षय सिंगनधुपे, रोहीत कोहरे, दर्पण कापगते, परेश राणा, शँकी उमरकर, विकास खोटेले, समीर येसनसुरे, तपन केशवानी, टोलू नेवारे, हितेश दानी, राजकुमार लिल्हारे, शुभम नागपूरे, भूपेश गायधने, दिनेश लिल्हारे, अजय लिल्हारे, गंगाधर ढेकवार, शंकर मंडेले, रोहीत मेंढे, शुभम गंगवंशी, परिल धोटे, निलेश बहेकार, दिलप्रीत वोहरा व अन्य नागरिक उपस्थित होते.

गडचिरोली, दि.२०: सिरोंचा तालुक्यातील पातागुडम पोलिस मदत केंद्रांतर्गत पेडलाया जंगलातून पोलिसांनी काल नक्षल्यांचा मोठा शस्त्रसाठा जप्त केला.काल पातागुडम व देचलीपेठा येथील क्यूआरटी पथकाचे जवान संयुक्तरित्या नक्षलशोध मोहीम राबवीत असताना त्यांना पेंडलाया जंगलात ४ भरमार बंदुका व १४ जीवंत काडतुसे आढळून आली. अज्ञात नक्षल्यांविरुद्ध असरअली पोलिस ठाण्यात गुन्हा दाखल करण्यात आला असून, परिसरात नक्षलविरोधी अभियान तीव्र करण्यात आले आहे.